كلنا كانعرفو بلي اناس "المؤدبين" ماكايدويش بزاف على راسهم. و الا جاب الله و دواو، كايدويو غير على المواضيع للي كاينة في الصحف ولا كاىسولو الآخرين على شي مسائل غير شخصية... و هادشي كامل خشية ان الطرف الآخر ينعتهم بمتكبرين.
و لكن هاد السلوك او هاد الطريقة كايفشل باش يميز بين الطرق المتاحة باش كل واحد يدوي على راسو. باش دوي على راسك راه ماشي شي حاجة خايبة، و خاصك تعرف بلي ماشي الكم ديال الهضرة هو للي كايحدد واش دويتي على راسك مزيان ولا لا... و لكن الطريقة للي دويتي بيها على راسك هي النقىطة الاهم في هادشي كامل.
دابا غادي تقرا مزيان هادشي للي غادي نقول و غادي تركز معايا. كاينا واحد الطريقة خاصة للي ديما كاتصلاح، اذا بغيتي دوي على راسك، باش تكسب اصدقاء جداد، و باش تعجب هادوك معامن كادوي، و باش تبان طريف و قلبك كبير للمخاطبين ديالك: هي الاعتراف بالخطأ و بالضعف. ملي الواحد كايسمع بلي راك حزين، ولا بلي كانت الغلطة ديالك، ولا بلي راك وحيد، و لا بلي شي واحد خانك، و لا شي بلان طريف ولا حزين وقع ليك... هاداك للي كاتكون كادوي معاه كادخل ليه لخاطرو، و ماكاينش شي حاجة يقدر يسمعها منك احسن من هادشي.
ماتييقتيش؟ غادي نفسرها ليك غير بالخشيبات: عقلتي داك النهار ملي كنتي كادوي معا ديك الدرية، و عاودتي ليها داك البلان للي طرا ليك في الحمام ملي زلقتي، و لا ملي مشا عليك القطار، و لا ملي تبعك كلب و بديتي كاتغوت بالخلعة؟ و عقلتي ملي عاودتي ليها داك البلان ديال ملي حاميتي بوحدك 10 ديال الشفارة؟ و لا ملي هزيتي جوج بوطات ب يد وحدا؟
في نظرك، امتا عجبتيها بزاف، واش ملي زلقتي في الحمام ولا ملي غلبتي 10 ديال الشفارة؟ فكر فيها!
الناس هادشي للي باغين يسمعو، كيف كانو اناث كيف كانو ذكور. و لكن للي خاصك تعرف هو ان هادشي ماكايلمحش للطبيعة الشريرة ديال الكائن البشري قدما كايوحي للطرف للي كايسمع منك داكشي انه ماشي بوحدو للي كايفشل، و انه ماشي بوحدو للي عندو مشاكل، و انك نتا فتحتي قلبك ليه ملي عاودتي ليه على الطرائف للي وقعو ليك و حتى المشاكل للي كايخليوك تكون حزين، و بالتالي كايتعاطف معاك... و في نفس الوقت كايطمأن بلي راك مافايتو بوالو و ماشي حسن منو. و بغيتي ولا كرهتي، هادي الطبيعة البشرية، و حتى نتا ماغاتبغيش شي واحد يجي يبدا يعاود ليك على المغامرات ديالو في مواجهته مع 10 ديال الشفارة ولا مع داك الكلب للي شدو من رجليه و بقا كايدورو في السماء حتى لاحو حيت كان باغي يعضو... العلاقات الثنائية ماكاتمشيش هاكا.
حيت ملي وسائل الاعلام (ماشي قنوات TNT) كاتبقا ديما كاتوريك قصص ديال ناس ناجحين في حياتهم ماديا و عاطفيا و اسريا الخ... و كايجي جارك كايبدا يعاود ليك على ولدو للي جا الاول في المدرسة و كايجي صاحبك يبدا يحكي ليك كيفاش حتى تصاحب مع 7 ديال الدريات في نهار. كاتولي عند حساسية من انك تزيد تسمع شي واحد كايىدوي على راسو بفخر و تكبر، و نفس الشيء كايوقع للآخر للي كادوي ليه على راسك.
انا عارفك بلي كادير بزاف ديال الجهد، و كاتختارع قصص، و كاتزيد شوية ديال ''الملحة" في الاحداث للي وقعو ليك باش تبان مجهد. و لكن للي مضحك و واقعي و صحيح هو انه الفشل و الطرائف هم للي كايجذبو بنادم ليك. كيفما قلت ليك، عاود على نهار زلقتي في الحمام، و على نهار حصلك الاستاذ كاتنقل، و نهار ديك الدرية للي كنتي كاتبغيها قالت ليك نتا ماكاتعجبنيش، و نهار طحتي من فوق الحصان... الخ.
حاجة عادية انك تقول بلي الاعتراف بهاد النوع من الاشياء يقدر يكون خطير عليك نتا. الناس يقردو يضحكو عليك، يقدرو يطلعوها عليك، و لكن هادا هو الهدف. كانتقربو للناس بلي كانعتارفو لغرباء باشياء للي تقدر تصب علينا واحد الاحتقار، علاش؟
هانا غانشرحها ليك حتى هي بالخشيبات: الصداقة الحقيقية هي واحد الاعتراف للي ماكايوقع حتى كايتم التبادل ديال شي حاجة ثمينة بين الاطراف المعنيين بها، و هاد الحاجة الثمينة هي داك المشكل ولا ديك النكتة للي كاتعاود على راسك.
اذا كنتي من دوك الناس للي نهار كايتلقاو ليهم الشفارة كايجمعوهم كاملين في ضربة النمر الاسود باش الغد ليه يمشي يعاودها لصحابو باش يبان فشكل، خودها من عندي كنصحية اخوية: راه دوك صحابك ماكايزغلوكش ملي كاتمشي من حداهم بالنميمة، و ماكايتيقوكش، و كاتمرضهم، و ماكاتبينش راسك واعر... يعني ببساطة كاضيع الجهد على والو.
راني داوي معاك من نيتي، خود الحياة بتواضع، و ماتنفخش بزاف حيت تقدر تفرقع و ماتلقاش شكون للي يجمعك.
Source: The School Of Life.
