فعام 1997 واحد المرأة فرنسية لي سميتها "جين كامنت" كملات 122 عام و 164 يوم قبل ماتموت الشيء لي خلاها تكون أطول واحد عمرا ف"التاريخ" .. المدة لي عاشت دهشات بزاف دالناس لدرجة أن واحد المليونير حط مكافأة مليون دولار لأي واحد قدر يحطم الرقم ديالها...
فالحقيقة, أنك تعيش قد هاكا شي حاجة لي شبه مستحيلة و لي نااادرة توقع.. الطريقة باش مكون الجسم ديالنا مكاتخليهش يعيش ديك السنوات الطوييلة , أغلبنا قدرة العيش ديالو فأفضل الحالات مكاتعداش 90 سنة, و لكن السؤال هنا هو أشنو كاتعني أنك "تشرف"
السؤال كيبان ساهل الجواب عليه, و لكن أنك تحدد تعريف علمي لهاد الكلمة راه تحدي فحد ذاتو, لي نقدرو نقولو هو أن الشيخوخة كاتوقع فاش العمليات الأساسية فالجسم و التفاعلات مع البيئة المحيطة ديالنا كاتأثر فالخدمة ديال الجزيئات و الخلايا ديال الجسم ديالنا, هاد التغيرات كاتخلي الأداء ديال الخلايا يتراجع , و بالتالي مع الوقت الفشل ديال النظام الحي كاملا.
كاينين 7 دالخصائص الفيزيولوجية لي كيلعبو دور فهاد العملية
1-مع الوقت فالجسم ديالنا كاتراكم الجينات المتضررة على شكل طفرات فالحمض النووي , هاد الطفرات كاتحدث بشكل تلقائي فاش كيتستنسخ الحمض النووي ديال الخلايا, و واحد العضيات خاصة كاتسمى "الميتوكندريا" كاتعرض بشكل خاص بهاد الضرر.. هاد الجزيائات كاتنتج ثلاثي الفوسفات لي هو المصدر الأساسي للطاقة لكل العمليات لي كاتوقع فالخلية .. و بالتالي التراجع ديال الخدمة ديالها كيأدي فالأخير للتراجع دالخدمة ديال العضو كامل .
2-كاين واحد النوع اخر ديال التغيرات كيتسمى التغيرات اللاجينية و كيوقع أثناء التعبير ديال الجينات و هي كاتأثر على الأنسجة و الخلايا ديال الجسم . و وقتما عشنا كثار زاد احتمال وقوعها كثر.
3- الحاجة المهمة الاخرى لي كاتأثر وقتما كبرنا هي القدرة ديال الخلايا ديالنا على التكاثر و الانقسام لي كيشكل أساس لبقاءنا على قيد الحياة.
4-الجينات ديالنا مجموعة فواحد البنية كبر كاتسمى الصبغيات أو لا "الكروموسومات" .. هاد الأخيرة كاتحتوي فالأطراف ديالها على واحد المنطقتين كيتسماو "التيلومير" و هاد المناطق فكل مرة كاتستنسخ فيها الخلية كاتبدى تصغار .. و فاش كاتولي صغييرة بزاف كاتموت الخلية و مكاتبقاش تستنسخ و بالتالي مع الوقت كيبدى يموتو خلايا كثر و كثر و الخزان ديالنا غادي و كيصغار.
5- الشيخوخة كاتقيس حتى الخلايا الجدعية لي عندها القدرة على أنها تعوض أي خلايا أخرى , و بالتالي هاد فرق الانقاذ تاهي كاتقلال مع الوقت.
6-الجسم ديالنا بينما كيعيش كثر مكيبقاش قادر يركب بروتينات بشكل صحيح دائما الشيء لي كيخلي مركبات غدائية متضررة تتراكم و لي تقدر تكون سامة.
7-الاتصال بين الخلايا كيبدى يضعاف مع الوقت , الشيء لي كيخلي الجسم ميديرش الوظائف ديالو بشكل مزيان وقتما تقدم فالعمر.
إعداد : أمين أبوطالب
