علاش المحيطات كاتبان لينا زرقاء اللون ؟!

من إعداد إلياس الكبيري

علاش المحيطات كتبان زرقاء ؟! واش حيت كتعكس اللون ديال السماء ؟؟

المحيطات كتبان زرقا حيت الالوان الحمرا ، البرتقالية و الصفرا (هادو كيتميزو بانهم موجات ضوئية طويلة ) ، كيتمتصوا بقوة  اكثر من اللون الازرق ( اللي هو موجة ضوئية قصيرة )  من طرف الما . فبالتالي اللون الابيض اللي جاي من الشمس او كايضرب فالمحيط اللون الازرق هو اللي كيرجع حيت كيما كلنا انه مكايتمتصش بكثرة ، نفس السبب علاش السما زرقا .

بغيت نكول ان اللون ديال المحيط ود السما مترابطين ولكن كتوقع كل ظاهرة مستقلة على الاخرى. فالحالتين بجوج كاينا افضلية فامتصاص الالوان اللي عندهم موجات ضوئية طويلة ( حمر ، صفر ...) الحاجة اللي كاتخلي نسبة اللون الأزرق كترتافع! حيت ماتمتصش .

ولكن راه هاد النسب و نوع الامتصاص مكايكون الا اذا كان الما نقي . اما الا كان فيه الطين ولا الطحالب المهم اي شوائب و مواد ملوثة فالضو كايتشتت بسبب هاد الاوساخ و بالتالي كيخسر الما اللون الطبيعي الازرق ديالوا .

ودابا ايلا سولنا راسنا علاش غروب الشمس كيكون اللون ديالو برتقالي ؟

الاجابة غتكون من "مايكل كروكر" من قسم الفزياء فجامعة "ميسوري " .

هاد السيد كايكول راه السما زرقا ماشي حيت الغلاف الجوي كيمتص الالوان الاخرى 'ولكن حيت الغلاف الجوي كايميل لتشتيت الموجات القصيرة الى اقصى حد ممكن كثر من الموجات طويلة

اللون الازرق اللي جاي من الشمس كيتشتت فجميع الاتجاهات بزاف مقارنة مع الالوان الاخرى داكشي علاش ملي كتشوف فالسما فالنهار كتشوفها زرقا كاملة من كاع الجهات.

هاد التشتت كيتسمى ب "تشتت رايلي " .قيمة التشتت كتناسب مع تردد الضوء .

وراه هاد التاثير كيتزاد الانتشار الا كانت الجزيئات اللي كاتشتت صغيرة من طول الموجة ديال الضو بحال النيتروجين والاكسجين اللي كاين فالجو .

اودابا عاد وصلنا باش نفهمو علاش الغروب اللون ديالو برتقالي ملي كتغرب الشمس الضو اللي كايوصل ليك خاصوا يدوز مساحة اكبر ديال الغلاف الجوي مقارنة مع ملي كاتكون الشمس طالعة . بالتالي اللون الوحيد اللي مكايتشتتش هو الاحمر حيت هو عندو موجة طويلة .

من هادشي يمكن لينا نزيدو نجاوبوا علاش الغيوم ،الحليب ، السكر، والملحة لونهم ابيض . حيت الجزيئات المكونة ليهم اللي مسؤولة على تشتت الضوء كبييييرة مقارنة مع طول الموجة ديال الضو والنتيجة انو الالوان كلها كتشتت بنسبة وكمية متشابهة . غير كاين عامل اخر زايد فتشتت الضوء فالحليب اللي هوما الدهنيات . ويلا حيدناهم مغايوقعش بزاف ديال التشتت ديال الضو . هادشي علاش اللون ديال الحليب الخالي من الدسم اي الدهنيات لونو مختلف.