من إعداد:أنس حصاري
أغلبية الناس ما عنهدمش حتى فكرة منين جا الانترنت ولا اشنو هو الانترنت,وهو شيء عادي ماشي شي حاجة مهمة و حنا غير ملزمين أننا نعرفو الانترنت منين جا لأن بحال مثلا ايلا سولتي شكون اخترع الستيلو اللي كانستعملوه دابا ولا سولتي شكون اخترع المرحاض الشائع دابا الى آخره هاد الأشياء فعلا عندها مخترعين ولكن ما كانبرزطوش راسنا معا شكون صايبهم لأنها ضمن الأشياء اللي كانستعملوها يوميا و ما كانسولوش على كيفاش جات للوجود,نفس الشيء بالنسبة للأنترنت إذا فهاد الموضوع غادي نتكلمو على الانترنت كيفاش جا و امتا جا و شكون صايبو و كيفاش كايخدم
آشنو هو الأنترنت؟
في السبعينيات من القرن الماضي كل من
Bob Kahn & Vint Cerf
بداو خدامين على الهيئة ديال هاد الميكانيزم اللي كانسميوه دابا الانترنت و هاد الانترنت دابا كان نتيجة ديال واحد التجربة أخرى سميتها
ARPANET (Advanced Reaserch Projects Agency NETwork)
اللي كان مشروع ديال وزارة الدفاع الأمريكية,البنتاغون,ديك الساعة.
Paul Baran
واحد من بين أكثر الناس ذكاء فمجال المعلوميات الاتصال,كان كايقلب على طريقة لبناء نظام معلوماتي اللي يقدر يصمد ضد هجوم نووي,بحيث أنه بعد ما كانت الاتصالات كلها عندها مركز واحد كما كايبان في الصورة على اليسار و يكفي أن هاداك المركز يتعرض لهجوم باش يطيح النظام كامل قام الدكتور بول بإنشاء نظام موزع ما عندوش واحد النقطة مركزية و في حاجة فشل عنصر من هاد النظام ما غاديش يتضرر النظام كامل
فبالتالي فالأخير حصلنا على واحد النظام مكون من مجموعة من الوحدات اللي هي عبارة عن حواسيب اللي ما مرتبطاش بحاسوب مركزي بل مرتبطة ما بيناتها و تقدر ترسل المعلومات فجميع الاتجاهات مع إمكانية ديال أن هاد الحواسيب ما متعلقش واحد بالثاني,و هاد الحالة هي تماما اللي خدام عليها الانترنت اليوم
واش كاين شي واحد مسؤول على الانترنت؟
طبعا جاك هاد السؤال ديال شكون هو المسؤول على الانترنت شكون هو صاحب الانترنت شكون مولاه؟
كين اللي غادي يقول الحكومة,كين اللي غادي يقول شركات الاتصال,كين اللي غادي يقول الدول الكبرى الخ الخ الخ
فالحقيقة حتى واحد ما مكلف بالانترنت,الانترنت كايبقى واحد النظام قائم بحد داتو البيسي ديالك متصل بواحد الشبكة متصل بيها حتى الهاتف ديالك و ديال صاحبك و ديال صاحب صاحبك و العالم كامل و هاكدا كلشي متصل مع كلشي و كلشي يقدر يهدر مع كلشي و حتى واحد ما كاتحكم فكلشي بهاد البساطة بحال هاد الشكل اللي فالصورة
,ديما كانبغي نشرح هاد المسألة بالعلاقات الاجتماعية بين الناس فأنا كانعرف صاحبي و صاحبي كيعرف صاحبو و أنا كانعرف صاحبو و العلاقات هاكدا غادا و كتمتد و لكن شكون مكلف بهاد العلاقات؟ حتى واحد العلاقات مكلفة براسها,اوك صافي غادي نوليو فالفلسفة ايلا كملنا هاكدا,نرجعو لموضوعنا
كيفاش خدام الانترنت؟
كيفما قلنا الانترنت شبكة فيها بزاف ديال الشبكات فيهم بزاف ديال الشبكات,نتمنى ما نكونش دوختكم تال هنا راه صعيب نشرح هادشي ,الوغ سوا كنتي متصل من بيسي ولا بورطابل,الجهاز ديالك كايتاصل بـ
ISP (Internet Service Provider)
مثلا اتصالات المغرب ولا ميديتيل ولا اينوي,و هاد الآي إس بي كايقوم بربطك مباشرة مع بلايين الأجهزة الأخرى اللي كاينة فالانترنت حول العالم عبر مئات آلاف الشبكات اللي كلهم متصلين ما بيناتهم,حاجة اللي الناس ما كيفهموهاش مزيان هي أن الانترنت بنيويا غير مهم بقدر التقنية المستعملة اللي هي عبارة عن
