إعداد : صبرا موحي
على مدار
العديد من القرون، بزاف ديال الأشياء اندثرت و مابقاش ليها وجود بحال مثلا
كتب، أفكار، ملوك، و أيضا مدن و حضارات كبيرة لي اختفت بلا حتى شي أثر. اليوم غادي
نهدرو على 7 من هاد الأماكن و الإمبراطوريات لي كانت متقدمة و مزدهرة لفترات طويلة
من الزمن و من بعد إختفت...
حضارة وادي السند في باكستان The Indus Valley Civilization :
واحدة من أعظم عجائب الهندسة المعمارية في
العالم القديم، كانت من بين أوسع المستوطنات الحضرية، و هي
الآن في باكستان الحالية. حضارة وادي السند آزدهرت لمدة تقارب 4500 سنة، ومن تما و
هي منسية لغاية آكتشافها في عشرينيات القرن الماضي.
كانت حضارة متقدمة و متطورة، و كانو من بين
الحضارات الأولى لي فكرو فنظام الصرف الصحي، و كان معروفين بالمهارة ديالهم فكل من
الرياضيات، الهندسة، و طب الأسنان.
فسنة 1500 قبل الميلاد، تهجرات هاد الحضارة فعليا،
يمكن من بعد الغزو ديال شي قبائل أخرى، أولا إنهيار الأنشطة الزراعية بسبب تغير
المناخ.
امبراطورية الخمير في كامبودياThe Khmer Empire, Cambodia:
وحدة من أقوى الإمبراطوريات في جنوب آسيا، هاد
الإمبراطورية كانت كتمدد من كامبوديا الحالية إلى لاوس، تايلاند، ميانمار و
ماليزيا.كترجع هاد الإمبراطورية لسنة 802 قبل الميلاد. من غير النقوش الحجرية
ماكاين تا شي سجلات مكتوبة، لذلك المعلومات لي عندنا تجمعات من التحقيقات الأثرية،
النقوش في المعابد ديالهم، و الإستشهادات ديال ناس خارج هاد الإمبراطورية بحال
شناوا.
كتعدد أسباب لي يمكن كتشرح آختفاء هاد الحضارة
بحال الموت من الطاعون، الغزو الخارجي، و صراعات بين العائلات الملكية حول الحكم.
لي تسببات فآنهيارها سنة 1431 قبل الميلاد.
مملكة الأنباط، الأردن The Nabateans, Jordan:
هاد الحضارة آمتدت من جنوب الأردن، كنعان، و
شمال شبه الجزيرة العربية منذ القرن السادس قبل الميلاد.
تجسد الإرث ديالهم في مدينة البتراء الرائعة،
المنحوتة في قلب الجبال الحجرية في الأردن.
تعرفو بالمهارة ديالهم في كل من هندسة المياه،
إدارة نظام مركب من السدود، القنوات، و الخزانات المائية لي خلاهم يزدهرو و يزيدو
يتمددو في ديك المنطقة الصحراوية.الثقافة ديالهم مامعروفاش بزاف و ماكاين تا شي
أدب مكتوب ديالهم.
فسنة 106 قبل الميلاد خدات الإمبراطورية
الرومانية القوة من الأنباط. و خلال القرن 4 ق.م هاجرو و خلاو البتراء لأسباب
مجهولة، إمكن بعد سنوات من الحكم الروماني، ضعفت هاد الحضارة وولات مجرد قبائل
مفرقة قبل أن يتم الإستيلاء على أراضيهم من قبل العرب.
حضارة الموشي، البيرو Moche Civilization, Peru:
هي ماشي إمبراطورية بل نقدرو نقولو هي عبارة عن
بزاف دالناس لي كيشاركو ثقافة وحدة.
قدرو يطورو مجتمع مبني على الزراعة، و بناو
قصور، أهرام، و قنوات في شمال بيرو ما بين 100 و 800 ق.م، ماكانتش عندهم لغة
مكتوبة، لي خلانا منعرفوش مزيان التاريخ ديالهم، ولكن معروفة عليهم المهارة و
الموهبة ديالهم في الهندسة المعمارية و صناعة الفخار.
سنة 2006 تم آكتشاف غرفة لي كانو تيخدموها
للتضحية بالإنسان من أجل الآلهة (القرابين).و لقاو فيها مجموعة دالجثث.
كاينين بزاف دالنظريات كتفسر الإختفاء ديالهم،
ولكن لي منتشرة بزاف هي ظاهرة النينو
المناخية( El Nino), لي كتمثل في بزاف ديال الفيضانات و
الجفاف القاسي.
جزيرة القيامة أو الفصح في المحيط
الهادي - Easter Island
هاد الجزيرة معروفة بالتماثيل الحجرية الضخمة،
و الغامضة ديال الرؤوس دبنادم في الساحل ديالها، كيتسماو بتماثيل المواي Maoi، كيفاش حضارة قوية و
مزدهرة بحال هدي تختافي من بعد قرون ديال التطور و الملاحة من جزيرة لجزيرة آختفت
بلا حتى شي أثر؟ هادشي كيلخصو كتاب Collapse ل جارد دايموند،
لي جمع فيه النظريات دالعلماء.
حيث أنه كيقول بلي هاد الحضارة كانت راقية ولكن
الموارد ديالها ماكانتش دائمة، فالوقت لي وصلو لجزيرة القيامة يمكن في 700- 1200 بعد الميلاد، آستهلكو كل الموارد
دالجزيرة و كان خاصهم إمشيو.
غوبكلي تبهGÖbekli
Tepe :
وحدة من أغرب البنايات لي تكتشفات، غوبكلي تيبي
إمكن تبنات في سنة 10000 ق.م، و موجودة
حاليا في جنوب تركيا، هاد سلسلة ديال الأحيط المتداخلة و الدائرية المنحوتة بدقة من الممكن أنها كترجع لشي معبد
قديم، لي يعتبر أهم آكتشاف أثري فهاد
العصر، آكتشف للمرة الأولى سنة 1994. و هو اليوم يعتبر لغزا، شنو كانو الناس
كيعبدو تما؟ منين جاو و شكون هما؟ شنو كانو كيديرو من غير العبادة؟ هادشي مازال
ماعندنا تا فكرة عليه..
كاهوكيا Cahokia :
قبل مايوصلو الأوروبيين لأمريكا الشمالية، كانو
السكان الأصليين بناو على ضفة ميسسيسبي مدينة كبيرة.لي هي كاهوكيا. و كانت كتهز ما
يفوق 20000 نسمة دالبشر، الناس ديالها كانو معروفين بالفن، الفلاحة، و الهندسة
المعمارية، من الرغم أنها كانت متقدمة و مزدهرة إلا أنهم ماكيتوفروش على نظام
للكتابة، الشيء لي مايعانيو منو العلماء. و مخلاهمش يعرفو كثر على هاد الثقافة،
(بحال جل الحضارات لي ذكرنا من قبل).
السبب لي خلا السكان يهجرو هاد المدينة خلال 1200 سنة مازال مجهول.و
لكن بعض العلماء كيقولو أنهم غالبا ماكانو كيعانيو من الجوع و الأوبئة.
