المنافع ديال حليب سراق الزيت

حاجة غريبة تقرا بحال هاد العنوان و بالاخص حنا المغاربة كانعرفو غير حليب البقر اولا الماعز و لكن الحاجة لي ماعارفينش بزاف د الناس هي من الممكن اننا نخرجو حليب من الحشرات و ماشي اي حشرة بل هي اكثر حشرة مكروهة عند المغاربة و لي هي الصرصور اولا كيفما كانقولو ليه كاملين سراق الزيت
أول سؤال غيطيح عليك من بعد ما تقرى العنوان هو : واش سراق الزيت كينتج الحليب أصلا ؟ 

غنجاوبك و نقولك لا

 كلشي بدا بالفضول ملي لاحظ الباحث الشاب ناثان كوسنس ب مختبر الابحاث ف ولاية ايوا الامريكية بلورات لامعة كاتتسرب من امعاء الصراصير لي من بعد غادي يلقا بلي هي بلورات مصنوعة من بروتين الحليب. تقريبا كاين 5000 فصيلة ديال الصراصير   و الفصيلة لي كتهمنا ليوم هي  Diploptera Punctata. 

 هاد الفصيلة لي كاتسما ايضا خنفساء المحيط الهادي هي النوع الوحيد من الصراصير لي كاينتامي ل الثدييات و كاتعيش ف بعض دول اسيا بحال الصين و الهند و فيجي و حتا استراليا. و هي المنتج الرئيسي للحليب و المحور ديال هاد المقال

الأنثى كاتتميز بالقدرة على انها تبقا هازا ولادها داخل الرحم ديالها فعوض ماتحطهوم ف بيوض خارجها ( اخصاب داخلي ) و باش  تغذي الصغار ديالها كاتنتج واحد المادة كريستالية لي كاتتسما " حليب الصراصير "  بحال كيفما كاتوضح الصورة لي من بعد كايتجمعو و يتجففو 

واخا ها حنا عرفنا منين كايجي الحليب و لكن شنو المنافع لي فيه؟

  الحليب لي كاتنتج هاد الفصيلة  أفضل ب 4 مرات من حليب البقر و 3 المرات من حليب الماعز، و السبب لي كايخليه متميز عليهم هو نسبة البروتين و الدهون العالية جدا فيه بحيث من بعد الترشيح كايتكون الحليب من 45 ف المئة من البروتين, 5 ف المئة احماض امينية, 25 ف المئة كربوهيدرات و من 16 حتال 22 ف المئة ديال الدهون، كما أنه ماكيديرش الحساسية بحال حليب البقر حسب باحثين من معهد بيولوجيا الخلايا الجذعية و الطب التجديدي في الهند، كما أن حليب سراق الزيت يُعتبر "الغذاء الصحي المتكامل" بسبب انه كايتوفر على كل الأحماض الأمينية الأساسية
 حاليا نتاج هاد الحليب صعب شيئا ما ولكن العلماء كيقلبوا على طريقة لإنتاج نفس الحليب صناعيا

: المصادر
مصدر 1
مصدر 2 
مصدر 3