Protocols
البروتوكولات هي ببساطة مجموعة من القواعد و القوانين المعروفة اللي كاتخلي الأجهزة ديال هاد الشبكات كاااملين يتواصلو بيناتهم من غير مشاكل
هاد المسألة ديال البروتوكولات كايرجع ليها الفضل فكون أن رغم اختلاف الأجهزة و التقنيات المستعملة فهاد الأجهزة يمكن ليهم يتواصلو بيناتهم بدون مشاكل,بحيث ان بيسي أتش بي يقدر يتواصل مع بيسي ديل بدون مشاكل و هاتف يقدر يتواصل مع حاسوب بدون مشاكل و سرفر مع هاتف بدون مشاكل لأن القوانين المعتمدة فالاتصال كاتبقى نفسها بمعنى آخر نفس البروتوكلات كايتم الاستعمال ديالها
جميع الأجهزة على الانترنت عندها عناوين كاتميزها,و عنوان فالانترنت هو مجرد رقم,بحالو بحال رقم الدار ولا رقم البورطابل ديالك,و جميع الاجهزة اللي على الانترنت عندها واحد
الاتصال بين جهازين على الانترنت كايشبه تمام الاتصال على أرض الواقع بحيث أنك ما خاصكش تكون كاتعرف الشخص بحد ذاتو باش ترسل ليه رسالة و إنما خاصك تكون كاتعرف العنوان ديالو و كيفاش تكتب العنوان و البيانات ديال مقر هاداك الشخص بشكل صحيح باش يت التوصيل ديالها بشكل سريع و بدون مشاكل,نفس الشيء فالانترنت و كايتعمد على واحد من أهم البروتوكلات على الانترنت اللي هو الآي بي
IP(Internet Protocol)
الوغ,نتا فاش كاتدخل لشي موقع الكتروني,فالعملية كاملة مجرد الجهاز ديالك كايرسل ميساج للسرفر اللي فيه معلومات الموقع باش هاداك السرفر يجاوبو,الميساج كايكون فيه الآي بي ديال هاداك السرفر باش الرسالة تمشي ليه و كذلك الآي بي ديال الجهاز ديالك باش السرفر يعرف فين يجاوب
هاداك الآي بي تماما بحال العنوان ديال الدار ديالكم كل 3 أرقام فيه كايعنيو شي حاجة مثلا فعنوان داركم كاين جزء ديال المدينة من بعد جزء ديال الحي بعدو كاين ديال العمارة عاد ديال الدار,تماما بحال الاي بي 3 ارقام اللولة كاتشير للبلاد 3 أرقام الثانية للجهة,3 ارقام التالثة للشبكة ديالك و الأخيرة ديال الجهاز ديالك بالتحديد
هاد النسخة من الآي بي و اللي كانستعملوها حاليا سميتها
IPv4
تم الاختراع ديالها سنة 1973 و الاعتماد ديالها سنة 1980 و كاتعطينا عدد ديال الاحتمالات ديال 4 المليار ديال الأي بيات المختلفة,و لكن بتطور التكنولوجيا و التعداد السكاني 4 المليار ما بقاتش كافية لينا,و عنا صايبنا واحد النظام جديد سميتو
IPv6
اللي البنية ديالو هاكدا
fe80::6d9b:599f:7b84:158c
و كايعطينا الحق اننا نعطيو عناوين كافية لـ340 دزليون جهاز و هاد الرقم كافي باش تكون عند كل حبة رمل فالعالم كامل آي بي ديالها خاص و ما زال يشيط
جل الناس ما كايهتموش بالآي بيز اللي كاينين في الانترنت و لكن واحد الحاجة سميتها
DNS(Domain Name System)
كاتهتم بيهم و كون ما كانتش كنتي غادي تهتم لأنك كنتي خاصك تحفظ الأي بي ديال غوغل باش تدخل ليها و ماشي تكتب غير
www.google.com
الوغ,هاد الدي إن أس هي اللي كاتقول بربط الكلمات اللي دخلتي نتا فالبراوزر ديالك,غوغل كروم ولا موزيلا ولا شوف اللي كاتستعمل بالآي بي ديال هاداك الموقع اللي نتا باغي تدخل ليه
الوغ,نتا فاش كاتدخل شي سيت فالبراوز ديالك البراوزر ديالك كايستعل الخدمة ديال الدي ان اس باش يعرف الايبي
أمممممممم عرفتي شنو,أجي ننفخ ليك راسك مزيان باش تفهم شنو هو
DNS
ألوغ,نتا فاش كاتكتب
www.google.com
راك كاتقلب على
www.google.com.
