الطائرة هي وسيلة ديال النقل لي جديدة بحيث ولات من اكثر الوسائل لي كاتستعمل باش نسافرو لمسافات طويلة بزاف ، حيث مريحة و ماكاتاخدش بزاف الوقت ، ولكن الفكرة ديال الطيران مايمكنش نقولو انها جديدة لان الحلم ديال الطيران بدا معا بنادم القديم لي حاول يطير ، مع ان گاع المحاولات ديالو ما صدقاتش لحقاش كاين الجاذبية لي هي العدو الاول ديال الطيران ، الصين من اقدم الشعوب لي قادو الطائرات ولكن غي طائرات ورقية ، حيث لاحظو ان الاوراق ديال الزبل كاتطير بالبرد و كتبقا بزاف طايرة ، و من هنا جات الفكرة ، كما ان ليوناردو دافينشي الاسطورة الايطالي حاول انه يدرس هاد المجال ديال الطيران و صنع بزاف النمادج ولكن مقدرش ينجح ف انه يصنع نموذج طائر ، هاد الشي وقع تقريبا في العام 1500 م ، و لكن قبل منو و بالضبط ف عام 875 قام العالم العربي عباس بن فرناس قام بمحاولة باش انه يطير ب اجنحة شراعية ، و قدر انه يبقى طاير لمدة 10 دقايق . من بعد تطورات وسائل الطيران نسبيا و تختارع المنطاد و وسائل الطيران الشراعي .
لحد الان هضرنا غي على الطيران ديال المواد لي اخف من الهواء ، ولكن المهم هو الطيران ديال المواد الاثقل من الهواء و اللي مستعملة حاليا، يمكن نقولو ان الاخوين رايت هوما المخترعين ديال هاد النوع من الطيران ، بحيث انهم ف 17 دجنبر 1903 جربو الطائرة ديالهوم فلاير 2 ، و تمكنو من الطيران بيها لمدة 12 ثانية و لمسافة 39 متر ، هادي هي اول محاولة طيران بمواد اثقل من الهواء ، و من تما تطور هاد النوع من الطائرات خصوصا معا الحربين العالميتين و الحرب الباردة ، بحيث كان اول قتال جوي ف 5 اكتوبر 1914بين فرنسا والمانيا .
المهم ندوزو للسؤال المهم ، لي هو كيفاش كاتطير الطائرة ؟
باش نقدرو نفهمو الاجابة ديال هاد السؤال ، خاصنا نعرفو اربعة القوى لي كاتحكم بالطائرة و اللي هيا :
1- الجاذبية : لي هيا القوة لي كاتطبقها الارض على الطائرة باش تجرها لتحت و هي المشكل الكبيرة ف المجال ديال الطيران .
2- قوة الرفع : هيا القوة لي كاتخدم العكس ديال الجاذبية بحيث هي لي كاتهز الطائرة لفوق و لي غادي نشرح ليكم كيفاش كانخدمو بيها .
3- قوة السحب : هيا القوة لي كاتجر الطائرة لقدام .
4 - قوة الدفع : و هي القوة لي كايطبقها الهواء على الطائرة و كايمنعها من التحرك .
هاد القوة الرابعة كاتسمى دافعة ارخميدس ، و كايطبقها اي جسم مائع ( سائل - غاز ) على الاجسام لي كاتحرك فين كاين هوا ، بحال مثلا فاش كنكونو ف البحر و كانحاولو نجريو وسط الماء ، كنحسو برجلينا ثقال بزاف ، علاش ؟؟؟؟؟ بكل بساطة حيث الماء كايطبق علينا هاد دافعة ارخميدس لي كاتدفعنا دائما في عكس اتجاه الحركة .
باش تبدا الطائرة الحركة ديالها خاصنا قوة السحب ، هاد قوة السحب كاتجي من المحركات ديال الطائرة لي فيهم مروحات كايجرو الهواء من اللقدم و كايدفعوه اللور و كايتشكل ظغط مرتفع اللور و منخفض اللقدام و فاش كايبغي الهواء يرجع من اللور للقدام ( من منطقة الظغط المرتفع لمنطقة الظغط المنخفض ) كايدفع الطائرة و كاتبدا تتحرك لقدام . ولكن كيفاش كاتطلع للفوق ؟؟ هنا كايجي الدور ديال قوة الدفع ( قانون برنولي ) لي هيا الهواء لي كايضرب ف الطائرة من اللقدام ، بحيث ان الاجنحة ديال الطائرة كايكونو مهزوزين من اللقدام و هابطين من اللور فاش كاتكون الطائرة كاتحرك للقدام كاتحتك مع الهواء ، هاد الشي لي كايخلي الهواء ديال الدفع يضرب و يضغط على الاجنحة ديال الطائرة من التحت و كايدفع الاجنحة للفوق يعني كايدفع الطائرة كاملة للفوق و كايبقاو بحال هاكا حتا كاتوصل الطائرة للارتفاع المطلوب و تما كاتنقص زاوية ميلان الاجنحة باش تبقا الطائرة ف مستوى تابث، خلال الطيران و باش الهواء مايدفعش الهواء الجسم ديال الطائرة اللور ، كاتكون الطائرة عندها جسم انسيابي اي من اللقدام صغير ، نفس المبدأ ديال القرطاسة ديال المسدس .
باش تطلع الطائرة للفوق كاتزيد ف السرعة باش يتزاد الضغط علا الاجنحة و يدفعها للفوق ، و العكس ايلا بغينا ننزلوها للتحت اي ننقصو السرعة .
بالنسبة لتغيير الاتجاه في الطائرة ف هذا كايتدار غي بالاجنحة بحيث انه ايلا بغينا ندورو لليسار كانهبطو الجناح الايسر و هاد الشي لي كايزيد ظغط الهواء عليه ، و كاتدور الطائرة لليسار . ولكن هاد الامر كيخلي الطائرة تفقد شوية من الارتفاع ديالها لان الجناح الايمن نقص عليه الضغط هاد الشي علاش خاص الطائرة بعد ما تدور تزيد ف السرعة شوية باش توصل للارتفاع المطلوب .
باش تهبط الطيارة ماعلينا الا ننقصو السرعة و تاينخافظ الدفع د الهواء و كاتبدا الطائرة تنزل بشوية و فاش تتقرب للارض تتزيد شوية ف السرعة باش التماس معا مدرج الهبوط مايكونش بالجهد . و ايلا شفنا شي فيديو ديال شي طائرة كاتهبط غادي نلقاوها طالعة من اللقدام ، الشي لي هضرنا عليه على طول المقال .
إضافات :
*انواع المحركات :
-محرك توربيني نفاث : كايخدمو بيه ف الطائرات الحربية و المتطورة ، هاد المحرك كايجر الهواء و كايخلطو معا الوقود و كايشعلو و هاد العملية كا تعطي دفع قوي للطائرة.
-محرك توربيني مروحي : كايتستعمل في الاطائرات العادية ديال ا الركاب
*قانون برنولي :
قوة الرفع = مساحة الجناحين x فرق الظغط بين السطحين العلوي و السفلي
*اقوى 10 طائرات حاليا :
- F22 Raptor
- F/A-18 Hornet
- Su-27
- Eurofighter Typhoon
- JAS 39 Gripen
- Rafale
- F-16 fighting Falcon
- T-50 Golden Eagle
- MiG-35
- J-10
تحرير : منير جيد
