كذبوا عليك وقالوليك واحد نهار بلي الحيوانات ماعندهمش عقل، ولكن عمرك سولتيهم شنو هو تعريفكم للعقل؟
اليوم فهاذ السلسلة لي اختاريت ليها كعنوان : "كذبوا عليك" غادي نعريو الحقيقة ونبينو گاع الأكاذيب لي قالولينا، باش مانبقاوش عميين ونشوفو النور ديال الحقيقة، مستعد؟
- تعريف العقل Mind :
العقل فالعلم هو مصطلح معنوي ماشي مادي، لي المعنى ديالو هو الأنشطة لي تايقوم بها الدماغ، من تخطيط، اتخاد القرار، التذكر وما إلى ذلك (المصدر)، السؤال دابا واش الدماغ ديال الحيوانات تايدير هاذ الأنشطة؟
آه، وربما غاتكون لاحظتي كيفاش اللبؤات كايديرو خطة باش يصطادو الفرائس ديالهم، وكيفاش الأسد أو أي حيوان كاياخد القرار ديالو أثناء القتال، واش يكمل ولا ينساحب، يدابز من الأصل ولا بلاش، كيفما غاتكون لاحظتي الكلب كيفاش كايتذكر الرائحة ديال المخدرات... كيفما غاتكون شفتي حيوان كايتعاطف (في حالة اقحمنا العاطفة من ضمن الأنشطة ديال العقل) وبالتالي شنو تايقصدو بالعقل فاش تايقولو لينا أن الحيوانات ماعندهاش عقل, إذا كان العقل هو ما أشرنا إليه سابقا؟
معظمكم دابا غايقولي بلي أفلاطون وارسطو منين دواو على العقل (وگاع الفلاسفة الإغريق) كانو كايربطوه بالروح، وبالتالي العقل بالنسبة ليهم موجود بوجود الروح وغائب بغياب الروح !
فالحقيقة هذا طرح فلسفي زوين ولكن ميتافيزيقي بزاف، حيتاش جا فمرحلة كاتسمى مرحلة النظريات غير العلمية، واخا هكذاك ما فيها باس نسافر معاك شوية لعصر أرسطو وأفلاطون ونشوفو شنوهي النظرية ديالهم حول العقل.
- شنو تايقول أرسطو على العقل :
- شنو تايقول أفلاطون فهاذ القضية ديال العقل؟
باش تفهم كتر شتايقول أفلاطون وأرسطو والفلاسفة لاخرين بحال أبيقور والرواقيين والهلنستيين وفلاسفة ما قبل سقراط, فقضية الروح والعقل وإنسانة دخل هنا راه غاتلقى العجب العجااب ديال المعلومات, غير هو عنداك تسطى... عنداك تسطى... عنداااك.
- شنو تايقول العلم فهاذ القضية ديال العقل؟
كيفما قلنا فالأول العقل هو الأنشطة لي تايقوم بها الدماغ، دونك عندو علاقة فقط وفقط مع الدماغ، يعني اذا خرجنا على وظائف الدماغ ماغانبقاوش تانهضرو على عقل وانما شي حاجة أخرى، وباشما دوخكش هاذ القضية غادي نعطيك مثال يلخص ليك هاذشي... نفتارضو بلي الدماغ هو الكهرباء وبلي العقل هو لعيبات لي تايخدمو بالكهرباء السؤال هو واش تقدر تخدم هاذ اللعيبات بلا كهرباء؟
دابا كاين فيكم لي غايقولي، واخا أسي زكرياء فهمناك بلحق ماتنساش بلي ديكارت وكانط بالنسبة ليهم العقل هو الوعي دونك المقصود بالحيوانات ما عندهاش عقل هو الحيوانات ماعندهاش وعي !
واخا، عندكم الحق بعض الفلاسفة بحال ديكارت وكانط لي ذكرتوا خدموا مصطلح العقل للدلالة على الوعي، بغض النظر على التقسيمات لي دار كانط للعقل (عملي ونظري) وبغض النظر على شنو قصد بالعقل فهاذ الصدد حيتاش المصطلح تايتفهم من السياق، وبغض النظر على واش العقل عند ديكارت هو الوعي أو فقط كاينة علاقة ما بين العقل والوعي والإدراك، ولكن صبرو...
