الإنسان كيفما كانعرفو كاملين كائن اجتماعي تايعيش داخل جماعات من ناس خرين بحالو، الشي لي
كايخلق واحد الرواج فالحضية و الإنتقادات، داكشي علاش الواحد ديما تايبغي يكون
مثالي سوا من الداخل أو الشكل الخارجي باش يثير الناس لي ضايرين بيه أولا غير باش
يرضي راسو و يكون مرتاح نفسيا.
و لأهمية
الشكل الخارجي فخلق واحد النوع من الراحة النفسية ختارينا نهضرو ليكم فهاد المقال
بطريقة علمية على الفورما.
سوا كنتي
بنت ولا دري، غليظ ولا رقيق إيلا تبعتي هاد الطرق غاضرب فورما واعرة بطرق بسيطة.
و لكن أهم حاجة
قبل ماتبدا تقرا هي تكون مستعد نفسيا و عندك الرغبة فالتغيير و عزم على التطبيق.
فحالة كنتي غليض(ة) :
أول حاجة
هي تتأكد بلي راك نيت غليظ(ة) و هادشي عن
طريق BMI [مؤشر كتلة الجسم] و هو واحد
العملية حسابية بسيطة [كاتشد الوزن ديالك و كاتقسمو على مربع
الطول]
مثال : واحد السيد عندو 95 كيلو
فالوزن و 1،7 متر فالطول.
95kg / (1,7m × 1,7m ) = 32,8
هاد السيد دابا كايعاني من سمنة خفيفة حيت
حسب هاد التصنيف جا بين 30 و35
من 25 حتال 30 ---> زيادة فالوزن
من 30 حتال 35 ---> سمنة خفيفة
من 35 حتال 40 ---> سمنة متوسطة
أكثر من 40 ---> سمنة مفرطة
ملاحظة : إيلا كان التصنيف ديالك كثر من 40 من الأحسن
شوف ليك شي طبيب.
إيلا لقيتي
التصنيف كثر من 25 عرف راسك كاتعاني من زيادة فالوزن أو
السمنة أما إيلا لقيتيها قل تسنا نوبتك.
دابا ندوزو
للطرق لي تخليك تنقص الوزن:
1- أول حاجة و أهم حاجة هي تشرب الما بزااف و بانتظام.
نعطيك مثال
: كي تفيق الصباح قبل ماتفطر بنص ساعة شرب لتر من الما و قبل ماتغذا بنص ساعة
شرب لتر من الما و قبل ماتعشا بنص ساعة شرب لتر من الما.
هادي من
أحسن الطرق لي تهنيك من الغلظ و بتكلفة قليلة و إيلا تبعتيها ماغايوقعش عندك شحال
من مشكل فالجسم ديالك بحال جفاف البشرة و القصور الكلوي و غيرهم.
ملاحظة: ممنوع تشرب الما خلال الأكل، يا قبل الأكل بنص ساعة، يا من بعد بساعة.
2- تركز على التغذية الصحية :
التغذية
الصحية ضرورية و لكن ماشي جميع الفواكه و الخضر صالحين ليك، داكشي علاش خاصك تقلل
الفواكه لي فيهم السكريات بزاف الخضر لي فيهم النشويات بحال بطاطا، و فالمقابل
يمكن ليك تاكل حب الملوك، التفاح، الليمون أو البرتقال، مطيشة، الخيار، الخس،
البقوليات، بياض البيض... أما بالنسبة للحوم الحمراء خاصك تقلل منهم
مااا أمكن و تركز على الدجاج و الأسماك. و يمكن ليك
تشرب الحليب و أتاي و بعض العصائر و لكن ماشي بكثرة.
دابا عرفنا
النوع تالماكلة لي خاصك تاكل ولكن خاصك كيف تنظمها و طيبها، أهم حاجة تبعد على
ليدام (المرقة كمثال) و تعتامد على التفوار و السليق أما
بالنسبة لعدد تالوجبات ف يكفي جوج فالنهار (فطور و غذا) وإيلا كان فيك الجوع و ماقديتيش تصبر زيد ياغورت فالعشا بشرط يكون الوجبات
لخرين متكاملين و فيهم داكشي لي تحتاج من الفيتامينات و البروتينات و الكالسيوم و
الفوسفور ...
ملاحظة: من أخطر الأخطاء لي كايديروهوم الناس لي
باغين يرقاقو هو كايقطعو الماكلة دقة وحدة و هادشي كايأثر على صحتهم و يقدر يجيب
أمراض خرين، بمعنى خاص الواحد ينقص عدد الوجبات تدريجيا.
