بانت الاشتراكية في القرن 19م بسبب الظلم و الاستغلال اللي كان كايتطبق على البروليتاريا أو طبقة العمال، لهذا فالاشتراكية ضد الملكية الخاصة تماما، حيت كاتعتبرها الجذر ديال عدم المساواة عكس الليبيرالية (غادي نكتبوا عليها بتفصيل في موضوع قادم) اللي كاتقول أن الملكية شيء طبيعي و عادي.
الاشتراكية كاتنتقد الملكية الخاصة بشدة لأنها في نظرها غير عادلة حيت الثروة كاينتجها عمل و جهد جماعي، و بالتالي خاصها تكون ديال المجتمع و ماشي في يد فئة ضيقة من أفراد المجتمع. بالاضافة على هادشي، الاشتراكيين كايظنوا أن الملكية كاتخلق صراعات و انقسامات داخل المجتمع و هادشي كاتخليه يتفكك، و الحل اللي كايقترحوا النموذج الاشتراكي هو استبدال الملكية الخاصة بملكية عامة و مؤسسي الفكر الاشتراكي: كارل ماركس و انجلز قالوا أن الملكية خاصها تختفي بشكل نهائي و من بعدها يولي مجتمع لا طبقي فبلاصة الرأسمالية.
 |
| ماركس على يسار الصورة، انجلز على اليمين، لينين في الوسط |
هادشي كامل بقا نظري و ماتطبق على أرض الواقع حتال من بعد الثورة البلشفية في روسيا بزعامة لينين، و اللي أطاحت بالنظام القيصري، وغادي يقوم لينين بتأسيس أول دولة اشتراكية في العالم سنة 1917 عن طريق نهج سياسة التأميم و وضع الثروات ديال البلاد في يد الدولة و هاد العملية بقات في تطور باش تكتمل في الثلاثينيات في الوقت ديال حكم سطالين اللي نهج سياسة التخطيط المركزي، و هو واحد النظام اجتماعي كاتتحكم فيه الدولة، و طبق الاتحاد السوفياتي في المرحلة ديال لينين و سطالين شكل من أشكال اشتراكية الدولة.
 |
| علم الاتحاد السوفياتي |
الاشتراكية انتقلت من روسيا لبلدان أخرى خصوصا من بعد الحرب العالمية الثانية اللي تم تقسيم أوروبا بعد 1945 الى معسكرين و بداية الحرب الباردة بين الو.م.أ و الاتحاد السوفياتي:
معسكر غربي رأسمالي بالقيادة ديال الولايات المتحدة الأمريكية و معسكر شرقي اشتراكي بزعامة الاتحاد السوفياتي اللي نشر الاشتراكية في أوروبا الشرقية كاملة وصولا الى ألمانيا الشرقية.
من بعد ماوصلات الاشتراكية لدول أوروبا غادي تقوم ثورة ثقافية في الصين بزعامة ماو تسي تونغ سنة 1949 اللي غادي يقضي على النظام الاقطاعي المبني على نظام العبد و السيد و يصاوب كومونات شعبية و هي عبارة على تعاونيات فلاحية اشتراكية.
 |
| ماو تسي تونغ |
الاتحاد السوفياتي غادي ينهار سنة 1991 من بعد ماطاح جدار برلين سنة 1989 و من بعد غادي تتأسس حركات ثورية تحررية في أوروبا الشرقية كاملة و غادي تتعوض الاشتراكية بالليبيرالية في دول بحال الجبل الأسود و ألمانيا اللي غادي تتوحد من جديد.
 |
| جدار برلين |
للاشارة، الشيوعية وصلات حتال المغرب و تأسس الحزب الشيوعي المغربي لكنه اندثر دغيا بفعل التفوق ديال أحزاب سلفية بحال حزب الاستقلال، ولكن باقا أحزاب اشتراكية بحال الاتحاد الاشتراكي و الحزب الاشتراكي الموحد.
إعداد : أشرف المغاري
