غالبا غاتكون دوزتي الطفولة ديالك كاتلعب الطرومبية مع صحابك أو كاتلعبي شريطة مع صحاباتك، ولكن إيلون ماسك دوز طفولتوا كايقرا و يعمر راسو و يبيع لعبة سميتها بلاستر ب500 دولار من بعد ماتعلم البرمجة وهو مازال صغير بزاف. سنة 1989، انتقل إيلون من جنوب إفريقيا لكندا اللي قرا فيها قبل ماينتقل لميريكان باش يقرا الفيزيك و الاقتصاد اللي تفوق فيهم، ومشا موراها لوحدة من أكبر الجامعات في العالم - ستانفورد - بهدف يدير الدكتوراه في الفيزياء ولكن خرج من بعد يومين فقط لأن الطموح ديالو المتعلق بالأنترنيت و الطاقات المتجددة و الفضاء كان أكبر من القراية. أسس مع الأخ ديالو موقع Zip2 ثم باعوه لشركة Compaq ب22 مليون دولار، واستثمر 10 مليون دولار كاملة اللي جاتو فشركة X أو PayPal حاليا اللي باعها لإيباي بمليار و نصف مليار دولار واللي غاتجيه فحقو منها 165 مليون دولار، ماغايجبيهاش في البنك بل غايمشي يستثمرها كاملة فشركة SpaceX المنافسة لناسا حاليا في استكشاف الفضاء، ثم شركة Tesla المهتمة بتصنيع السيارات الكهربائية في 2003 و مشات في نفس السياق ديال SolarCity المتمثل في التصدي للاحتباس الحراري، لأن ماسك كايبني المشاريع ديالو على نظرة مستقبلية و الصورة الكبرى و التجليات ديالها على البشر دبا و مستقبلا. طرح فيما بعد فكرة Hyperloop سنة 2013 وهي شركة نقل فائق السرعة، و OpenAI للذكاء الصناعي و أخيرا سنة 2017 The Boring Company اللي بداها غير بالضحك فتغريدة على تويتر كايخاصم على الزحام و خداما دبا في الحفر فلوس أنجلوس. للإشارة، شخصية Iron Man في عالم مارفل السينمائي مبنية على حياة إيلون ماسك. بينما كاتقرا هادشي، إيلون ماسك كايطير الصوارخ، حرفيا.
إعداد : أشرف المغاري
تدقيق : عبداالله الشعيبي
