ف حياتنا كانتلقاو بزاف دالمعلومات كاينة لي كانلقاو الفرصة باش نتأكدو منها وكاينة لي بكثرة مكاتعاود و كانسمعوها فكل بلاسا .كانعتابروها من المسلمات و الحقائق.. و لكن واش بصاح كلشي داكشي لي كاتعرف راه بصاح؟ اليوم جبت ليكم بعض من المعلومات الشائعة لي خاطئة.
1-جبل ايفيرست هي أعلى قمة ف العالم :
جبل ايفيرست راه بصح طوييل بزااف، ولكن واش بصح هو أطول واحد؟ لا. الطول ديال الجبل كايتحسب من مستوى سطح البحر تال لفوق. داكشي علاش كايتعتابر أطول واحد الا عبرناه من القاع تال القمة ديالو حيث القاع دالو كايبدا من مستوى سطح البحر، يعني أنه ماشي أطول جبل، ف في الحقيقة جبل Mauna Kea هو أطول واحد في العالم الا جينا نعبروه من القاع ديالو تال القمة، الما الا عبرناه من مستوى سطح البحر فغايكون قصيير بزاف.
2-حرارة الرأس هي لي كتنشر الحرارة في الجسم:
فاش كاتجيك سخانا، كاتشد شي حاجة باردا او كاتبقا حاطها على راسك باش تبرد، او لا فاش كايجيك الرواح او كاجيك البررد كاتمشي تغطي راسك مزياان باش تسخن كاامل، هادشي كولو مامنوش. حينت درجة الحرارة دبال رلسك كاتكون فحاالها فحال تاع الجسم ديالك. يعني الا شي نهار كنتي خرج وكان لبرد بزاف و لاحظتي بلي راسك بارد بالمقارنة مع جسمك، غالبا غايكون حينت راسك عريان فالوقت لي البدن ديالك مغطي مزياان، غيكون خاسك تغطي راسك تاهوا وتعاملو بحالو بحل أي عضو من لبدن ديالك.
3-الدم بلا أكسجين كايكون أزرق:
كلنا عندنا عروق فالجسم ديالنا كامل ولي منتاشرين فالجوايه كاملين، اللون دبال هاد العروق هو الأزرق داكشي علاش أي حاجة كادوز فدوك العروق غايكو أزرق.لكن هادشي ماشي بصح، فاش كايوصل الدم ل الرئتين ديالك كاياخد الأوكسجين او كايولي لون دم أحمر ساطع، فاش كايبقا يدور نهار كاامل كايولي فيه بزاف دالمكونات و كايرجع اللون أحمر داكن. اذن راه لون العروق أزرق بسبب الضوء، ماشي بسبب داكشي لي لداخل فيهم.
4-الانسان عندو خمسة د الحواس :
كانسمعك اش كاتقول.. كانشوف وجهة نظرك.. كانحس بالألم ديالك.. ريحتك زوينة و غالبا أيكون المذاق ديالك بنين..و لكن الا كان تيسحابك هادو الحواس الوحيدة ي عندك راك غالط.. فالحقيقة كاينين بزاف دالحواس.. كاينين حواس مملة لي كاتدير خدمتها بلا ماتحس بيها .. لي زوينة بزاف هي الحاسة لي كاتخليك تقيس نيفك و نتا ساد عينيك.. لي كاتخليك تربط بين جوج أجزاء من الجسم بلا استعمال العينين..و كاينة حتى الحاسة لي كاتخلينا ندركو المجال المغناطيسي دالأرض.. ايييه المجال المغناطيسي.. و كاينة الساعة البيولوجية..الخ
5-كانستعملو 10 فالمية من دماغنا:
هادي وحدة من دوك المعلومات لي مكاينش شي واحد ماعمرو ما سمعها.. تقدر تعتابرها وحدة من أكبر المغلاطات شيوعا فالعالم.. فالحقيقة حنا كانستعملو دماغنا كامل. الدماغ هو عضو معقد و كبير و تقريبا الأغلبية ديالو كاتبقى خدامة الوقت كامل و بلا مانقدرو حتى ندركوها و هادشي لي كيثبتو علم النورو أو علم الدراسة العصبية للدماغ, هو فالحقيقة المعلومة ماشي مية فالمية غلط.. العلم قدر يعرف العمل ديال عشرة فالمية ديال النورونات لي فالدماغ و باقي كيستكشف فيه, و لكن هادشي مكيعنيش أننا كانخدمو غير هادو حيت كانقدرو نرصدو العمل دالدماغ كامل غير مزال الفهم ديالو خدام.
6-الجسم ديال النمل كيتكون من الزجاج:
عكس ما هو شائع فراه الجسم ديال النمل و تقريبا كل الحشرات كيتكون من الكيتين. هاد المادة هي الأساسية فالتركيب ديال الهيكل ديال كاع الحشرات تقريبا و الصيغة ديالها هي C8H13O5N. أما الزجاج فكيتكون من السيليكا و الصوديوم و أكسيد الكالسيوم و مواد أخرى.
7-كل بلاصة فلسانك مسؤولة على مداق معين: بزاف ديال الناس كايصحاب ليهم اللسان مجزأ حيث كل جزأ مخصص فشي مداق. فالقدام ديال اللسان كاندوقو الحلاوة، و الملوحية فجناب ديالو..الخ هاد المعلومة نتاشرات مدة طوييلة، لي علموها ل بلايين ديال الأطفال فالمدارس.
حديثا، عرفنا بلي هادشي كامل ماكانش صحيح و بلي اللسان كايدوق أي مذاق فالمناطق ديال اللسان كاملا.
-المصادر:
المصدر 1 : http://science.howstuffworks.com/science-vs-myth/everyday-myths/10-false-facts1.htm
المصدر 2 : http://harvardforest.fas.harvard.edu/ants/body-structure
المصدر 3 : https://www.scientificamerican.com/article/do-people-only-use-10-percent-of-their-brains/
المصدر 4 : http://www.bbc.co.uk/guides/ztdy34j
