أولا قبل ما نبدا : *Spoil Alert* من الأفضل ماتقراوش قبل ماتفرجو فالمسلسل
سلسلة كتب "a song of fire and ice" ديال جورج رايموند ريتشارد مارتن من أنجح سلاسل الكتب فالوقت الحالي خصوصا بعدما تحولات لأحد أشهر المسلسلات التلفزية ف التاريخ، سلسلة لعبة العروش - Game of Thrones.
هاداك العالَم لي ختارعو جورج مارتن كايتعتبر من بين أعقد العوالم الخيالية، بمعنى ماشي بالضرورة تكون القوانين الطبيعية و العلمية و القيم الأخلاقية ديال كوكب الارض هي نفسها ديال عالم GOT، حنا ف هاد المقال غانهضرو على ظواهر هاد المسلسل بمنطق علمي، يمكن لينا ندرسو الموت ديال شخصيات المسلسل، المناخ، و الظواهر الطبيعية حتى هي 🐲
الفصول ف كوكب Game of Thrones فهاد العالم الفصول مسطيين شي شويا، بحيث أنه فصل الشتاء كايبقا سنين طويلة، و فصل الصيف تا هو نفس الشيء، بحيث أن تتابع و مدة الفصول كاتغير بشكل عشوائي، بينما ف كوكب الارض تتابع الفصول كايوقع بسبب الميلان المحوي ديال الارض، بحيث يا إما كاتكون بعيدة ولا قريبة من الشمس الشيء لي كايخلي تتابع الفصول يوقع، بينما ف عالم لعبة العروش، مامعروفش شنو سبب تتابع الفصول و استمرارها مدة طويلة من الزمن.
المتابعين ديال المسلسل حاولو يديرو فرضيات كاتفسر هاد الظواهر و لكن غالبا هاد التفسيرات كايتم تجاهلها أسرع من الولاء ديال ثيون جريجوي 😂
الفرضية الاولى : عالم ويستروس كانو عندو جوج ديال الأقمار، و لكن بسبب انفجار واحد منهم تأثر محور ميلان الكوكب بسبب غياب جزء من جاذبية القمر، و لكن للأسف هاد الفرضية بااينة غالطة لأن جاذبية الكوكب هو لي كاتأثر على القمر، ماشي جاذبية القمر لي كاتأثر على الكوكب.
الفرضية الثانية : الفرضية الثانية كاتقول أن الكوكب ماعندوش مدار دائري حول النجم (الشمس) و إنما عندو مدار بيضاوي، هاد الفرضية ممكن تكون صحيحة نسبيا حيت كاتفسر لينا طول الفصول، و لكن ماكاتفسرش لينا علاش التغير فالفصول كايوقع بشكل عشوائي.
الفرضية الثالثة : هاد الفرضية كاترجع عشوائية الفصول لكون كوكب لعبة العروش كاين ف نظام شمسي فيه جوج النجوم، حيث أن الكوكب كايدور حول هاد جوج نجمات و فنفس الوقت هاد النجوم كايدورو على بعضياتهم الشيء لي كايسبب عشوائية تتابع و مدة الفصول ف هاد العالم الخيالي.
الفولاذ الفاليري - Valyrian Steel، حسب القصة، هاد الفولاذ كان كايتصايب ف مملكة فاليريا القديمة باستخدام اللهب ديال التنانين، بحيث هاد النوع د الفولاذ قوي كتر من الفولاذ العادي و خفيف عليه، هاد الفولاذ ولَّا قليل بزاف بحكم دمار و موت تنانين مملكة فاليريا، هاد النوع ديال الفولاذ كايفكرنا بالفولاذ الدمشقي لي كان كايتصايب قبل ما يتم غزو دمشق من طرف المغول ف القرن 15 بحيث هاد الفولاذ كايشبه فالوصف ديالو للفولاذ الفاليري لي كايتصايبو بيه السيوف ف لعبة العروش.
التنانين 🐉، حنا كاملين عارفين بللي التنانين هي كائنات أسطورية، بحيث أن علم الفيزياء مازال كايتعارض مع فكرة تواجد كائنات كاتخرج العافية من فمها، و لكن كاين واحد اليوتوبر ميريكاني سميتو كايل هيل حاول يفسر كيفاش التنانين كايصنعو لينا العافية، بحيث أنه التنانين كاياكلو الحجار و العافية ضونك ممكن يغلفو سنانهم بهاد المعادن و يعطيونا الشرارة لي تشعل النار و تخرج من فم التنين، و لكن الفيزيك و علم التطور مازال واقفين فوجه تواجد التنانين لجوج د الاسباب، أولا التنين مايمكنش يطير بسبب ان العظام ديالو مافيهاش تجويفات (لي قرا شويا Biologie Animale فلافاك غايفهمني) و السبب الثاني هو أن أكبر كائن معروف كان قادر يطير هو Pelagornis sandersi لي الاجنحة ديالو كانو كايوصلو ل 7 متر ديال الطول، لي كايتعتبر والو بالمقارنة مع التنانين ديال Daenerys Targaryen لي كايبقاو غي غاديين و يكبرو.