3- التمارين الرياضية المنتظمة :
فاش غاتسمع
الرياضة غايطيح فبالك لاصال و المصاريف و كدا، و لكن لا، حتى إيلا مكانوش عندك
الإمكانيات ممكن دير الرياضة، ياك غير عندك يدين و رجلين و أرض الله واسعة، كل
نهار خصص وقيت فالصباح خرج و تمشا و جري و دير الحركات عطا الله الجرادي و الغابات
الحمد لله، وحتى إيلا لقيتي مشكل فالحركات الأنترنيت راه يفك ليك هاد المشكل. هادي من واحد الناحية أما إيلا عندك إمكانيات دير لاصال خاصك غير تلتازم
بالمواعيد.
ملاحظة: إيلا كنتي كادير الرياضة و ماكتشربش الما
مزيان عرف راسك غير كاتكب الما فالرملة حيت باش يتحولو دوك الدهون للسكريات ضروري
خاص الما يكون فالتفاعل و هاد الما ماتشربوش ونتا كادير الرياضة خاصك تشربو قبل
بنص ساعة و من بعد بنص ساعة (تقدر تشرب جغيمات قلال ونتا كادير الرياضة
و لكن ماتكترش)
إيلا تبعتي
هاد النصائح مانخافش عليك، أكيد غاتنقص فالوزن و لكن خاصك المداومة و التطبيق.
فحالة كنتي رقيق(ة) :
أول حاجة
خاصك تأكد بلي راك فعلا رقيق بواسطة مؤشر كتلة الجسم BMI [ الطريقة
راه تذكرات فاللول]، من بعد مادير ديك العملية الحسابية
كاتقارنها بهاد التصنيف :
أقل من 15 ---> نقص حاد جدا
من 15 حتال 16 ---> نقص حاد
من 16 حتال 18،5 ---> نقص في الوزن
ملاحظة: إيلا كان التصنيف ديالك أقل من 15 من الأحسن شوف ليك شي طبيب.
إيلا لقيتي
تصنيفك بين 15 و 18،5 راك كاتعاني من نقص فالوزن و دابا ندوزو للطرق لي تخليك تزيد فالوزن :
1- التغذية الصحية
فحالة
بغيتي تزيد فالوزن مسموح ليك تاكل جميع أنواع الخضر و الفواكه و تركز على الأنواع
لي فيهم نسبة كبيرة تالكربوهيدرات و الكالوري بحال الأفوكا، الفواكه الجافة،
التمر، الشريحة، البانان، العنب، المانجو و بطاطا. ويمكن ليك
حتى اللحوم الحمراء، الأسماك، البيض، الشكلاط، العصائر، الأجبان و الفول السوداني
و غيرهم (ولكن كول و قيس).
من بعدما
عرفنا النوع تالماكلة اللازمة، دابا خاصك تنظمها،و بمعنى آخر تحدد القياس
تالكالوري لي خاصك تاكل فالنهار و تبقا كاتزيد تدريجيا أما بالنسبة لعدد الوجبات
خاصك تلتازم بربعة (فطور، غذا، كاسكروت، عشا).
ملاحظة: ماتبقاش عاطيها للسكريات و الذهنيات لا تصدق مريض بشي علة
2- التمارين الرياضية المنتظمة :
غايبان
ليكم بلي أغلب الماكلة لي ذكرت قبيلة عامرة سكريات و نشويات و كالوريات داكشي علاش
خاص تكون كادير الرياضة حتا هي باش ماتزادش فيك غي الكرش، و كيفما قلت فالأول إيلا
مكانوش عندك الإمكانيات ماشي بالضرورة دير لاصال حيت تقدر تخذم الحركات غي بوحدك و
راه كاينين فيديوات فيوتوب كايوضحو هادشي. إيلا كنتي
دري كاتخذم على العضلات و إيلا كنتي بنت كاتخدمي على الأرداف و الصدر، و فجميع
الحالات الكرش ماخصهاش تكون.
ملاحظة: ضروري خاصك تشرب الما إيلا كنتي كادير
الرياضة بنفس الطريقة لي قلت فالأول
فحالة كنتي معتدل(ة) :
أول حاجة
خاصك تأكد بلي راك فالقياس المناسب و هادشي كيفما قلت فالأول و الثاني عن طريق BMI و إيلا لقيتي التصنيف ديالك
من 18،5 حتال 25 ---> راك فالوزن الطبيعي
فهاد
الحالة مكاينش الإشكال و لكن عنداك يغرك الشيطان حيت حتا نتا ممكن شي نهار تغلاظ
ولا ترقاق داكشي علاش خاصك تبع تغذية متوازنة و متكاملة مع شوي تالرياضة.
دابا الطرق
كاملها بين يديك خاصك غي تحيد العكز لي فيك و تنوض تطبق، حيت الأمر مافيهش شي حاجة
لي صعيبة بزاف و مع الولف كايولي كلشي ساهل.
(لي مابغاش
كايلقا المبررات و لي بغا كايلقا الطرق)
المصادر المعتمدة :
