-->

الخميس، 1 سبتمبر 2016

بوغطاط - شلل النوم

بوغطاط - شلل النوم

اعلان فوق التدوينة


من إعداد عبدالله الشعيبي

"حليت عيني ففراشي كانشوف فالباب كايبانو ليا جوج رجال واقفين، ماكانشوفهمش و لكن .. عارفهم واقفين تما، و عارفهم كيفاش دايرين، كانقدر نسمعهم علاش كايهضرو، كيهضرو على القتل، أنا .. ماكانقدرش نتحرك، كانغوت و لكن صوتي ؟ صوتي ماكاينش ؟ صدري تقيل .. هاهوا واحد منهم فوق مني نيشان .. ماكانقدرش نتحرك، شنو هادشي كايخرج مني ؟ بوووم .." فقت .. كان فيا بوغطاط عاوتاني...

هنري فوسيلي - الجاثوم  1781

الأغلبية الساحقة دازو من تجربة بوغطاط أو شلل النوم و عبر التاريخ كانت هاد الظاهرة مربوطة بالاشباح و شي كائنات كاتجلس فوق صدرك و كايمنع داك الشخص لي ناعس من أنه يفيق، و لكن هادشي ماكايدخلش للدماغ داكشي لاش جبنا مقال علمي خالص باش نفسرو هاد الظاهرة المرعبة، واجدين ؟ 
علميا هاد الظاهرة سميتها (Sleep Paralysis) أو شلل النوم باللغة العربية، وهاد الحالة كاتوقع منين كاتوحل بين عالم اليقظة و عالم النوم، و كاتوقع هاد الحالة منين يالاه كاتحط راسك على المخدة و كاتبغي تنعس، أو بعدما تنعس بشي 5 دقائق و لكن غالبا تا كاتنعس عاد كاتوقع ليك هاد الحالة. كاتكون حاسة السمع و البصر خدامين مزيان، و لكن كاتكون مخلوع و كاتجيك هلوسة بحيث كاتسمع أصوات ماكاينينش و كاتشوف أشياء لي ماكايناش!

كيفاش كايوقع بوغطاط ؟؟

باش نفهمو كيفاش كايوقع "بوغطاط" أو شلل النوم أو أيا كانت السمية ديالو فالمنطقة ديالك، خاصنا نفهمو كيفاش كانعسو و كيفاش دايرة عملية النوم.

النعاس مقسوم ل جوج مراحل رئيسية، NREM و REM، فالمرحلة الاولى ماكانحلموش، و فالمرحلة الثانية عاد كاتبدا تحلم (معنى REM هو Rapid Eye Mouvement) لي هي بالعربية حركة العين السريعة، حيث أن حركة العين هي لي كاتخلينا نشوفو الاشياء ف وسط الحلم، ايلا كنتي كاتحلم و هزيتي عينيك للسما "ف الحلم"، العين ديالك غادي تحرك تا هي للفوق و نتا ناعس، بالتالي هاد حركة العين السريعة بحال المحاكاة ديال الحركة د عينيك فالحلمة.
مرحلة NREM و REM كايتناوبو خلال النوم، كاتدوم كل وحدة 90 دقيقة تقريبا ثم كاتجي المرحلة الاخرى، كايتناوبو تا تفيق. و فمرحلة REM الدماغ ديالنا كايدير فينا خير كبير بحيث أنه كايفصل نفسو على العضلات الارادية باش داكشي لي تشوفو فالحلم ماديروش فالواقع، تخيل معايا تكون هاز موس فالحلمة و تنوض ديرها بصح، ولا تكون كاتجري فالحلم و تنوض تضربها بجرية ماتحبس تال راس الدرب ... 

دابا منين فهمنا النعاس، أجيوا نشوفو علاش كايوقع لينا بوغطاط .. شي مرات منين كاتفيق مشلول و ماقادرش تتحرك راك فقتي فمرحلة REM، المرحلة لي الدماغ ماكايكونش كايتحكم بالعضلات د الجسم، أو الصوت أو أي حاجة من غير السمع و البصر لي كايكونو سليمين.

شنو السبب ديال بوغطاط (شلل النوم) ؟

من خلال الدراسات و الابحاث و المقالات لي قريت باش نكتب هاد المقال المُختصر، لقيت أن أبرز سبب باش يجيك شلل النوم هو منين تكون ناعس على ظهرك، داكشي علاش الناس كان كايسحاب ليهم واش كاين شي مخلوق جالس فوق من صدرك.

أسباب أخرى :

1 - عدم الانتظام فالنعاس
2 - التوتر، الضغوط، و القلق
3 - تعاطي المخدرات، أو المواد المهلوسة بشكل عام

نعطيك نصيحة، ايلا كان كايجيك بوغطاط بزاف أو جاتك هاد الحالة شي مرة، منين تفيق منو، ماترجعش تنعس مباشرة حيت غايخلعك عاوتاني و عاود ثالث، نوض تمشى أو بقشش ف بورطابلك واحد 10 دقايق، عاد نعس تاني.


المراجع المُعتمدة : مصدر 1 / مصدر 2 / مصدر 3 / مصدر 4.

إختر نظام التعليقات

شكون حنا ؟

"هل تعلم ؟ نسخة بالدارجة" مشروع شبابي مغربي كايهدف لتثقيف المغاربة بأقرب لهجة ليهم "الدارجة المغربية" و ذلك عن طريق مجموعة من المعلومات فجميع المجالات المعرفية و بطرق ترفيهية سمعية بصرية. فريق العمل ماكيتعداش العمر ديالو 20 سنة و رغم هذا قدر يوصل لعقول ناس من جميع المستويات المعرفية

جميع الحقوق محفوظة موقع - هل تعلم؟ نسخة بالدارجة - 2017 - 2018 تصميم : أر كودر