في كل مجتمع كاينين وسائل تقليدية أغلبها طبيعية كايتداواو بيها الناس و هادشي راجع لعوامل مادية و معنوية حيت كاين لي كيلجأ لهاد النوع ديال التداوي حيت عندو مدخول مادي ضعيف مايقدرش على مصاريف التداوي الحديث، و كاين لي عندو بعض المعتقدات كايآمن بيهم ولا كايجرب جميع الطرق غي باش يبرا.
من هنا كانلقاو بول و حليب الإبل أو (الجمل) لي
متداول بزاف فالمجتمع المغربي إيلا ماقلناش العرب كاملين، و الأغلبية الساحقة
كاتلجأ لهاد المشروبات طمعا في الشفاء، و من أكثر الناس لي كايشجعو على هاد
الطريقة هو محمد الفايد (دكتور مغربي و أحد الأساتذة الجامعيين السابقين في معهد
الحسن الثاني للزراعة و البيطرة بالرباط) حيت كايقول بلي بول الإبل عبارة عن سائل مافيهش حمض اليوريك (Uric Acid) و هو حمض
حاد كايكون فالبول و ايلا شربو الواحد كايتصاب بداء الحصيات البولية Urinary Stone Disease مقارنة مع
الأبوال الأخري الشيء لي كايجعلو بحال شي عصير مافيهش الريحة و مفيد بزاف وهادشي
راجع للتغذية ديالو على نباتات شوكية كلها طبية بدون منازع، وقال أن المنافع ديال
هاد النباتات كاتخرج كاملها مع البول الشيء لي كايخلي هاد البول يكون مميز.
و ذكر كذلك بلي حليب الإبل الطازج هو الحليب الوحيد لي
فيه الفيتامين (ج) "Vitamin C" وبنسبة كاتفوق هاديك لي كاينة فعصير الليمون (البرتقال).
إيلا كان شي حد أول مرة غايسمع
هاد المعلومات غاتجيه شوية غريبة و غير مألوفة داكشي علاش دار نجيب المختاري (من
رواد تعميم العلوم بالدارجة فالمغرب) مجموعة تالبحوت وفقا لبعض المصادر الموثوقة باش يتأكد
من صحة المعلومات و النتيجة كانت غير متوقعة.
لقا فواحد الموقع متخصص فالبحث
على المقالات العلمية الأكاديمية بلي بول الإبل بحالو بحال البول ديال جميع
الحيوانات الأخرى بما في ذلك الإنسان و بالتالي نسبة حمض اليوريك فبول الإبل
كاتراوح بين 3.6% و 7.4%. المصدر هنا
و لقا كذلك بلي بول الإبل
كايتغدا على جميع أنواع النباتات و ماشي غير هاديك لي فيها الشوك، و حتا هاديك لي
فيها الشوك تقدر تكون مضرة للإنسان و الإبل براصو. المصدر هنا
ومن جهة أخرى أي واحد عندو
معرفة واخا غير سطحية فعلم الأحياء غايعرف جميع الحيوانات كاتحلل داكشي لي كاتاكل
و كاتحتافظ بالمنافع كاملها و كاتخرج الباقي على شكل فضلات. إذن كيفاش غادي يعيش
هاد الإبل إيلا خرج المنافع لي تاياكل؟ المصدر هنا
أما بالنسبة لحليب الإبل لقا نجيب المختاري فأحد
المصادر بلي جميع أنواع حليب الثديات فيه الفيتامين (س) بنسب تقدر تفوق هاديك لي
كاينة فحليب الإبل بنفسها.
و لقا كذلك بلي مقدار الفيتامين
(س) فحليب الإبل كايتراوح مابين 15 مغ حتال 435
مغ فكل لتر، بينما عصير البرتقال فيه أضعاف هاد النسبة بحيت كاتوصل حتال 1.38 غ فكل
لتر. المصدر هنا.
إعداد : أميمة إداعمر
تدقيق لغوي : عبد الله الشعيبي
