''فاش كتشوف فالنجوم فالسما، راك كاتشوف فالماضي حيت دوك النجوم أصلا ماتو شحآآال هادي''
شحال من مرة سمعت هاد الهدرة من قبل، و لكن واش بصح ولا لا؟ هادشي لي غنكتاشفو من خلال المقال داليوم.
أول جملة هي بالفعل صحيحة حيت فاش كاتشوف فالنجوم فالسما راك كتشوفهوم كيف كانو من قبل (في الماضي) يعني كاين واحد الإختلاف فالوقت بين هنا و لهيه. باش نزيدو نفهموكثر: الضوء هو أسرع حاجة فالكون وكتبلغ السرعة ديالو 300.000 كم/ث ولكن رغم ذلك هاد السرعة ماشي لا نهائية، يعني كاتاخد الوقت باش تنقل من مكان إلى آخر.
زد عليها بلي فاش كاتشوف شي حاجا راك كتخدم عينيك باش يكشفو على الضوء الصادر من هاد لحاجا أو منعكس منها. بشكل مبسط أكثر، فاش كاتشوف القمر مثلا راك كاتشوفو كيما كان هادي شي ثانية و شي لعيبة، حيت المسافة بين الأرض و القمر تقريبا 380.000 كم يعني قريبة شوية لسرعة الضوء. المهم نزيدو نبعدو شويا، نمشيو للشمس لي كتبعد ب 149.6 مليون كم عن الأرض، الضوء ديال شمس كاياخد حوالي 8 دقائق باش يوصلينا، يعني إلا وقع فيها شي حاجا ماغانسيقو الخبار تادوز 8 دقائق. و إلا زدنآآآآا بعدنا لأقرب نجم للشمس، Alpha Centauri system، الضوء ديالها كاياخد 4 سنوات باش يوصل.. و هكذا. يعني من هادشي كامل فاش كانشوفو شي حاجا راه كانشوفوها كيف كانت من قبل و ماشي كيما هيا دابا.
المهم، دابا سالينا الجزء الأول ندوزو الجزء الثاني! الجملة الثانية تقر بأن كل النجوم لي كانشوفو را مآآتو هدا شحآال! ولكن هادشي ماشي صحيح للأسباب التالية:
إيوا هاكا كانعرفو بلي النجوم لي كانشوفو حاليا راه مازال مضويين و عايشين واخا كانشوفوهوم معطلين هه..
الإحتمالات باش أن شي نجم لي كيبان بالعين المجردة يكون مات قليلة بزاف حيت أي نجمة نقدرو نشوفوها را كاينا داخل المجرة ديالنا. علما أن درب التبانة المسافة ديالو 100.000 سنة ضوئية تقريبا، إذن الضوء لي جاي منها كاياخد تاهوا تقريبا 100.000 سنة ضوئية، تقريبا كلهم ماغايكونوش ماتو خلال فترة قصيرة بحال هادي، آيه قصيرة حيت ماتنساش بلي بالنسبة للحياة ديال شي نجمة شوية دلاآلاف دسنوات رآ رمشة عين. داكشي باش أنك تشوف نجمة ميتة بعينيك المجردة مايمكنلو يوقع إلا إذا كانت قريييييييييييبة من الموت ديالها من بعد بزآآآآآآآف دسنوات( ملاين و بلاييين السنين).
من إعداد : صبرا موحي، 15 سنة من ثانوية بلبشير - الرباط. كل مرة وشنو كاندير فحياتي ولكن أكثر حاجة كاتعجبني هي نرسم و نقرا الكتوبة و نكتب، و شوية دالموسيقى.. مهم داكشي دالفن. من جهة أخرى كنهتم بالعلم هه، تانبغي نعرف المستجدات ديالو و نكتب مقالات علمية كذلك. أنا مشاركة ف السباق نحو الفضاء Race2Space و محتاجة التصويت ديالكم : هنا
