من بعد مهضرنا على الفيزيائي نيكولا تسلا اليوم فسلسلة العظماء غادي نهضرو على واحد الشخصية إفريقية ليون الإفريقي .
قرا المقال ديال سلسلة العظماء : نيكولا تسلا
ليون الإفريقي أولا يوحنا ليون الإفريقي أولا الحسن بن محمد الوزان الزياتي هو أندلسي مغربي كاتب فعصر النهضة ودبلوماسي كذلك، تولد فمدينة غرناطة ولكن المؤرخين ختالفو فتاريخ الميلاد ديالو كاين لي تيقول تولد عام 1495 ميلادية وكاين لي تيقول 1500 ميلادية ، باه مسلم ومو يهودية لكن دخلات للإسلام بعد زواجها، تيقولو أن الأصول ديالو أمازيغية تحديدا من قبيلة زنانة، من بعد العائلة ديالو غادي تهاجر لفاس بسباب محاكم التفتيش لي كانت فداك العهد ، هاد السيد قرا فجامعة القرويين ومن بعد عينو السلطان الوطاسي محمد الرتغالي سفير ديالو فدول شمال وغرب إفريقيا وإسطنبول ، خلال هاذ الرحلة غادي يكتب على الرحلة ديالو وعلى داكشي اللي شافو فالبلايص اللي مشى ليها هادشي خلاه يجمع واحد الكم هائل من المعلومات التاريخية والجغرافية الشيء اللي خلاه إقوم بتأليف كتاب " وصف إفريقيا " اللي هو كتاب واعر بزاف كيعتامدو عليه الأوربيين كمصدر وكمرجع أساسي فالجغرافيا ديال إفريقيا واللي ترجمو الحسن الوزان من العربية للإيطالية ، الحسن الوزان منين كان راجع من إسطنبول للمغرب وقفات السفينة لي كان فيها فجزيرة جربة فتونس وشدوه القراصنة وقدموه كهدية لبابا الفاتيكان ، البابا ليون العاشر عجبو الذكاء والمعرفة ديال ليون الإفريقي الشيء اللي خلاه يحامي عليه ويرعى الشؤون تاعو ، ليون الإفريقي ولى مسيحي من بعدما كان مسلم والمؤرخين تيقولو باللي بابا الفاتيكان هو لي بزز عليه يعتانق المسيحية وسماه بسميتو " ليون يوحنا دي ميديتشي " ورجعو مدرس للغة العربية فروما اللي قام فيها بتأليف كتاب " وصف إفريقيا " اللي هضرنا عليه من قبل ، المؤرخين رجحو باللي الحسن الوزان مات فتونس لكن سنة الوفاة تيقولو باللي كانت ف 1554 ميلادية .
فعام 1986م دار الكاتب اللبناني أمين معلوف رواية بالفرنسية سميتها Léon l'african واللي كيهضر فيها على حياة حسن الوزان واللي ترجمات لبزاف ديال اللغات واللي منها العربية هاد الرواية نجحات بزاف وقامت بالتعريف بهاد الشخصية من جديد وفعام 2011 قناة BBC غادي دير واحد الفيلم وثائقي كيهضر تاهو على حياة حسن الوزان ، النسخة الإنجليزية ديال الفيلم سميتها " Leo Africanus A Man Between Worlds " وكاينة نسخة بالعربية سميتها "على خطى ليون الإفريقي".
من إعداد : عبدالصمد بنصالح
