كاينين شي ناس ماعمر كانت عندهم الرغبة يخرجو من الدار. كايبقاو فالمدينة لي تزادو فيها، فالسداري لي كايريحو فيه و فربعة الحيوطا لي كادور بيهم.
او كاينين حنااا، الناس ديال السفر، الناس لي ماكاتقدرش تبقا تابتة فبلاستها.
يا اما كانقولو ليها شهوة حب السفر والناس لي عندهوم هاد الشهوة كيتسماو ب Wanderlust او لا غير حب الاستكشاف، المهم هو ان هاداك الشوق لي عندك باش تكتشف ماعمرو ماكينقص، يعني قد ما سافرتي كاتولي باغي باغي كتر وكتر.
بالنسبة ليك ديما كاين الجديد مايتشاف وديما كاينا شي حاجة لي ماتعودتيش تشوفها. كاتستمتع بالسفر ديال نهار واحد، ولكن راه فبالك عارف بلي كاين بزاااف مايتشاف ب 24 ساعة. كايعجبك تسافر بلا ماتحدد فين غادي.
باش تحدد فين باغي تمشي خسك دير بلان، ولكن نتا ماعندكش مع تقاد لاخطط لا والو، كاتبغي غير تجول. فاش كادير برنامج كاتكون حددتي هدف، ولكن بالنسبة ليك الهدف الرئيسي هو انك تسافر ماكايهمش فين، والسفر بحال هاكدا كيزيد ليك من الحماس.
الا كنتي هاكدا من شحاال هادي، منين بديتي أول سفر مع العائلة و أول رحلة ديالتك فالمدرسة ولا مخيم ولا أي حاجة كانت. فالعلم كايقول انه من الممكن ان السبب لي خلاك هاكدا متعلق بالخبر الوراثي دياك (DNA).
وراثة الرغبة فالسفر تقدر تكون متعلقة بواحدة من الجينات لي مشتقة من واحد الجينة سميتها DRD4، هاد الجينة عندها علاقة مع نسبة الدوبامين في الدماغ.
هاد الجينة بنفسها لي معروفة بي DRD4-7R عطاوها الاسم ديال (جينة
شهوة حب السفر والتجوال ) و بالانجليزية (wanderlust gene) حينت كاتحمل مواصفات ديال نسبة عاالية من الفضول و الحماس.
وفي الواقع، الناس لي عندهوم هاد المواصفات في الجينات ديالهوم كيتشاركو فحاجة وحدة، وهي السفر حيث كولهوم عندهوم تاريخ كبير ديال السفر.
.وهاد الجينة ماشي عند كولشي، في الحقيقة غير 20 في المئة ديال الناس لي عندهوم. وكايقولو بلي الأمكنة لي كيكون فيها عدد كبيرمن الناس لي كايحملوها كايكونو بلايس لي شجعت السفر في الماضي.
نفتارضو ان كلشي الأساليب ديال الحياة كان الأصل ديالها هي أفريقيا Chen Chaunsheng لي دار واحد الدراسة عام 1999 كايفتارض فيها ( الشكل DRD4 في الغالب كاتوافق المجتمعات الحديثة لي هاجرات من أفريقا مند النشأة ديالنا في افريقيا قبل الاف لسنوات)
.باختصار، Chen كايقول بلي الحضارات لي أصلها من افريقيا (لي هي نظريا الأصل ديال الانسان)، هي لي عندها احتمال أكبر تكون عندها هاد الجين DRD4-7r لي متعلقة ب الفضول والحماس
في دراسة اخرى دارها David Dobbs في National Geographic دعمت هاد الفرضيات وقالت بلي هاد الجينة ماشي مسؤولة غير على السفر والحماس ولكن حتا علا الشغف ديال السفر
وقال Dobbs بلي (هاد المورثة كاتكون عند الناس لي كايقدرو يديرو لحوايج لي خطيرة، يكتاشفو بلايس جداد، أفكار، ماكلة، وعلاقات) وقال (عموما هاد الناس كايقدرو و كايبغيو التغيير، التحرك، والمغامرات)
و بالمقارنة مع الجماعات المستقرة لي غالبا بقات فالمواقع ديالها منين يالاه جات للوجود لقاو بلي الأغلبية ديالهم تااهوما عندهوم الجينة 7r.
وبالتالي تبين انه الناس المسافرين عندهوم DRD4 و الناس لي ماعدهومش تاريخ فالسفر عندهوم 7r
وهادشي لي كايخلي الشك بأنه بصح كاينا هاد (جينة السفر)، وهادشي لي كايقول Kenneth Kidd من Yale University.
حيث بالنسبة ل Kidd، هادشي معقد كتر ما الناس كايعتقدو فقال (ماشي هاكداك كايخدمو الجينات) وزاد (بكل بساطة ماتقدرش تربط شي حاجة معقدة بزاف بحال الاستكشاف البشري ب جينة وحدة فقط)
وباش يجاوب,Dobbs اتفق مع عالم الوراثة التطورية Jim Noonan باش يعرفو كتر على هادشي. بطريقة مبسطة، Dobbs او Noonan كايبينو قدرة الانسان على الاكتشاف كاتعتامد على جوج أنظمة لي هوما الأطراف و الدماغ.
كايشرح Noonan كيفاش ان كل نوع من الكائنات عندو مجموعة من الاختلافات لي كاتميزو فهاد جوج أنظمة، الشيئ لي كايخلي كل نوع كيمارس سلوكيات مختلفة على حسب الختلافات لي عندو فيها.
اما بالنسبة للبشر، كاين اختلافات قليلة في الأدمغة و الأطراف ديالنا لي نقدرو نميزوها من الأسلاف ديالنا الأولى. (بحال الرجلين و الفخاض لي كاتسمح لينا باش نمشيو مسافات طويلة. وكدلك أيدين دكية و دماغ دكي كتر لي كاينمو بطريقة بطيئة ولكن كبر من أغلب الكائنات )
هاد الاختلافات كاتسمح لينا نسافرو مسافات طويلة ونكتاشفو كتر، كما أن الجنات ديالنا مازل تقريبا كلها متطابقة مع الجينات ديال الأسلاف ديالنا.
و كايقول Dobbs بأن هاد الاختلافات جات من الجنات لي تطورات مع مرور الوقت.
هاد الاختلافات نظريا، نوعا ما كاتنتج تكون الدماغ والأطراف أي الأنظمة الأساسية بطريقة فضولية الشيئ لي يقدر يكون السبب في الشعور برغبة كبيييرة في السفر.
الجينةDRD4 -7R كاتحمل الملايين من الصفات لي كاتمتل الاستكشاف ولي تقدر تكون مرتبطة بالسلوكيات ديال الانسان القديييم بزااف.
.”وبالاضافة انه الناس لي عندهوم هاد المواصفات كايكونو مبدعين و أدكياء وكابغيو بزاف السفر كما انهم خارج نطاق السيطرة.
يعني ماعارفين ومزال مالقيناش شي حاجة لي غاتأكد لينا واش هاد الفرضية صحيحة اولا خاطئة.
و في الأخير، فاش تكون كاتحس براسك باغي تخلي خدمتك اولا قرايتك وتمشي تسافر، من الأحسن وقف و تأكد أنك فكرتي مزيان. وماتنساوش بلي السفر بلا مادير برنامج كايكون أكثر متعة.
إعداد : أميمة أجوامعي