شفتي هاديك النقطة اللي كاينة فاللخر؟ آه هاديك هي اللي عليها كلشي
ما كانتيش عارفها؟ سير جربها كتب شي سيت ووراه كتب نقطة هاني غادي نتسناك حتى تجي
..................................
اوك باراكا,دونك,فاش كاتكتب هاداك السيت ديالك ووراه نقطة البيسي ديالك و البراوزر ديالك كايشوفو واش ديجا عندهم الآي بي ديال هاد السيت اللي باغي تدخل ليه,يقدر يكون فالسيستيم ديجا ولا يقدر يكون فالكاش ديال البراوزر
Cach memory
الوغ نديرو حنا ما عندوش لا هو لا السيستم,ديك الساعة السيستم ديالك ديجا كايكون عندو واحد الحاجة سميتها
Resolving Name Service
اللي غالبا كاتكون عاطياه ليك شركة الاتصال اللي نتا معاها,و هاد الار إن إس كايقوم بعملية البحث على الاي بي ديال السيت اللي دخلي نتا مثلا غوغل,ألوغ كايمشي عند الروت أو
Root Name Server
اللي كايكون فيه جميع البيانات على الدومينات دائما خليو فبالكم هدشي كامل مجرد حواسيب كبيرة كاتقوم بمهام كبييييرة
غادي نسميو
Resolving Name Service = Ahmed
Root Name Server = Ali
باش نسهلو التواشا,ألوغ أحمد كايمشي عند علي كايسولو "عافاك واش عندك الأي بي ديال غوغل.كوم" علي كايقول ليه لا ما عرفتش و لكن عارف فين تقدر تلقا كاع الدومينات اللي عندهم .كوم فاللخر
أحمد كاياخد المعلومات اللي عطاه علي كايخزنها فالكاش ميموري ديالو و كايمشي فين قال ليه كايوصل عند السرفر اللي فيه .كوم
اللي كايتسماو
TLD(Top Level Domain Name Servers)
كايوصل عندو كايقول ليه ما عرفتش فيه كاين و لكن انا عارف فين كاين السرفر ديال
google.com
أحمد كاحط المعلومات الي قال لي التي إل دي فالكاش و كايمشي عند فين قال ليه طبعا كايلقى السرفر و هاداك السرفر كايقول ليه وي انا عارف اشنو هو الاي بي ديال غوغل.كوم هو
172.217.22.164
جربوه فالبراوزر ديالكم و شوفو
احمد كايدير هاد الأي بي فالكاش ديالو و كايرجع يجري عند السيستم ديالك و السيستم كايعطيها للباروزر و كايطلع ليك نتا السيت اللي بغيتي,هادشي كامل كايوقع فجزء من الثانية
لحد الآن هادشي هو اللي خاصكم تعرفو كأساسيات على الانترنت و كيفاش خدام الانترنت بالنسبة للناس اللي عندهم أي تساؤل بخصوص هاد الموضوع يمكن ليهم يراسلوني على الحساب الشخصي ديالي ولا على الصفحة ديالنا تمنياتي ليكم بالتوفيق
^_^
