حياتك كاتعاود للمرة المليون !

بلا شك كاملين منين تانسمعو العود الأبدي Eternal return كايتبادر  للذهن ديالنا الفيلسوف الألماني فريدريك نيتشه، ولكن فنفس الوقت كانلقاو راسنا حائرين أمام المعنى الفلسفي Philosophical meaning لهاذ المصطلح،  داكشي علاش اليوم غادي نحاولو نمشيو دقة دقة، ونشرحو هاذ البلان، بطريقة لي كولشي يقدر يفهمها.

• شنو معنى العود الأبدي؟

العود الأبدي باختصار شديد هو افتراض فلسفي Philosophical assumption، تايقول أن الزمن ماتايمشيش فخط مستقيم، ولكن تايمشي على شكل دائرة، وبالتالي كل مرة غايبقى يعاود راسو.

ما فهمتيش ياك؟ واخا تبع معايا، تخايل معايا بلي نتا غادي فواحد Rond point كبيرة، تادور عليها، منين غادي تسالي ديك الدورة غاتكون وصلتي للنقطة أ لي انطلقتي منها، تماك غاتكون متي، وفنفس الوقت غادي تبدا الدورة عوتاني من النقطة أ حيتاش من تم بديتي، هكذا هو الزمن "غايسالي" فواحد النقطة وغايرجع من جديد (من نفس النقطة)، وبطبيعة الحال غايوقعو نفس الأحداث، وغادي تقرا هاذ المقال، فهاذ الوقيتة بالضبط فالدورة المليار ديال الزمن.

هاذشي معقد ياك؟ ماشي مشكل أنا غادي نخليك تستارح شوية بينما نعاود ليك شكون جاب هاذ الفكرة وعلاش جابها :

فالوقيتة لي الناس خايفين فيها من العدم والموت والفناء وباغيين الخلود Eternity والحياة الأبدية eternal life كان واحد الفيلسوف ألماني سميتو : فردريك نيتشه، ماتايآمنش بهاذشي، واستنادا على فكرة "سقراط يهضر فبلاصتي" لي استخدمها أفلاطون، قرر نيتشه يدير نفس لبلان ويخلي زرادشت يهضر فبلاصتو فالكتاب ديالو : هكذا تكلم زرادشت، ويعطي مفهوم آخر للأبدية، لي فنظر نيتشه غايكون أكثر منطقية وموضوعية ويحترم العلم، لي هو العود الأبدي Eternal return، المهم وما فيه هو أن الهدف ديال نيتشه من تطرقه لهاذ القضية هو أنه يكالمي دوك ناس لي تايخافو من الموت وكايتمسكو بحلم الحياة الخالدة ويقوليهم راه كاين واحد لبلان لي هو غاتموت وغاتعاود حياتك كاملة من جديد وبنفس التفاصيل لي مريتي منهم وبالتالي غاتكون أبدي بطريقة أخرى، طبعا هاذ الفكرة ماشي وليدة نيتشه، وانما كانو تايآمنو بيها الهنود شحال هاذي هوما والشعوب والقبائل ديال شرق آسيا، لدرجة هضر عليها كريشنا ف كتاب البهاغافاد غيتا Bhagavad Gita وقال أن العالم غادي يبقى دائما يتكرر بصورة دائمة. 

وربما هذا هو سبب اختيار نيتشه لزرادشت، إلا أن الجميل فالأمر هو ان نيتشه دعم الفكرة ديالو حول العود الأبدي بأدلة علمية scientific arguments لي العلم توصل ليها فالقرن العشرين والواحد والعشرين، ومن بين الأدلة لي استخدم :
" اذا جمعنا القوى كااملة لي فالكون غانلقاو هاد المجموع ديما ثابت على مر الزمان. وبالتالي غانقدرو نفتارضو تلاتة الافتراضات: يااما غايكون هاد المجموع غادي و كايزيد، ولا غادي و كاينقص، أولا كايبقا ثابت و محدد. الافتراض الأول ماصحيحش حيتاش اذا كان كايتزايد، ف منين اتجيه هاد الزيادة؟ و الافتراض الثاني تاهو ماصحيحش حيتاش اذا كان غادي و كاينقص ف من المفروض تكون قوى   الكون سالات قبل من هاد الوقت لي حنا فيه دابا وايكون الكون فان dissolution of universe. اذن بقا لينا غير الافتراض الأخير لي كايقول بلي مجموع قوى الكون كايبقا ثابت في كل زمان. وبالتالي فلابد و غاتجي نهاية الوقت، فين غايتعاود نفس الزمان ونفس الأحداث بحيث غاتكون البداية فنفس الوقت." (من كتاب عبد الرحمن البدوي : نيتشه)

هنا تايبان لينا كيفاش أن نيتشه استخدم محدودية القوى، ونظرية مصونية الطاقة (ماعندها تا علاقة بالماسونية وطاقة المكي سخيرات) لي هي مبدأ حفظ الطاقة the law of conservation of energy القائل بأن المادة لا تفنى ولا تستحدث من عدم، باش يأيد الفكرة ديالو.

المهم باش نرجع معاك شوية اللور حيت دماغك دابا غايكون باغي الخلاصة ديال العود الأبدي : هاذ الحياة لي كاتعيشها أصديقي غادي تعاود تعيشها ملايير المرات مالا نهاية من المرات، خليها زوينة باش ماتعدبش كل مرة غاتعاود تعيشها.

الخايبة هي لا كانت هاذي لمرة المليون، حيت غاتكون تاتعاود شي حاجة درتيها قبل ولكن بنادم هو لي يتشبت بمبدأ Amor fati بسلامة.

المصادر : 

• كتاب فريدريك نيتشه : هكذا تكلم زرادشت 
• كتاب عبد الرحمن البدوي : نيتشه
• كتاب مجدي كامل : فريدريك نيتشه
• الكتاب الهندي المقدس : البهاغافاد غيتا

إعداد : زكرياء بلقاسم

تدقيق و تصميم : عبد الله الشعيبي