مقدمة السلسلة :
الجنس واحد الطابو من الطابوهات الكثيرة لي عندنا فالمجتمع المغربي، هاد الموضوع حشومة نجبدوه مع ولادنا، آباءنا و أي واحد ماكانتشاركوش معاه نفس الوعي بسبب سياسة "حشومة و عيب" .. هاد السلسلة الهدف ديالها تبسيط المصطلحات و المفاهيم المتعلقة بالجانب الجنسي هرمونيا، فيزيولوجيا، و نفسيا .. و أول بلان غانهضرو عليه هو العذرية و غشاء البكارة 😉
شنو هو مفهوم العذرية (Virginité) ؟
العذرية الجنسية عند المغاربة و غالبية السكان د العالم مرتبطة بالشرف و العرض ديال الأسرة، بحيث أن البنت لي مشات ليها العذرية وسخت شرف العائلة و كدا .. و غشاء البكارة هو الدليل القاطع على أن البنت ماعمرها مادارت شي علاقة جنسية قبل الزواج، و نزول الدم نتيجة تمزق غشاء البكارة لي كايسد المسالك التناسلية ديال الأنثى بعد أول علاقة جنسية هو مصدر ديال الفرحة و الفخر للعائلات .. و لكن شنو هو هاد الغشاء ديال البكارة ؟ شنو الأهمية ديالو ؟ و كيفاش داير أصلا ؟ هادشي كامل غانجاوبو عليه هنا ف هاد المقال.
شنو هو غشاء البكارة ؟
غشاء البكارة هو غشاء عندو طبيعية مخاطية (تعريف الغشاء المخاطي من هنا، تاتسالي المقال و رجع قراه)، هاد الغشاء كاين عند أغلب البنات و كايسد الفتحة ديال المهبل بشكل جزئي.
هاد الغشاء كايرجع التكوين ديالو للمرحلة الجنينية، لي كاتنقسم ل جوج ديال المراحل : مرحلة مامحددش فيها الجنس، و مرحلة التمايز الجنسي (Sexualization) ;
المرحلة الأولى : الجنين كايكونو عندو جوج بنيات خلوية سميتهم : قناة مولر (Canal de Müller) و بنية خلوية أخرى سميتها : قناة وولف (Canal de Wolff)، و المرحلة الثانية كاتكون البطلة ديالها هي الافرازات الهرمونية ديال الجنين اللي كاتحدد الجنس ديالو، بحيث لا كان الجنين أنثى قناة مولر كاتطور باش تعطينا جهاز تناسلي أنثوي و قناة وولف كاتموت و تعطينا جليدة صغيورة سميتها غشاء البكارة. و ايلا كان ذكر، قناة وولف كاتطور باش تعطينا جهاز تناسلي ذكري و قناة مولر كاتموت و تكمش و تعطينا عضو سميتو الحويصلة المنوية لي كاينة عند كاع الذكور.
غشاء البكارة ماشي عضو تناسلي أنثوي و إنما محسوب من الأعضاء لي معندهاش دور ف الدراسات الجنينية بحيث كايتعتبر عضو بدون دور ف جسم الانسان بحال ضروس العقل، و الحلمة عند الذكور.
أنواع غشاء البكارة
غشاء البكارة فيه أنواع و أشكال مختلفة على حسب كل بنت، و لكن غانبينو ليكم أكثر أنواع الأغشية شيوعا :
غشاء البكارة الطبيعي :
هادا هو لي كاين عند أغلب البنات، و هو لي ماكايخلقش مشكل للأنثى أثناء الدورة الشهرية بحيث أن دم الحيض و البطانة الميتة ديال الجنين كايخرجو بلا مشاكل، و نسبة النساء لي كايتولدو ب هاد النوع د الغشاء هي 53%
غشاء البكارة المسدود
هاد النوع ديال الأغشية هو لي كايخلق مشكل للأنثى أثناء الدورة الشهرية ديالها بحيث التجمع ديال الدم بسبب أن فتحة المهبل كاتكون مغطية بغشاء البكارة كايسبب آلام حادة فالبطن، و أسفل الظهر، العلاج ديال هاد الحالة كايكون بعملية جراحية صغيرة كايتفتح من خلالها ثقب فالغشاء باش يدوز دم الطمث بلا مشاكل.
