ملي كاتكون في الزنقة ولا في الطوپيس ولا في الجامعة ولا في القطار ولا المقهى ولا ولا ولا... الخ، يمكن ليك تسمع او دوي على بزاف ديال الحوايج، و كاينة واحد الحاجة للي كاملين كانسمعوها فينما مشينا، يكفي انك تكون مغربي باش تسمعها، و هاد الحاجة كاتسمعها على شكل مجموعة ديال التعابير او الجمل للي عندها نفس الفكرة: "المغرب دولة متخلفة". و كايتم التعبير على هاد الفكرة بمجموعة من الطرق بحال:
- الاقتصاد عندنا عيآآان!
- الصحة عندنا والو مافيها مايتشاف...
- الفقر عندنا كثير بزاف.
- السياسة عندنا فيها قوة التخربيق و القوالب.
- وا خويا عينا من هاد بنكيران، اخويا الزيت، اخويا السكر، اخويا البابوش...
و القائمة كاتبقا طويلة جدآآ... غادي تكون سمعتي على الاقل جملة وحدة من هادو و لو مرة وحدة في حياتك و نتا ساكن في المغرب. هي في حقيقة، عادي شي واحد يحتج بهاد الطريقة على شي مشكل كايعاني منو البلد ديالو، الان هاد الفعل كادخل فيه مجموعة ديال الاسباب بحال الغيرة الخ...
للي بغيت نقول دابا هو اننا، كمغاربة، ماعدناش مشكل في الصحة، و ماعدناش مشكل في الاقتصاد، و بنكيران مامنو والو، و الفقر حتى هو ماشي هو المشكل ديالنا.
الدراسة، التربية و التعليم هم المشكل الوحيد للي عندنا في هاد البلاد، و هم المشكل الوحيد للي كاتعاني منو اي دولة في العالم كايلقبوها "دولة متخلفة".
كلشي كايبدا من التربية و التعليم، بغيتو ولا كرهتو، ماغادي دير تاحاجة اذا مشيتي كاتبني ناطحات السحاب و الطائرات و كاتشري و لا كاتبيع في البترول اذا ڭاعما استثمرتي في العنصر البشري.
و باش تفهمها، غادي نعطيك مثال بسيط باش تفهم: تقدر تكون عندك شركة، فيها معدات عالية الجودة، و كاتخسر فيها فلوس ديال بصح... و لكن للاسف، الناس للي خدامين بهادوك المعدات للي عندك، ملي كاتبلوكا ليهم شي حاجة و لا كايوقع فيها شي مشكل، في بلاصت ما يقراو كيفاش حتا كاتصايب، كايشدوها كايبداو يخبطو فيها من لفوق و كايبداو يديرو ليها معجون الاسنان و الماء و يطفيوها و يعاودو يشعلوها حتى كاتخسر و كاتولي نتا للي ضيعتي فيها بزاف ديال الفلوس على والو... دابا يمكن ليك تقول لييا فين كاين المشكل؟
الدولة حتى هي بحال هاكاك، اذا كان عندك البترول غدا ماغايبقاش عندك لسبب او لآخر، و لكن اذا كان عندك دماغ مكون، غادي ينتج ليك دماغ آخر يا بحالو يا احسن منو.
اذا كان عندك اقتصاد متضهور، غادي يكون السبب الرئيسي هو ضعف الاستثمار، و ضعف الاستثمار سببه هو ضعف المادة، و ضعف المادة سببه هو ضعف الخدمة، و ضعف الخدمة سببه هو ضعف التعليم.
اذا كان عندك قطاع الصحة ماشي هو هاداك، غادي يكون السبب الرئيسي هو ضعف المعدات و الاطباء ماكاينينش، و ضعف المعدات السبب ديالو هو انك ماكاتنتجش شي حاجة بهاد التكنولوجيا، و السبب هو انك ماعندكش بنادم قادر انه ينتج هاد النوع من المعدات، و السبب هو التربية و التعليم.
و اذا كانت عندك السياسة عامرة تخربيق و تخلف، السبب هو انه هاد النوع من السياسة لاقي اقبال و مستمر، و السبب هو انه ماكاينش عندك بنادم واعي و مثقف، و السبب وو التربية و التعليم.
العلاقة بين التقدم و التعليم اوتوماتيكية و پراغماتية، و كانتحداك تجبد ليا شي دولة بين العشر الاوائل في العالم، و مشات بذون التركيز على قطاع التربية و التعليم.
دابا بغيت نخاطبك نتا و ندوزو شويا من المسائل النظرية و "الهضرة"... شنو كادير فحياتك؟ كاتقرا؟ كاتخدم؟ مزوج؟
انا ماعارفكش شكون نتا، و لكن عارف بلي راك مغربي غير ملي قدرتي تقرا حتال هاد الكلمة. اذا كنتي كاتقرا، مزيان، كمل في هاد الطريق و حاول تعمق في داكشي للي كايعجبك.
و لكن نتا للي ماكاتقراش، ماكاتخدمش، كاتبقا نهار كامل جالس في الدار ماكادير والو و ملي كاتمشي تقهوى مع ولاد الدرب كاتبدا حتى نتا بداك الديسك ديال: "وا خويا تقهرنا فهاد البلاد!" "واخويا بنكيران مامشا حتى خربقها" "واخويا بغينا نحرچو لبرا"... آه كاندوي معاك نتا، شنو كاتسنا؟ واش نتا تزاديتي في واحد الوقيتة للي كلشي ولا فابور مع الاننترنيت و كاتقول هادشي؟ غادي تسمح ليا، و لكن ماعندكش الحق دوي ولا تحتج لطالما الهضرة ديالك ماغاداش تقنع بنكيران باش ينقص من الثمن ديال البصلة، و ماغاداش تزيدك شي حاجة من غير الحلاقم.
اذا ماجابش الله في القراية، غادي تمشي تشارجي 10 دراهم ديال الكونيكسيون و غادي تمشي ل غوغل و تكتب اي حاجة بغيتي تعلم ليها، غادي تورك على اول رابط غادي يبان ليك، و ديك الساعة، ماغاديش تبقا تلقا الوقت باش تحتج ولا باش دوي حيت غادي تكون مشغول مع شي حاجة كاتعلم ليها.
هاك هاد الموقع، عيش مع راسك و تحرك: Alison.com
اذا ماكنتيش تقدر تكونيكطا، سير شد ليك شي 3 ديال الكتب واحد بالعربية، واحد بالفرنسية، و واحد ب الانجليزية، و تعلم شوية ديال اللغة... و ماتعرف، واحد النهار تقدر من بعد ماتقرا 20 كتاب تولي قادر انك تولي كاتب.
ماتسناش من الدولة باش تخدمك و لا تقريك و لا توكلك، الدولة هي للي محتاجة ليك ماشي نتا للي محتاج ليها. و حاول انك تخدم على راسك، باش ملي تموت مايبكيوش عليك غير واليديك.
و عافاك، كون فشكل.
