شي مرات كاتكون كاتهضر مع شي تيتيزة فالفيسبوك و كاتبداو تلعبو Chaise de vérité باش تعرفو على بعضياتكوم، حتى كاتسولك : شنو هو البرج ديالك ؟ باش تعرف الطباع ديالك، و لكن هنا خاص نطرحو السؤال .. واش هاد الابراج عندهم شي تأثير على حياتنا ؟
أولا باش نمحيوا واحد المغالطة .. علم التنجيم (Astrology) ماشي هو علم الفلك (Astronomy) حيث أن علم التنجيم داخل ف خانة العلوم الزائفة، و علم الفلك هو من شعب الفيزياء التطبيقية، تفاهمنا ؟
علم التنجيم عندو أُسس فعلم الكونيات Cosmology بحيث أن التنجيم قائم على مواقع النجوم و لكن هادشي ماعندوش علاقة بالتصرفات، الطباع و الحظ ديالك ف هاد السيمانة 😉
المنجمين كايشوفو بللي أنا، نتا، نتي، حنا كاملين عندنا برج من الابراج السماوية على حسب تاريخ الميلاد ديالنا، بحيث أن الشمس كاتكون ف هاداك الموضع فالوقت فين كاتزاد نتا، قبل ما نبداو فالقاصح، غانقول ليكم شنو هوما الابراج السماوية لي كايآمنو بيهم المنجمين و الاتباع ديالهم، هاد الابراج هي عبارة عن مجموعات نجمية لي كتدوز منها الكواكب السيّارة، الشمس و القمر لأن أن هاد الأجرام السماوية كايدوزو من الابراج كاملين خلال سنة وحدة. قديمًا الابراج كانت سميتهم "طريق الآلهة" و كانت الكواكب السيارة (بحال : عطارد، الزهرة، المريخ، المشتري، و زحل) و الشمس و القمر هي الآلهة، و من هنا بداو الادعاءات ديال المنجمين بأن هاد الظواهر الفلكية (حركة الاجرام السماوية) عندها تأثير على حركة البشر.
المنجمين كايستخدمو الترتيب التالي فالابراج السماوية :
"الحمل، الثور، الجوزاء، السرطان، الأسد، العذراء، الميزان، العقرب، القوس، الجدي، الدلو، و الحوت"
عقلو على هاد الترتيب حيت بيه غانخدمو، أنا غانتبعهم ف هبالهم و نشوفو فين غانوصلو 😃
 |
| Credit: Starry Night Software |
أولا، الجوزاء ماشي برج سماوي، بينما هو عبارة عن مجموعة نجمية سميتها Orion بالعربية هي مجموعة "الجبار". و الاسم الحقيقي ديالها هاد البرج هو : التوأمان و اعتبارها مجموعة نجمية هو أول خطأ عند المنجمين بحيث أن الترتيب لي قلت ليكم المنجمين كايستخدموه خاطئ، حيت الجوزاء ماخاصهاش تكون هي الثالثة فالترتيب، علاش ؟ هاد الترتيب كان ممكن يكون صحيح ف عام 580 قبل الميلاد، و لكن من ورا هاد السنة هادي خاص يتغير الترتيب بسبب واحد الظاهرة فلكية كاتوقع للأرض. محور الأرض كايتحرك بحركة دائرية بحال الطرومبية (بحال ف التصويرة) ببطئ بسبب تأثير الجاذبية ديال الشمس، القمر، و الكواكب الاخرى خصوصا المشتري، هادشي لاش المواعيد ديال التقويم ديال المنجمين خاطئة دابا، و كان صالحة فقط قبل 2600 سنة من اليوم.
 |
| محور الارض كايتحرك حركة دائرية بحال لي ف الصورة، طول الدورة هو 25800 سنة |
نعطيكم مثال حيت بان ليا ما فهمتو تا وزة، دابا شحال هادي ف العصر ديال البابليين هادي 3000 عام، ففصل الربيع كانت الشمس كاتكون ف برج الثور، و منين جا الاسلام هادي 1400 عام، الفلكيين المسلمين لقاو بلي الشمس كاتكون فالاعتدال الربيعي فبرج الحمل، و فالعصر الحالي الشمس كاتكون فبرج الحوت فالاعتدال الربيعي، دونك هاداك التقويم غير ثابت نعاماس و هاداك الترتيب ديال الابراج خاطئ و راه متغير مع مرور الوقت.
ايلا حسبتو الابراج غاتلقاوهم 12، مزيان هادشي لي عارفينو حنا كاملين، و لكن راني ماكتبتش البرج رقم 13 و لي هو برج الحوّاء (eve)، هاد البرج هادا تزاد بسبب الترنح ديال الارض (هاداكشي لي كنت كانشرح الفوق ديال دوران الارض بحال الطرومبية) و بالتالي لا كان يسحاب ليك نتا برج القوس، الأسد، العذراء .. الخ ف راك غادي غالط، بالنسبة للعصر الحالي كاين واحد التقويم جديد هاهوا غانعطيه ليكم (لا كنتو مازال كاتظنو بلي الابراج حقيقيين) :
الجدي 20 يناير – 16 فبراير
الدلو 16 فبراير – 11 مارس
الحوت 11 مارس – 18 أبريل
الحمل 18 أبريل – 13 ماي
الثور 13 ماي – 21 يونيو
التوأمان 21 يونيو – 20 يوليوز
السرطان 20 يوليوز - 10 غشت
الأسد 10 غشت – 16 شتنبر
العذراء 16 شتنبر – 30 أكتوبر
الميزان 30 أكتوبر – 23 نونبر
العقرب 23 نونبر – 29 نونبر
الحوَّاء 29 نونبر –17 دجنبر
القوس 17 دجنبر – 20 يناير
هاد التوقعات ديال المنجمين كلها جات من الحركة ديال الشمس و النجوم و تموضعها على مدار العام، و كيما شفتو فالأسس ديال علم التنجيم غالطة و منافية للعلوم الحقيقة (الفلك) و جميع هاد التوقعات لي كاتربط نجمة بعيدة عليك ب 4 سنوات ضوئية على الاقل هي مجرد تخيلات بشرية، و علم التنجيم ماعمرو كان جزء من علم الفلك، حيث أن الفلك عندو شعب معروفة و لي هي : علم الكونيات و الفلك النظري و الفلك الرصدي.
تدقيق : أميمة بن يطو
إعداد : عبدالله الشعيبي
تدقيق : أميمة بن يطو
إعداد : عبدالله الشعيبي
المصادر المعتدة هي من المواقع التالية :
