واش السكيزوفرينيا هي الإزدواجية فالشخصية؟ (جوج وجوه؟!)

أغلبيتنا ملي كنشوفو واحد الشخص عندو شخصية معينة وتقلب لشخصية أخرى (يعني كان كيتصرف بواحد الطريقة وأصبح كيتصرف بطريقة مختلفة) أو ملي كيقول جوج ديال الآراء متعارضين بيناتهم فنفس الوقت, كنقولو عليه عندو جوج وجوه وكنعتوه بسكيزو يعني مصاب بالسكيزوفرينيا, وهذا خطئ كبير وشائع بيناتنا لأن السكيزوفرينيا ماشي هي الازدواجية فالشخصية واللي حتا هي ماشي هي جوج وجوه لي كنعنيوها حنا 

اليوم غادي نحاولو فهاد المقال نحيدو الغموض على هاد المفاهيم باش نوليو نستعملوها فبلاصتها.

•  أول حاجة شنو هي السكيزوفرينيا schizophrenia :

 الفصام, أو إنفصام الشخصية كلها مرادفات ديال السكيزوفرينيا, وببساطة شديدة هي حالة مرضية كيكون فيها اضطراب عقلي كبير لي كيأثر على التصرفات وطريقة التفكير ديال المصاب بيها ومكتبقاش عندو القدرة على الاتصال بالواقع.

”إذن المصاب بالسكيزوفرينيا معندوش جوج شخصيات بل عندو شخصية وحدة ولكن تيعيش حالة تداخل بين الواقع والخيال لا شعوريا لأنه تيعيش فعالمين فنفس الوقت عالم الهلوسة والخيال وعالم الواقع.“

هاد المرض منتشر بزاف وكيقيس تقريبا 1% من سكان العالم, ومن بين الأعراض ديالو:

-الهلوسة: بحيث كيسمع المصاب بالفصام أصوات هي فالحقيقة مكايناش ولكن كتهضر معاه إما كتآمرو أو كتهددو, والهلوسة مكتقتصرش فقط على السمع بل حتى البصر بحيث كيبان للمريض أشخاص مكاينينش فالواقع وأشكال وأضواء مختلفة, والجدير بالذكر أن الهلوسة كتشمل جميع الحواس لوخرين الشم والتذوق وحتى الاحساس.

-التوهم: وهي واحد التصورات خاطئة وغير منطقية كيتخيلها المريض بحال مثلا يتوهم بلي هو مراقب و كيتجسسو عليه وتقدر توصل بيه الدرجة يعتقد بلي كيتعرض للضرب والاعتداء.

-اختلال فالتعبير: لأن المصاب مكتكونش عندو القدرة ديال التركيز فكيكون عندو اضطراب فالحديث (كيدخل وكيخرج فالهضرة) ومكايكونش ترابط منطقي فهضرتو وكيدوز من موضوع لآخر بجمل متقطعة وبالتالي كتولي نضرتو غير مفهومة.

كاين العديد من الأعراض الآخرين لهاذ المرض ولكن نكتفي بذكر أهمها فقط

• ثاني حاجة شنو هي ازدواج الشخصية : 

غير باش نتفاهمو راه ازدواج الشخصية مفهوم نفسي وليس اجتماعي, وهي اضطراب نفسي حقيقي ماشي غير وهم أو خيال كينتج عليه امتلاك المصاب لهويتين أو شخصيتن مختلفتين أو أكثر من ذلك (ثلاثة أو أربعة...) ولكل وحدة منها طريقة فريدة فتحليل الأمور والتفكير والتصرف, وكيتم الانتقال من شخصية لأخرى في ضرف ثواني بسبب وجود ضغط نفسي اجتماعي كبير.

 ”إذن المصاب بازدواج الشخصية عندو جوج شخصيات أو ربما أكثر ونتيجة لذلك كيعيش هاد المصاب في صراع دائم بين شخصياته مما يسبب له القلق النفسي والتوتر العصبي الذي قد يتفاقم ويؤدي الى حالة مختلة تساهم في الأكتئاب النفسي والوسواس القهري.“

ومن بين الأسباب ديال ازدواج الشخصية التعرض لإيداء جنسي أو أي نوع من أنواع الإيذاء الجسدي والنفسي فمرحلة الطفولة, والحل الوحيد لعلاج هاذ الحالة هو الخضوع لعلاج نفسي طويل المدى باش تتفرغ الصدمات النفسية المكبوتة فالمريض.

• ثالث حاجة شنو كنقصدو حنا بـ"عندو جوج وجوه" :

غالبا ملي كنبغيو نقولو على شي واحد منافق (عندو جوج وجوه) كنقولو عليه سكيزو أو عندو ازدواج فالشخصية, وهاذا هوا الخطأ لي كنوقعو فيه بحيث حنا دبا أمام ثلاث مفاهيم مختلفة تماما.

السكيزوفرينيا المفهوم الأول لي بعيد بزاف على المفهومين لي بقاو ولي هوا مرض نفسي وعطينا التعريف ديالو الفوق, كيبقا لينا المفهومين ديال ازدواج الشخصية و النفاق لي كنعبرو عليه بـ(عندو جوج وجوه), من اللحضة الأولى فين كتسمعهوم كيبانو بحال بحال تقريبا ولكن الفرق هو أن الأول كيفما سبقلينا وقلنا مرض نفسي وليس اجتماعي, أما الثاني فهو ماشي مرض أصلا (أو نقدرو نقولو مرض مجتمعي) ناتج عن تراكم بزاف ديال التناقضات فالذهن ديال الشخص منذ الطفولة من الأسرة, المدرسة, الشارع... ببساطة السبب ديالو هو التنشئة الاجتماعية الغير سليمة بحيث داك الشخص كيتأثر بالمحيط ديالو فمجتمع كلو كينافق وكيكدب فحتاهو كيولي ينافق باش يقضي المصالح ديالو وخير مثال على ذلك المثل لي كيقول "ايلا كانت حاجتك عند الكلب قولو سيدي" والنفاق كيكون عن وعي تام عكس ازدواج الشخصية والسكيزوفرينيا لي مكيكونوش عن وعي تام من المصاب بيهم.

هكذا غادي نكونو عرفنا الفرق بين السكيزوفرينيا, الازدواجية فالشخصية و النفاق (جوج وجوه).

كنتمنا تكون وصلاتكم المعلومة, سلام.