- شنو هو الوعي Consciousness؟
الوعي Consciousness هو مصطلح معنوي عوتاني لي تايعبر على الحالة فين تايكون العقل متواصل مع المحيط الخارجي من خلال منافد الوعي لي هي الحواس الخمس، هذا التعريف العام ديال الوعي، فعلم النفس كاين تعريف مفصل شوية لي تايقول بلي الوعي هو الحابة العقلية فين تايكون الإحساس بالذات، الإدراك الذاتي، الحالة الشعورية، والقدرة على الإدراك الحسي، هاذشي صعيب بلحق غانشرح ليك، شتي منين تاتكون عارف أنك كاين، وتاتستشعر الوجود ديالك، كاتكون ملكة الإحساس بالذات خدامة، ومنين كاتشوف راسك فمراية وكاتعرف راسك وكاتولي قادر تميز راسك على الآخرين، كاتكون ملكة الإدراك الذاتي خدامة، أما منين كاتأثر فيك شي حاجة سواء كاتفرحك او العكس هاذيك هي الحالة الشعورية، وختاما منين كاتشوف تفاحة وتاتعرفها راه تفاحة هذاك إدراك حسي.. مهم هاذشي غير مبسط. (المصدر)
دابا أجي للمعقول ونشوفو العلم أش تايقول فهاذ القضية باش نختموا نيت هاذ القضية ديال الوعي...
- واش الحيوانات عندها وعي؟
الأدلة المختلفة تاتأكد أن الحيوانات الأخرى غير الإنسان عندها وعي بالإضافة على أنه عندها التشريح العصبي والكيميائي والركائز العصبية المسؤولة على الوعي والقدرة على اختيار أفعال بشكل متعمد ومقصود، وبالتالي هاذ الأدلة كاتأكد على أن الإنسان ماشي هو الكائن الوحيد لي عندو وعي، بل كائنات أخرى من بينها جميع الثدييات والطيور والحيوانات الأخرى عندها القدرة على الوعي.
- إيلا بغيتي تقرا الاعلان الرسمي
- أو تفرج فيه ايلا كنتي معكاز : Francis Crick Memorial Conference
- واش الحيوانات واعية بوجودها؟
أولا خاصنا نعرفو شنو هو الوعي بالذات، داكشي علاش غادي ناخد وقيتة من الجواب باش نشرح فيها الوعي بالذات للناس لي ماعارفينش، باش يتبعو معانا تاهوما، آلوغ الوعي بالذات هو الوعي بالوجود، وإدراك الوجود ديالك ككائن منفرد، فإذا كان الوعي هو الوعي بالعوامل الخارجية فراه الوعي بالذات هو الوعي براسك بيك أنت وسط الناس، دابا منين عرفنا شنو هو الوعي بالذات آجي نشوفو واش الحيوانات عندها ولا ماعندهاش.
قبل مانقوليك الجواب خليني نقوليك بلي الوعي بالذات شي حاجة لي هي مكتسبة، بحيث أنك نت ماكنتيش واع بذاتك حتى للسنين الأولى من حياتك عاد ولات عندك هاذ القدرة (المصدر) وإذا عندك خوك صغير فعمرو عام ولا عامين يمكن ليك دير ليه واحد تجربة ديال أنك توريه راسو فالمراية ومن بعد دير ليه علامة بستيلو فجبهتو mirror self-recognition test وتشوف واش غايتعرف على راسو ويدير ردة فعل ديال أنه يحيد العلامة ولا لا، في حالة حيدها راه واعي بذاتو في حالة ماتسوقش راه مازال ماكتاسبهاش.
نفس الطريقة يمكن ليك طبقها على أي حيوان وتشوف بعينيك ماعدا الكلب حيتاش عقلو كايخدم بميكانيزم آخر (المصدر)، ولكن هذا لايعني أنه ماواعيش بذاتو ولكن كاينين شي لعيبات لي نفضل أنني نخليهم لشي مقال آخر، المهم، العلماء دارو هاذ التجربة على بنادم، القردة العليا (المصدر)، الفيلة (المصدر)، الدلافين (المصدر), الحوت القاتل (المصدر), النمل (المصدر), شيطان البحر (المصدر), وبعض الطيور (المصدر)... والنتيجة :
الحيوانات عندها وعي بالذات نعم، ولكن ماتعجبش لا لقيتي حيوان مازال ماعندوش وعي بالذات، حيتاش الوعي بالذات هو شي حاجة لي مكتسبة، ولي غادي تحتاج منو فقط بعض الدقائق ويكتاشفها منين غايتحط قدام راسو، وهذا فيديو غايبين ليك كيفاش فيل ماكانش عندو وعي بالذات ولا عندو فظرف دقائق فقط.
المهم أ صاحبي ماتبقاش تيق أي واحد قاليك شي حاجة قلب وبحث راه المعلومة ولات بين يديك فهاذ القرن، المصادر بين يديك، قلب ودير النقد باش توصل للحقيقة، وماتنساش
لا صوت يعلو فوق صوت العلم.
إعداد : زكرياء بلقاسم
تدقيق : عبد الله الشعيبي
