تقدر شي حاجة بحال كرة تحول لموجة كغرومغناطيسية , تعبر الاف الكيلوميترات و ترجع كيفما كانت؟
بشكل غريب جدا و على حسب ميكانيكا الكم, الاجابة فالحقيقة تقدر تكون
اه. نوعا ما. الطريقة تقدر تكون كالتالي: الكرة بذاتها ماتقدرش تترسل عبر موجات, و
لكن كاع
المعلومات عليها تقدر, فميكانيكا الكم الذرات و الاكترونات كاتميزها واحد
المجموعة دالخصائص , بحال الوضعية (الاحداثيات) , الزخم (أو لا قوة الدفع), و اللف
المغزلي, خصائص بحال هادي كاتقدر تحدد لينا بالضبط نوع و مكان و كيفية تصرف
الجزيئة, المجموع ديال كاع هاد المعلومات كيعيطينا فاللخر معلومات على الجسم بكلو
و لي هو فهاد الحالة الكرة. فهاد الحالة كاتكون عندك كاع المعلومات الكافية على
كرة فالمغرب و لي تقدر تسيفطها للجيهة الاخرى من الارض, و من خلال هاد المعلومات
ممكن تصوب كرة اخرى و لي هي فوطوكوبي ديالها و تقدر تقول كاع هي.
المشكل هنا هو أن
المعلومات لي خصنا نرصدو ماشي ساهلة باش تتعرف, مبدأ عدم اليقين ف ميكانيكا الكم
كيقولينا بيلا الموضع و زخم الدفع مايمكنش يتقاسو فدقة وحدة. حيتاش باش نعرفو موضع
واحد الجسيم كيخصنا نسلطو عليه فوتونات (و لي هي جزيئات الضوء) الشيء لي كيخليه
يكتسب زخم دفع جديد, و فاللحظة لي كيرجع الفوتون كيكون الجسيم فبلاصة جديدة و بزخم
دفع اخر. يعني بعبارة اخرى باش نعارفو الحالة ديال واحد الجسيم كانكونو بدلناها.
إذن كيفاش انقدرو نجمعو معلومات على شي حاجة بحال هاكا؟
الجواب نقدرو نلقاوه فواحد
الحاجة كاتسمى الارتباط الكمي. الارتباط الكمي هو واحد الظاهرة قديمة و غامضة, و
مزال لحد الان مافهمناهاش مزيان, و الا ربطنا بهاد الطريقة جوج ديال الاكترونات
مثلا , هادشي كيأدي لأنه يكونو عندك جوج ديال الاكترونات لي فنفس الحالة ديما, و
الحالة لي كان فيها واحد كيولي فيها الاخر, سواء كانت بيناتهم 2 ميكرومتر و لا سنة
ضوئية. بطريقة من الطرق الحالة لي عليها واحد كاتأثر فالاخر بلا مايكون اتصال
مادي. بهاد الطريقة غانقدرو نقيسو المعلومات بدقة و فنفس الوقت فاش نبغيو نصنعو
الكرة الاخرى مغاتبقاش الاولى كيفما كانت ( بسبب مبدأ عدم اليقين) و بالتالي
مغاتكونش عندنا نسخة و لكن شي حاجة لي قريبة أكثر للانتقال عن بعد. و لكن فالوقت
الحالي باقيين العلماء بعااد على قياس المعلومات ديال أجسام لي كبيرة, التعقيد و
الطاقة لي كانحتاجو لبحال هاد الأمر كبيرة بزاف , لحد الان كانقدرو ننقلو إلكترونات, و ذرات و صافي. و عمرنا مانقولو مايمكنش 😃 حيتاش الكون ديما عندو شي حاجة يفاجأنا بيها.
المصادر المعتمدة في إنجاز المقال :
Iflscience : هنا
ScienceDaily : هنا
Ted-Ed : هنا
إعداد : أمين أبوطالب
تدقيق : عبد الله الشعيبي
