من قبل فسلسلة العظماء هضرنا على نيكولا تسلا وليون الإفريقي ، اليوم غادي نهضرو على واحد الشخصية أخرى عندها أهمية
كبيرة بزاف, اليوم غادي نهضرو على المهندس و الكيميائي و المخترع الفرد نوبل
ألفرد نوبل تزاد نهار 21 أكتوبر 1833 فمدينة ستكهولم بالسويد ، تولد فأسرة مفحالهاش و عندو 8 د الخوت ومن بعد عاش فسان بطرسبرغ اللي نتاقلو ليها هو وعائلتو عام 1842 وتما باه غادي يخدم فصناعة أدوات آﻵت المتفجرات ومن بعد عائلتو غادي تولي القضية دايرة عندهم شوية ويديرو شوية د الفلوس لي بيهم غادي إصيفطو ألفرد باش يمشي يقرا ، ألفرد كان قراي وعندو مع اللغات والكيمياء تاهو كيعرف إهضر بالفرونسي والإنجليزية والألمانية والروسية بالإضافة للغة الأم اللي هي السويدية
ألفرد كان قرا الكيمياء عند البروفيسور نيكولاي زينن وخدم واحد المدة مع جون إريكسون، ونتاقل لباريس فعام 1850 ومنين كمل 18 عام مشى لميريكان باش إقرا الشيمي وغيبقى ربع سنين تما ، خدا أول براءة إختراع ديالو منين ختارع العداد ديال الغاز عام 1857
ألفرد كان مشى واحد المدة لروسيا ومنين رجع مع والديه للسويد غادي يبقى باش يقرا على المتفجرات وعلى الطريقة الآمنة اللي يقدر إستعمل بها النيتروجليسرين. هاد المادة اللي إكتاشفها صاحبو أسكانيو سوبريرو عام 1847
نوبل انتاخبوه عام 1884 كعضو فالأكاديمية الملكية السويدية للعلوم وهاد المؤسسة هي اللي كتختار اللي غادي يربح جوج جوائز من جوائز نوبل اللي وصى بتأسيس ديالها قبل ميموت ، نوبل خدا الدكتوراه الفخرية فجامعة أوبسلا ف 1893 ، وفحياتو كلها نوبل عندو شي 350 براءة إختراع دوليا وقبل ميموت دار 90 مصنع ديال الأسلحة
عام 1863 غادي إخترع نوبل جهاز تفجير وفسنة 1865 نوبل ختارع ( غطاء الباليستينغ ) لي هي كبسولة تفجير ، وفعام 1867 اختارع الديناميت وهي مادة أمنة كثر من النيتروجليسرين، خدا براءة إختراع الديناميت فميريكان والمملكة المتحدة، و الديناميت كيتستعمل بزاف فالتعدين وفبناء شبكات النقل ، عام 1875 غادي يختارع الجلجنيت وهي مادة قوية بزاف و حسن من الديناميت، وفعام 1887 خدا نوبل براءة إختراع الباللستيت
فعام 1888 مات خو ألفرد لودفيج منين كان فمدينة كان الفرنسية ودارت واحد الصحيفة خبر وفاة ألفرد نوبل بالغلط وكعنوان للخبر قالو باللي تاجر ديال الموت, مات ، نوبل معجبوش داكشي لي قالو عليه وتنادم معاه الحال
نوبل كان مسيحي متدين وكان عضو فالكنيسة اللوثرية السويدية ، كان كيسكن فباريس من 1873 حتى 1891 بالرغم من أن الخدمة ديالو فيها السفر بزاف فغالب الوقت كان تيكون بوحدو لحقاش كيعاني بزاف من الإكتئاب ومعمرو تزوج
ف 1891 منين ماتت مو وختو ألفرد غينتاقل من باريس لسان ريمو فإيطاليا وكان كيعاني من الذبحات الصدرية ، نهار 10 ديسمبر 1896 ألفرد نوبل غيموت فدارو بسباب سكتة دماغية
نهار 27 ﻧﻮﻓﻤﺒﺮ 1895 نوبل غادي يوﻗﻊ على الوصية ديالو ﺍﻷﺧﻴﺮﺓ فبارﻳﺲ اللي غيخلي بموجبها جزء كبير من الثروة ديالو لجوائز ﻧﻮﺑﻞ
