سلسلة التوعية الجنسية : مشاكل الدورة الشهرية (Menstrual cycle)

سلام الله عليكم أصدقائي، اليوم غانهضرو فالموضوع الثالث من سلسلة التوعية الجنسية، بعدما هضرت فالموضوع الاول على غشاء البكارة، و الثاني على الاستمناء، اليوم الموضوع الثالث على الدورة الشهرية (الطمث) عند الفتيات، غانحاولو ندورو على الموضوع من جميع الجوايه باش كولشي يفهم. المقال طويل، غي قاد الجلسة و تبع معايا 😇

• سلسلة التوعية الجنسية : غشاء البكارة (Hymen) 

• سلسلة التوعية الجنسية : الاستمناء (العادة السرية)

من المعروف أن الدورة الشهرية كاتكون مرفوقة بتغيرات هرمونية، فيزيولوجية و نفسية، هنا غانسولو السؤال : كيفاش كاتوقع الدورة الشهرية ؟ شنو علاقة الدورة الشهرية بالتغيرات الفيزيولوجية على الجسم ؟ و شنو علاقتها بالتقلبات فالمزاج ديال الاناث خلال الدورة الشهرية ؟ 

قرينا فالمدرسة (حصص علوم الحياة و الارض فالثامنة) بلي الدم لي كايخرج بشكل دوري من جسم الفتاة هو بسبب نزيف كايوقع بفعل تمزق بطانة الرحم، يقدر يضرك يكون ضرك خاطرك منين سمعتي هاد المعلومة أول مرة، و لكن هاد النزيف راه دليل على سلامة الجهاز التناسلي الانثوي، كل امرأة عندها خصائص مميزة للدورة الشهرية ديالها : كاين لي عندهم دورة شهرية قصيرة و كاين لي عندهم طويلة، كاين لي عندها نزيف كثير و كاين لي العكس و هادشي على حساب بنية غشاء البكارة و شكل المهبل ديال الانثى و كذلك اتساع الاوعية الدموية ف بطانة الرحم. مع الوقت كل وحدة كاتعرف شنو كايتسناها مرة فالشهر، شحال غايبقى النزيف، و كيفاش داير هاد النزيف، و شحال هو مقدار الالم، و حتى المزاج ديالها ف هاديك الفترة، و لكن شي مرات الالم كايكون أكثر من المعتاد، ولا النزيف ماكيبقاش منتظم بحال الحالات العادية .. و هنا ضروري كل وحدة تسول راسها : "شنو واقع فالجسم ديالي ؟ 😖"

كايستمر الحيض نوغمالمون بين 3 تال 5 أيام مرة كل 28 يوم، و لكن هادي ماشي قاعدة، بحيث كاين لي كايبقا فيها 3 أيام، و كاين لي كايستمر النزيف عندها 7 أيام، داكشي لاش بعض الاناث كايكون عندهم نزيف كتر من الاخرين، هادشي لاش ماخاصهاش تسكت على راسها بخصوص هاد الامر ايلا لاحظت شي تغيير غير اعتيادي فالدورة الشهرية ديالها

• أولا : انقطاع أو تأخر الدورة الشهرية

ايلا شي وحدة انقطعت الدورة الشهرية ديالها ف عمر 25 سنة خطير، بينما وحدة تقطعات دورتها الشهرية ف سن ال50 راه عادي، المرأة ما بين 20 و 30 عام كاتكون فقمة النشاط الجنسي ديالها و الجسم ديالها ديما مستعد للانجاب و واخا هاكاك كايكون عندها احتمال انقطاع الدورة الطمثية ديالها، من ناحية أخرى النساء بين 40 و 50 سنة كايكونو قراب من سن اليأس و انقطاع الدورة الشهرية ديالهم، بحيث أن المبيض ماكايبقاش ينتج هرمون الاستروجين بكمية كبيرة، بحيث كايبدا الطمث ينقص بشكل تدريجي بشكل كامل و هادشي راجع لتراجع الاباضة و انقطاعها كايساوي انقطاع الدم، كاتعتبر المرأة وصلت ل سن اليأس منين كاينقطع الحيض مدة 12 شهر. و من المعروف أن المرأة كاتحبس دورتها الشهرية ف سن 51 سنة فالمتوسط، و كاين حالات منتشرة عند البنات لي كايديرو مجهودات عضلية كبيرة فين كايتقطع دم الحيض قبل مايوصلو ل 51 سنة بسبب الاجهاد، و كاين لي كايتقطع ليهم بسبب الرياضة "الجمباز، ركوب الخيل، و الباليه .." و السبب ديال هاد الانقطاع هو هرموني 100% بحيث أنه منين كاتمارس الرياضة، كايتخلخل انتاج الهرمونات فالجسم و ماكايبقاوش يديرو خدمتهوم بشكل فعال فالتحكم فالدورة الشهرية لي من المعروف أنه عندها سبب هرموني رئيسي، بالاضافة أن فقدان الشهية، أمراض الغدد، اضطرابات الهايبوثلامس Hypothalamus، الارضاع، السمنة، أقراص منع الحمل، التوتر، الخوف، تكيس المبيض (غانهضرو عليه فمقال آخر) ... الخ كلها أسباب ممكن تأدي لانقطاع أو تأخر الدورة الشهرية على حسب كل فتاة.

