واش تقدر
المراية تقول ليك كيفاش كتبان فالحقيقة ؟
شي ناس
مكايعجبهمش راسهم فالتصاور ؛ بكل بساطة حيت تصاورهوم مكيخرجوش مزيان. واغلب الناس
عارفين ان التصاور د الكاميرا مكتمثلش الشكل الحقيقي ديالهم .
خلينا من
الكاميرا دابا ايلا جينا المراية فكتكون متأكد انها غاتعكس الصورة الحقيقية و
الواقعية اللي نتا عليها، ياك ؟ صحيح هادشي ؟!
لا، هادشي خاطئ كليا ، الطريقة اللي العين ديالنا
كتلاحظ بيها الحوايج مختلفة بما فيها الصورة ديالنا فالمراية اللي كيوقع ليها
تغييرات، اييه تغييرات و كاتوقع قبل كاع مانشوفو الحوايج والعقل هو اللي مسؤول
على هادشي
.
اللي باغي نقول
هو راه ممكن تشوف راسك فالمراية ولكن محال واش تقدر تشوف راسك كيما كتبان فالواقع!
هادو هوما الاسباب الخمسة اللي عليها المراية ماتقدرش تقوليك كيفاش كتبان :
الادراك و الملاحظة ديالك مشتتة
العقل ديالك
ديما كيغير الصور قبل ماتشوفها ، متيقتينيش ؟ نعطيك مثال : ضروري شي مرة تكون شفتي
فيها شي واحد عزيز عليك من بعيد او ملي كتقرب عندوا كتلقاه ماشي هوا!
عقلك كيغير
الاشارات البصرية اللي كيتلقاها و كتولي تشوف شي حاجة اخرى مغيرة . يعني ايلا
كاتظن انك غليظ فغتشوف راسك غليظ فالمراية هادشي اكيد واخا تكون ضعيف فالواقع .
زيد على هادشي كاين شي ناس عندهم مرض كيتسمى فقدان الشهية العصبي ، علميا هادو كيشوفوا راسهم فالمراية بطريقة مختلفة على الناس الاخرين.
كتشوف الحوايج اللي كتخاف منهم
مثلا ايلا كتخاف من الكلاب ، انا متاكد تكون وقعات ليك اكثر من مرة انك تتخيل شي صاك ولا اي حاجة انها كلب . الملاحظة ديالنا ديما منبهة من العقل ديالنا باش نتمكنو من الخوف بسرعة وبالتالي نقدروا نحميوا راسنا من اي تهديد ممكن . دابا ايلا كتخاف من التقدم في السن غالبا ماغتشوف راسك شرفتي فالمراية وخا تكون مزال شاب.
التركيز على شنو ماباغيش
بمجرد ايولي
عقلك كيركز على شي حاجة فهي كتولي اكبر و اهم مقارنة مع الشكل الحقيقي ديالها .
مثلا ايلا
مكتبغيش شي "ندبة" فوجهك فمن الاكيد انك غتشفها اكبر حجما . نفس الشيء
كيوقع ملي مكتبغيش ملامح الوجه ديالك فكتولي كاتشوفهوم بطريقة مختلفة على الطريقة
اللي الناس تيشوفوها.
تجاهل معلومات مهمة
ملي ماكاتبغيش
شي واحد ، غالبا كتولي كتجاهل كاع الحوايج المزيانين اللي كيدير وكتركز غا على
الحوايج الخايبين ، نفس النوع من التجاهل كيوقع مع الوجه والجسم . اي ان الناس
اللي ماعاجبهمش راسهم كايتجاهلوا الحوايج الزوينين فراسهم وكيركزوا على الخايب
فيهم.
المزاج ديالك كياثر على الرؤية ديالك
للحوايج
ايلا شفتي
فالمراية بعد ما دزوتي شي امتحان مزيان ولا حققتي شي نجاح كيما كان فغتشوف راسك
زوين و حسن ! اجي دبا ملي تكون محطم او مامزيانش فمن المؤكد انك تشوف راسك من عدسة
اخرى عكس الحالة اللولة.
اذن فالاخير ، كاع هاد الخدع العقل هو اللي كايديرها لينا لذلك حاولوا تبقاو على حذر منهم باش متبقاوش تكولو انكم مازوينينش.
إعداد إلياس الكبيري
