شحال من مرة كايطيحو علينا تساؤلات فشي شكل على الحياة و من بين هاد التساؤلات علاش هاد الكوكب السعيد هو الوحيد من بين خوتو فهاد المجموعة الشمسية لي فيه الحياة و علاش بقية الكواكب مافيهومش الحياة ؟ ؟
بفضل الدراسات ديال العلماء قدرو يتوصلو الى ان الحياة فكوكب الارض بدات هادي تقريبا 4 لمليار سنة و كانت كاتقتصر على كائنات دقيقة و هادشي لي غادي يخليهوم يفكرو فمسألة ان الحياة تقدر تكون فكواكب اخرين و مع تقدم العلم و بداية إرسال بعتات فضائية غير ماهولة لمجموعة من لكواكب ديال المجموعة الشمسية غادين يكتاشفو ان هاد الكواكب مافيهاش الحياة و عمرها كانت فيها و هنا غادين يبداو يطرحو مجموعة من تساؤلات و لي من بينها ، علاش بضبط الارض هي لي فيها الحياة من دون هاد الكواكب ؟؟
الحياة على كوكب الارض كاتطلب بزاف ديال العناصر باش تستمر و بعض من هاد العناصر مشتركين بينها و بين مجموعة من الكواكب اخرين و لكن بفعل شي خواص كايمتازو بيها هاد العناصر فهاد الكوكب ،الحياة كاتقدر تستمر فيه و من بين هاد العناصر :
- المجال المغناطيسي
المجال المغناطيسي هو واحد من العناصر المهمين باش تستمر الحياة فالارض بحيت كايحمي الارض من الرياح الشمسية و لي كاتكون محملة بدقائق و جزيئات و شحن كهربائية ضارة و خطيرة تقدر تمحي الحياة من الارض ، و لكن هاد المجال المغناطيسي مكاينش غير عند الارض بوحدها فجميع الكواكب تقريبا عندها مجال مغناطيسي و لكن ماش بنفس الخواص فمتلا الارض و الزهرة كايختالفو فكيفية إنشاء هاد المجال فالارض كاتنتجو من حركة المعادن السائلة فجوف الارض و عن دوران ديالها اما الزهرة فهي كاتنتجو من تفاعل الغلاف الجوي العلوي ( الغلاف الايوني ) مع الجزيئات المشحونة لي جاية من الشمس لكن المجال ديالها كايبقا ضعيف داكشي علاش هاد الجزيئات كاتخترق الغلاف الجوي ديالها و كاتخلي سطح الزهرة غير صالح للحياة بالمرة.
- الحرارة المعتدلة
الحرارة شي حاجة ضرورية للإستمرار الحياة حيت خاصها تكون معتدلة ماكبيرة ما مصغيرة و هادشي لي كاتميز بيه الارض على باقية الكواكب حيت بسباب المسافة المعتدلة لي بينها و بين الشمس قدرات الحياة تنشأ على سطح هاد الكوكب فمثلا إلا خدينا كواكب قريبا للشمس بحال الزهرة او لا عطارد غادين نلقاو فيهم حرارة كبيرة بزاف لي مايمكنش للأي نوع من الحياة إضهر فيها و كذلك متال بالنسبة الكواكب لي بعيدة على الشمس بحال أورانوس او لا نبتون لي الحرارة ديالهم صغيرة بزاف بسباب البعد الكبير ديالهم على الشمس و بالتالي صعيب على الحياة تستمر او تنشأ فمناخ بحال هادا.
- الماء
حنا كاملين عارفين بلي ماء هو من الاشياء لي مستحيل تكون الحياة بلا بيه فهاد الكوكب و لكن الاغلبية كايعتقدو بلي الماء كاين غير فالارض بوحدها و مكاينش فشي كوكب اخر ، إوا حتى نتا إلا كان عندك نفس الإعتقاد نبغي نقول ليك راك غالط ا حبيبي ، الماء كاين فكواكب خرى و لكن ماشي بالحالة السائلة ديالو لي كاتسمح بالحياة فالمسافة الفاصلة بين الشمس و الكواكب الاخرين ( لي دكرت فالعنصر لي قبل ) كتاتر بشكل كبير فالحالة لي غادي ياخدها الماء فاي كوكب فمثلا الزهرة فكيفما قلت قبل ان المسافة لي بينو و بين الشمس قريبة شوية و كاتخلي المياه على سطح هاد الكوكب تاخد الشكل البخاري ديالها بسباب الحرارة العالية لي فيه و إلا خدينا مثلا اوروبا لي هوا واحد من اقمار المشتري غادي نلقاو فيه الماء حتى هو ولكن فسطح كايخد الشكل الجليدي بسباب الحرارة المنخفضة فالسطح ديالو و لي كاتسبب فيها المسافة لي بعيد بيها على الشمس.
- الغلاف الجوي
الغلاف الجوي كيفما كانعرفو انه كايحتوي على نسبة مهمة من الاوكسجين لي كايتعتبر من اهم العناصر لي كاتعتمد عليهم الحياة فالارض باش تستمر بالإضافة لغازات خرين كايلعبو دور حيوي باش نعيشو حنا و كذلك غاع الكائنات لي معمرة فلآرض و لكن الغلاف الجوي مكايقتصرش الدور ديالو على هادشي فبالاضافة لتوفير الغازات الضرورية للحياة ، كايساهم فالحماية من بزاف ديال المخاطر لي تقدر تجينا من الفضاء حيت تنوجدو ان الغلاف الجوي كايلعب دور فيلتر للاشعة الشمسية فهو كايسمح بالاشعة الشمسية المفيدة بالمرور و كايمنع الاشعة ضارة بحال الاشعة فوق البنفسجية و كذلك كايحمينا من الاشعة الكونية و كايشكل درع واقي من النيازك ( الصغار ) و الشهب بحيت كايساهم فتفتيت ديالها قبل ماترتطم بالارض و هادشي كامل كايخلي الغلاف الجوي من اهم العناصر لي كاتساهم فتوفير مجال جيد للحياة هاد الخصائص ديال هاد العناصر بالإضافة لعناصر خرى كايخليو الارض تستفرد بوحدها بالحياة فهاد المجموعة الشمسية و لكن هادا مكايعنيش ان الحياة موجودة غير فالارض فهاد الكون كامل ، فالإدارة الوطنية للملاحة الجوية والفضاء الامريكية و لي كاتعرف ب ناسا كتاشفت مجموعة من الكواكب ، بضبط سبعة كايدورو على نجم برد من الشمس الامر لي كايخلي إحتمال وجود الحياة فهاد الكواكب كبير بسباب إمكانية توفر الماء فالحالة السائلة بشكل كبير بالاضافة لمجموعة من العوامل كاتخلي هاد الكواكب اكتر قابلية للوجود الحياة فيها و علاش لا نقدرو شي نهار نمشيو ليها و نلقاو كائنات بحالنا و لا غاع نلقاو فيها شي مغرب بحال ديالنا 😂