• ثانيا : الغزارة ديال النزيف .. 

هاد البلان أول مرة نقرا عليه فاش كنت كانبحث باش نكتب المقال، بحيث لقيت أن ماشي كاع البنات عندهم نفس غزارة النزيف، فالمتوسط، الدم لي كاينزل مرة فالشهر الحجم ديالو هو بين 30 تال 35 مل، و الاناث لي عندهم تدفق دم غزير كايخسرو تال 60 مل شهريا ديال الدم .. (ضرني خاطري والله 😐) على أي منين كاتخسري كمية كبيرة ديال الدم، الجسم ديالك غايخسر الحديد لي كان غايدخل فتركيب الهيموغلوبين (المركب المسؤول على نقل الاوكسيجين فالدم) و بالتالي كايجيك فقر الدم، هادشي لاش لا كان عندك نزيف غزير ديال الدم و كايتسبب ليك فالاعياء، ضيق التنفس و مختلف أعراض فقر الدم ف لا بد ما تشوفي شي طبيب لي غالبا غايقول ليك ديري تحليلة ديال التعداد الدموي "La numération formule sanguine" باش يلا فعلا لقا فيك فقر الدم يعطيك شي دوا.
الاورام الليفية لي كاتكون فالرحم (Uterine fibroid)، بعض الادوية، تغيير موانع الحمل الاعتيادية، الامراض الدموية (بحال مرض Von Willebrand disease : مرض وراثي كايخلي الناس لي مراض بيه كاينزفو بزاف فحالة الجرح حيت ماكايتخثرش ليهم الدم)، سرطان الرحم .. كلها مسببات لزيادة غزارة نزيف الطمث.

• ثالثا : آلام الدورة الشهرية

تقريبا هادي هي أهم نقطة فالمقالة كاملة، شي مرات كاتكون آلام الدورة الشهرية متوسطة بسبب انقباض الرحم، و كاينقص الالم مع مرور يوم ولا يومين .. لكن كاين شي حالات لي كايكون فيها الالم شديد بزاف، و ماكاتقدرش السيدة تتحرك من بلاصتها + احساس بالدوخة، الاسهال، الشقيقة، و الام الظهر .. الخ هاد الالم يقدر يكون بسبب الدورة الشهرية En personne او شي مرات كايكون بسبب التهابات فالرحم، بسبب الاورام الليفية، أو اسباب اخرى كايعرفوها الاطباء من التشخيص : ليكوغرافي، أو عن طريق المنظار Laparoscopy.
الدوا كاين و هو عبارة عن مضادات التهابات غير ستيرويدية (Nonsteroidal anti-inflammatory drugs) (من الافضل تجنب الاسبرين حيت كايزيد جريان الدم، و استعمال الباراصيطامول فبلاصتو) و هي مركبات كاتمنع البروستاغليندات فالجسم، و هي مركبات كيميائية كاتسبب انقباض الرحم لي كايوقع بعدا بشكل أولي بسبب انخفاض معدلات البروجستيرون، لي كايخلي الرحم واقف و مع مرور الايام كاينقص المعدل ديالو حتى كاينعدم و هنا فين كايوقع نزول الدم ديال الطمث ... و بداية آلام الدورة الشهرية (قبل من نزول الدم) كاتكون بسبب بداية زعزعة استقرار و أمن الرحم بسبب نقصان الProgesterone.

• رابعا : المشاكل النفسية المتعلقة بالدورة الشهرية

المشاكل النفسية المتعلقة بالدورة الشهرية و ممكن نلخصوها فمتلازمة وحدة و لي هي متلازمة قبل الحيض : Premenstrual Syndrome ممكن توقع بفعل عدة عوامل، من بينها نقص الفيتامين و المعادن (رجعنا للعوامل الهرمونية تاني، تفكرو شنو قلت ليكم على لي كايلعبو الSport) و من أعراض هاد متلازمة قبل الطمث : حب الشباب (فالجبهة غالبا ولا تحت الشفتين)، مشاكل فالنعاس، العيا، الاسهال أولا الامساك، الشقيقة ولا آلام الرأس بشكل عام، ... و هاد الاعراض كاتأدي لمشاكل نفسية بحال التوتر، الهيجان، تقلّب المزاج، نوبات ديال البكاء، القلق والاكتئاب...

إعداد و ترجمة : عبد الله الشعيبي
التدقيق العلمي : فايزة بوخبزة

المصادر المعتمدة أثناء البحث :
المصدر 1
المصدر 2 
المصدر 3 : كتاب Human Physiology: An Integrated Approach الطبعة السادسة - الصفحات : 850 - 890
المصدر 4
المصدر 5