علاش كاتهدر مع راسك؟ هاد السؤال غايكون عادي بالنسبة لأغلبية الناس، وقليل لي
غايجيه فشكل. اذن شنو كايعني هادشي؟ واش الأغلبية لي عادية ولا الأقلية؟ كيفاش وليتي كاتهدر مع راسك؟ وباش كاتفيدك وكاضرك هاد العملية؟
هنا غانهدر على الناس لي كايهدروبصوت عالي مع راسهوم, هادوك الناس لي كايتحاورو و يفكرو ويتناقشو غي مع راسهوم
أولا, خاصك تعرف بلي هاد العملية في البداية ديالها كاتكون ما بين العقل الواعي و اللاواعي, عادة كانلقاو بلي كانهدرو مع راسنا من شحال هادي ولكن ماعارفينش من ايمتا بالضبط, بحيث هاد العملية فاللول كاتبدا فعقلك اللاواعي و كاتنتاقل لعقلك الواعي
أولا, خاصك تعرف بلي هاد العملية في البداية ديالها كاتكون ما بين العقل الواعي و اللاواعي, عادة كانلقاو بلي كانهدرو مع راسنا من شحال هادي ولكن ماعارفينش من ايمتا بالضبط, بحيث هاد العملية فاللول كاتبدا فعقلك اللاواعي و كاتنتاقل لعقلك الواعي
ولكن واش عادي دير هاكدا؟
الهدرة مع راسك كاتعتابر شي حاجة عالمية لي كلشي عارفها وكيديرها داكشي علاش عندها اسم الحديث مع النفس.أغلب الأبحاث على هاد الظاهرة كانت على أطفال لي العمر ديالهوم مابين 2-7 سنوات. حيث هاد العملية كاتعتابر جزء من النمو ديال الطفل فهاد العمرحيت كاتساعدهوم يتمرنو على الكلمات ويعبرو على باش كيحسو و بالتالي راه شي حاجة عااادية جدا وتدريجيا, كايبدا الطفل يهدر مع راسو بشكل مباشر أكثر فاش كايبغي يعرف كيفاش يدير شي حاجة مثلا فاش كايبغي يحزم السباط تاعو وكايتفكر كيفاش قالتليه ماماه يدير داك نهار, فكتلقاه كايهدر بصوت عالي, ولا كاتقاه تعصب مع شي لعبة وكايهدر غير بوحدو (صعييبة عليا. لعبة خايبة...الخ) .وهادشي هو لي كايمثل التفكير بصوت عالي وبالتالي فاش كاتهدر مع راسي ف راك ببساطة كاتفكر بصوت عالي
وهوما في طور النمو غاتلقاهوم كايدندنو، ولا كايهدرو بصوت خافت ولا كايحركو الشفتين بلا صوت, فداكشي لي كايقولو غادي يتكون على شكل أفكار سواء كان هاد الحديث مع النفس بصوت عالي اولا لا, ف راه كايبني للطفل أفكار و كايرسخها، لي كاتزيد تساعدو فالنمو ديالو. داكشي علاش الا كنتي كاتهدر مع راسك, راك غير كاتفكر بصوت عالي, عكس هاداك لي كايفكر ولكن كايفكر بلا صوت, فالأخير بجوجكوم كاتفكرو ولكن كل واحد وطريقة التفكير ديالو
ولكن بعد المرات ماكاتكونش هاد العملية عادية، داكشي علاش خاصك تمتاحن راسك بحيث هاد الحالة تقدر تتحول للسكيزوفرينيا. ومن الأعراض ديالها، فاش كاتهدر مع راسك ولكن كاتحس بلي شي واحد اخر لي كايهدر معاك، ولا فاش ماكاتقدرش تميز واش نتا لي قلتي هادي لراسك ولا شي واحد كاتعرفو لي قالها ليك, زيادة على الهلوسة والتخيلات
ولكن ماتعتابرش راسك كادير شي حاجة مسطية ولا خايبة, حيث فاش كاتهدر مع راسك راك كاتستافد من بزاف دالحوايج لي يمكن ماتقدرش تستافد منهوم ونتا كاتفكر بلا صوت بهاد العملية كاتخلق تواصل بين عقلك الواعي واللاواعي وبالتالي كاتحكم فالسلوكات ديالك بطريقة سلبية أو ايجابية على حساب نتا شنو كاتقول لراسك. هادشي علاش أول حاجة تقدر تستافد منها فاش غاتهدر مع راسك بطريقة ايجابية هي فبلاصة ماتقول *أنا مكلخ * قول *راني قادر ندير هادشي* مثلا، فاش كادير هاكدا كاتبني الثقة فالنفس، داكشي علاش خاصك تستاغل هاد العادة من جميع النواحي بهاد الطريقة كاتحفز العقل الواعي ديالك يتبنى الأفكار الايجابية لي بطبيعة الحال اتعطي نتائج ايجابية فحياتك وماتنساش بلي فاش كاتهدر مع راسك بصوت عالي كاتعطي لأفكارك شكل موضوعي، بحيث كايزيدو يتوضحو بالنسبة ليك الشيئ لي كايطور من طريقة التفكير و كايخليك تفهم راسك كتر. فمثلا الا باغي تاخد شي قرار صعييب، سد عليك فشي بيت بوحدك، و قول كلشي الأفكار لي فبالك لراسك وحاول ترتب و تحلل لي بان ليك، وغادي تلاحظ بلي الأشياء ولات أكثر وضوح و أخد القرار ولا أقل صعوبة
و أخيرا، فهاد المرة الا كان شي واحد كايهدر بوحدو فطريق، ماشي بالضرورة يكون مسطي ، حيتاش فغالب الأحيان داك الشخص ماكيكونش حاس براسو كايهدر
المصدر 1
المصدر 2