الموت ف عالم Game of Thrones، من بين أسباب شهرة المسلسل هي طرق الموت ديال الشخصيات الرئيسية فالمسلسل، بحيث كاين لي حرقوه التنانين و هو حي، و كاين لي فرشخو ليه الجمجمة ديالو ... هاد طرق الموت استمرت حتال الحلقة الاخيرة من الجزء الخامس لي خلات بنادم حال فمو من الوحشية ديال المسلسل و الشخصيات ديالو، و كايبقا التساؤل واش هاد طرق الموت ممكنة علميا ؟ ولا غير ف كوكب صراع العروش ؟
- نبداو ب Viserys Targaryen، كلنا عارفين بلي هاد السيد هادا قاسي بزاف و شحال من واحد فرح بالوفاة ديالو، بحيث مات بتاج ديال الذهب السائل، علميا درجة ذوبان الذهب الخالص هي 1064 درجة سلسيوس، و لي هي درجة حرارة صعيب توصل ليها العافية .. بينما ممكن نذوبو الذهب ايلا كان مخلط بالرصاص بدرجة حرارة النار العادية.
تاريخيا، ماتعدم حتى شي واحد بهاد الطريقة، و لكن الامبراطور الروماني فاليريان الاكبر لي شرب الذهب السائل و مات بيه ف سنة 260 بعد الميلاد.
- ندوزو للعرس البنفسجي، من أكفس البلانات لي ممكن تفكر فيهم لا كنتي ف عالم لعبة العروش هي تحتفل ب شي عرس، ف هاد الزفاف هادا غايموت الملك المحبوب جوفري متسمم ب The Strangler، هنا نطرحو السؤال، واش كاين شي سم كايدير نفس الاعراض لي وقعو ل جوفري ؟ وي كاين بحال هاد السم و سميتو Cyanide أو السيانيد، بحيث أن سيانيد البوتاسيوم لي كاين فالنبات بحال The Strangler و كايعطي أعراض مشابهة ل داكشي لي وقع ل جوفري باستثناء خروج الدم من العينين 😇
و أخيرا ندوزو ل Oberyn Martell لي الوفاة ديالو حطمات الآمال ديالنا بحال كيما تفرشخات ليه الجمجمة ديالو، و السؤال هنا، واش ممكن تتهرس الجمجمة بهاديك الطريقة، فالحقيقة لا بغيتي تهرس لي شي واحد راسو مايمكنش تهرسها بحال The Mountain لأن الضغط خاصو يكون من الداخل ل برّا ماشي العكس، و خاصها شي حاجة أقوى من The Mountain لأن الجمجمة خاصها قوة ضغط كبر من 700 كيلوغرام، الشيء لي مستحيل يكون فكائن .. بشري..
الحيط (The Wall)، هاد الحيط لي كايحمي شمال ويستروس من اللخر مستحيل يكون شي حيط بحال هاكا فالعالم الواقعي لأنه حيط الطول ديالو 700 ميل (1000 كيلومتر تقريبا) بحيث أن الثلج لي كايتكون منو هاد الحيط غايذوب بسبب الوزن ديالو.
الWildfire، فاليونان القديمة كانت واحد النار متكونة من الكبريت و النفط و كانت كاتعتبر من أخطر الاسلحة فهاداك الوقت، الكاتب جورج مارتن نقل هاد الخاصيات للWildfire او النار الهائجة لي تسببت ف حرق الطاقم ديال Stannis Baratheon و هوما أحياء فالسفن ديالهم، بحيث أن هاد الوايلد فاير ممكن تبقى شاعلة واخا تخشى فالماء.
Milk of the Poppy، هاد اللعيبة باقية لحد الآن بحيث أن Poppy هو نبات الخشخاش لي كايتعتبر مصدر ديال مخدر الأفيون و كذا ديال بعض المهدئات بحال الهيروين و المورفين.
و أخيرا Dire Wolves، هاد الكائنات كانت حية ف كوكب الارض فالزمن الماضي و لكن انقرضت مع الوقت، و كانت منتشرة ف القارة الامريكية وكاتعتبر هي أكبر فصيلة ديال الذئاب عاشت ف التاريخ.
باش نختم، بغض النظر على التفاوت بين العالم الحقيقي و العالم ديال صراع العروش، لي فيه يا تربح، يا تموت، كاتبقا من بين السلاسل المؤثرة فالتاريخ، و كيما كيقول الكاتب الأمريكي Raymon Chandler :
“The truth of art keeps science from becoming inhuman, and the truth of science keeps art from becoming ridiculous"
تدقيق : يوسف نظام
إعداد : عبدالله الشعيبي
المصادر المعتمدة فالبحث و الكتابة :
المصدر الخاص ب التنانين
المصدر الخاص ب وفيات المسلسل
المصدر الخاص ب ذئاب عائلة ستارك