الغشاء لي فيه ثقب ميكروسكوبي
هاد النوع تا هو كايخلق مشاكل للأنثى لأن الدم ديال الدورة الشهرية كايدوز بشوية بشوية، الشيء لي كايسبب آلام و مشاكل كاتعيق ممارسة الأنثى لأي علاقة جنسية بهاد الغشاء، و العلاج كايكون ب جراحة مصغرة على مستوى هاد الغشاء.
الغشاء الحاجزي
كيفاش كايوقع التمزق ديال غشاء البكارة ؟
هنا كاتوقع المغالطة الكبرى عند أغلب الناس، بحيث أن غشاء البكارة ماكايتمزقش غير خلال العملية الجنسية الاولى، و إنما يقدر يتمزق حتى بفعل نشاطات أخرى بحال رياضة الجمباز، ركوب الخيل، پيكالا .. موطور .. الخ أو باستخدام Tampons ديال الدورة الشهرية ..
بالنسبة للنزيف ديال غشاء البكارة ممكن يوقع أو مايوقعش بعد التمزق ديالو، حيت كل غشاء و كايختلف على الاخر من ناحية عدد الشعيرات الدموية (ممكن يكونو قلال أو منعدمين أو يكونو كتاار) دونك شي مرات ممكن البنت تخسر الغشاء ديالها بسبب شي رياضة معينة بلا ماتحس ب شي حاجة بحكم أنه ماعندهاش شعيرات دموية فالغشاء ديال البكارة ديالها.
واش النزيف خلال أول عملية جنسية دليل على العذرية ؟
قديما كانو كايقولو بلي النزيف خلال أول عملية جنسية دليل على العذرية، و غياب النزيف كايدل على أن المرأة فايت دارت شي حاجة من قبل .. الدراسات ماكاتدعمش هاد الهضرة بشكل دقيق، حيث أن ف 1998 تنشر ف المجلة العلمية البريطانية كايعطي احصائيات ديال 63 فالمائة د النساء ماوقعش ليهم نزيف خلال الممارسة الجنسية الاولى، و المبرر العلمي ديال هاد الحالة هو أن الغشاء مافيهش أوعية دموية كافية باش يتم النزيف، أو الغشاء صغير بحيث ماكايبانش النزيف، أو الغشاء ماكاينش أصلا بسبب العوامل التطورية خلال فترة التمايز الجنسي.
باش نختم، غانهضر على الممارسة الجنسية الأولى و الدور ديالها ففقدان العذرية ف من الممكن أن الانثى تكون خايفة و كاتسنى هاداك الدم ينزل الشيء لي يخليها تقوم بتزييف النزيف، كما أن الاسترخاء يمكن يساعد فمرور العملية على خير، لأنه كاين خرافات كاتروج لآلام فقدان الغشاء د البكارة، الشيء لي كايخليها تحس بالرهبة، ف كيما قلت ليكم يمكن أنها تفقدو بلا ماتحس بوالو، و لا قريتو مزيان يمكن ليكم تستنتجو بلي غشاء البكارة ماشي دليل على عذرية المرأة، و بالتالي فالثقة بين الزوجين أحسن طريقة لاكتشاف هاد الامر، بالاضافة أن جلدة صغيورة ماعندها تا دور مايمكنش تحكم على عفة و شرف عائلة كاملة، نتلاقاو ف الموضوع القادم أصدقائي.
إعداد : عبدالله الشعيبي
تدقيق : أشرف المغاري
المصادر المعتمدة فالبحث :
