أجي نتا ولا نتي لي كاتقرا هادشي، بغيت نسولك :
واش عندك الزهر ؟
بناء على تجربتك ف هاد الحياة كل واحد فيكم غايقول ليا آه ولا لا ماعنديش و هو متيقن من الجواب ديالو لي بناه على مجموعة د التجارب فمدرسة الحياة، أنا اليوم غانقول ليكم بلي ماكاينش شي حااجة سميتها الزهر ولا الحظ و ماكاينش شي عامل فالكون لي غايتحكم فالمواقف الحياتية ديالك من غير الافكار و التصرفات ديالك نتا!
ريتشارد وايزمان Richard Wiseman هو عالم نفس بريطاني دار دراسة طويلة المدة ديالها 10 سنوات على علم الحظ "The Science of Luck"، باش يدير هاد الدراسة دار إعلان فالجرائد : أي واحد كايعتابر راسو محظوظ بزاف أولا غير محظوظ يتصل بيه باش يشارك فالتجربة، فاللخر ريتشارد جمع 400 شخص كبار و صغار رجال و عيالات، فواحد التجربة عطاهم جرائد و قال ليهم حسبو ليا التصاور لي كاينين فالجريدة، الناس اللي كايشوفو راسهم ماعندهمش الزهر دوزو وقت طويل و هوما كايحسبو التصاور بمعدل جوج دقائق، بينما الناس "المحظوظين" دوزو ثواني قليلة فالبحث حيت شافو فالصفحة الثانية واحد الرسالة مكتوبة بخط كبير : "بلا ماتحسب را كاين 43 تصويرة فهاد الجريدة"، من هنا غاناخدو الاستنتاج الاول فمقارنة هاد جوج الانواع د الناس : الناس المحظوظين عندهم انفتاح على خاصيات جديدة بمعنى ماكايبقاوش غاديين فطريق لي مرسومة ليهم من طرف النظام بل كايقلبو على طرق أخرى باش يوصلو للهدف، هادشي لي كايخليهم أكثر نجاحا من الآخرين.
ف واحد التجربة أخرى، ريتشارد وايزمان عطا للفريقين واحد السيناريو : "تخيل أنك نتا ف بانكا و شويا دخلو الشفّارا و طلقو قرطاسة وحدة، هاديك القرطاسة جاتك ف يدك، واش كاتشوف راسك محظوظ ولا لا ؟" هادوك اللي كايشوفو راسهم منحوسين قالو بلي هاداك سوء حظ حيت من وسط بانكا وحدة من بين بزاف د البانكات تسرقات هاديك لي هوما فيها ف هاداك الوقت و من وسط بزاف د الناس ف هاديك البانكا هوما لي جات فيهم القرطاسة و بالتالي النحس تابعهم فينما مشاو .. بينما الناس لي كايشوفو راسهم محظوظين قالو أنهم عندهم الزهر حيت ماجاتهمش ف شي بلاصة أخرى بحال الرأس، و كانو راضيين بالسيناريو لي طاحو فيه حيت كان من الممكن تكون كفس .. هنا عاوتاني غانتلاحو لاستنتاج واحد آخر : الناس لي كايشوفو راسهم محظوظين كايكونو متفائلين بالمستقبل ديالهم و ايلا وقع ليهم شي مشكل كايحاولو يتخيلو سيناريو كفس من هاداك المشكل باش يحافظو على الايجابية ديالهم هادشي لاش فينما تشوف شي واحد ناجح ف حياتو ماتقولش : ولد الحرام ! عندوو الزهر، بل قول بلي هاداك السيد صنع الحظ ديالو بيديه!
من خلال تجارب ريتشارد وايزمان، هاد السيد خرج لينا 4 ديال الطرق باش تصنع الحظ ديالك :
1 - ماكايناش طريقة وحدة باش توصل للهدف ديالك، جرب كولشي و دير الطريقة لي رتاحيتي فيها (واخا تكون طريقة بطيئة المهم توصل)
2 - باش توصل للهدف خاصك تنقي دماغك من الافكار العشوائية، ركز على شنو بغيتي و تبع الحدس ديالك
3 - توقع راسك غاتوصل ل داكشي لي بغيتيه، و لكن ماتنعسش و تسنى اللقمة تجيك ل فمك سير قلب على راسك و خلي راسك إيجابي واخا تفشل مرة و جوج و ثلاثة.
4 - منين توقع ليك شي كارثة، حاول تقنع راسك بلي كان ممكن يوقع لك كفس من هكاك و حفز راسك بلاصة ماتفقد الامل حيت تاواحد ماغايوقف معاك من غير راسك !
الحظ ماكاينش فالهوا و ماكاينش فالنهار لي تزاديتي فيه، و ماكاينش ف لون حوايجك، و ماكاينش ف هاداك لي كاتشوف كمّارتو مع الصباح، الحظ كاين ف شخصيتك نتا، و نتا لي كاتحكم فيه واش مزيان و لا خايب، و السلام.
غانخلي ليكم فيديوات كايهضرو على علم الحظ باش تزيدو تفهمو أحسن :
إعداد : عبدالله الشعيبي
تدقيق : جلال حميميد
