كلام على الراپ "الجزء الأول": N.W.A

اشنو كاتعرف على Rap؟ او ان صح القول Hip Hop؟ من غير JayZ و Kanye West و Lil' Wayne و G-Eazy, و لا حتى... Desiigner؟ 

بكل صراحة مزيان تكون عارف هادو، تكون كاتسمع ليهم في HitRadio ملي تكون في الطوموبيل و لا في الطوبيس و لا غير ذلك... و لكن،  اذا كانتي كاتحصر الراپ كامل غير فهادو للي قلت ليك، راك كاترتاكب خطأ كبير، لأنك مازال ماكاتفرقش ما بين Rap التسويقي و المادة الخام للهيپ هوپ.

لان الراپ يمكن لينا نقسموه لدرجات، لعدة اصناف و انواع حسب الحقبة الزمنية و الكلمات و الستيل الخ... ولكن كاينة واحد البلاصة في هاد الترتيب للي عمرها ماكاتبدل، و مالينها ماكايتزعزعوش منها. اذا تخيلنا قصة الراپ كهرم غادي تكون هاد البلاصة هي القاعدة ديالو، للي واقف عليها هادشي كامل للي كانسمعو دابا في يوتوب و الراديو و التلفاز الخ... اهم من كاين في هاد البلاصة هم ناس California, L.A.

في الثمانينيات، ملي كنتي كاتعتابر مجرم غير بمجرد انك اسود البشرة، افريقي الاصل, هاد الناس للي العمر ديالهم ماكانش كايتعدا 20 سنة خدمو لاول مرة عقلهم خارج نطاق المخدرات و المافيات الخ... و حسو براسهم بلي عياو من العنصرية و التهميش.

واحد السيد سميتو Eric ساكن في Compton كان مسمي راسو Eazy-e قدر يقنع مجموعة من الشباب باش يتجمعو و يكونو غروپ ديال الراپ سنة 1986, و عرفتو شنو؟ هاد الشباب كاتعرفوهم واقيلا اذا كنتو من عشاق Holywood.

عرفتوهم؟ او على الاقل، غادي تكونو عرفتو Ice Cube و Dr.Dre. 

هاد الناس للي كانو كايغنيو تحت اسم N.W.A, كانو كايتعتابرو اخطر مجموعة بشرية في العالم، طبعا حسب ما كانت كاتقول الحكومة الامريكية.

علاش خطر؟ كانو اول من '''خسرو الهضرة'' ديال بصح فشي مقطع موسيقي، اول من بداو واحد النوع موسيقي جديد سماوه ب Realistic HipHop, و معنى ذلك انهم كايغنيو على داكشي للي كايعيشو و كايشوفو في الشارع، بما في ذلك العنصرية، المواجهات الدامية مع البوليس للي ماكايحملش سود البشرة، الفقر، التهميش... لدرجة انهم اول آلبوم ديالهم و للي كان سميتو Straight Outta Compton خلق واحد الضجة خطيرة في الاوساط الامريكية، و تسبب ليهم في مشاكل كبيرة مع FBI للي كانو كايصيفطو ليهم انذارات باش مايبقاوش يغنيوه بتاتا، و السبب؟ الآلبوم كانت فيه واحد الاغنية سميتها Fu*k Tha Police, للي كان فيها كلام قاصح موجه مباشرة للشرطة و للي كسبو من خلالها عطف الجماهير و غضب الحكومة.

هاد الاغنية الثورية كان اللحن ديالها صاوبوه كل من Dr.Dre و Yella اما الكلمات فكتبهم كل من Ice Cube و MC Ren. 

ها هي الاغنية للي كاندويو عليها، بانت في 1988.

و هذا مقطع ممثل من فيلم Straight Outta Compton كايبين الغروپ كايغنيها مباشرة من بعد ما كانو البوليس منعوهم باش ينطقو بيها كليا...

المجموعة غادا تبقا صامدة و اقوى من السلطات، و الناس غادين يبقاو يشريو الاقراص ديالهم حتى غادي يبلغو واحد الذروة خيالية و بالتالي فهذا غادي يكون مؤشر على ان الناس عجبهم هاد الستيل، و بما ان الميريكان دولة "الديمقراطية و الحريات" غادي تخليهم ينشرو الآلبوم ديالهم، و هادشي علاش باقي نتا لحد الان تقدر تمزك ليهم.

كانعرفو بلي في كل مجموعة كاتفوت 3 ديال الناس، ملي كاتوصل للقمة، اعضاءها كايوليو يشوفو راسهم نجوم و اكبر من البلاصة للي كايتواجدو فيها، كايبداو المشاكل المادية... كل واحد كايوللي باغي يشد اكثر من داكشي للي مخصص ليه، و هادشي عادي، و لكن للي ماشي عادي هو انه هادشي وقع بين افراد مجموعة N.W.A... و بدا اساسا مع Ice Cube للي فكر مع راسو، و لقا بلي الراتب للي كايشد اقل بكثير من قيمة الكلمات للي كايكتب، و هادشي لاش في سنة 1989 خرج من المجموعة و بدا مسيرة ديالو بوحدو. كانت هاذي بطبيعة الحال ضربة موجعة للمجموعة و لكن هدشي مامنعهاش باش يكونو عندها اكثر المبيعات ديال الراپ، بحيت انه Dr.Dre بقا مكلف بتركيب الموسيقى و الالحان، و Eazy-E ولا هو للي كايكتب الكلمات و لكن بواحد الطابع هزلي و هادف في نفس الوقت.
في سنة 1991، غادا تزيد تشتابك القضية في N.W.A ملي غايعرف Dr.Dre بلي الصديق ديالو Eazy-E كايفصل و يخيط كيفما بغا مع الماناجر ديالهم بلا خبار افراد المجموعة، يعني كايتقاسمو بيناتهم و داكشي للي شاط كاياخدوه الناس ديال الغروپ للي بقاو، وهنا فين غايعرف بلي Ice Cube كان على حق ملي خرج من المجموعة.

الدراري للي كانو في N.W.A سابقا نساو الهدف النبيل علاش تجمعو النهار الاول اساسا، و ولاو كايكلاشيو بعضياتهم و كايخسرو الفلوس باش كل واحد فيهم يشوه صورة الآخر. للاسف، هادشي ماغادي يحبس حتال سنة 1995، ملي كلشي عرف بلي Eazy-E مابقا ليه والو و يموت بسبب السيدا, هنا فين Ice Cube و Dr.Dre مشاو شافوه في المستشفى و تما فين كل واحد فيهم اعتذر للآخر. 

مات Eazy-E تحديدا في 26 مارس 1995, و لكن واخا كل المشاكل، افراد المجموعة مانساوهش و كل واحد فيهم خرج اغاني صولو كايعتاذر فيهم ليه و كايذكر فيهم اسمه، لدرجة انه Dr.Dre في 2011، و تحديدا في اغنيته الشهيرة "I need a doctor" للي غنا مع Eminem, مانساش Eazy-E ملي زار القبر ديالو في اللخر ديال الڤيديو كليپ ديالو.

واخا هادشي كامل، هاد الاحداث كاملة و هاد المشاكل و كلشي... N.W.A كانو و مازالين قدوة لأقوى مغنيي الراپ للي كانعرفو دابا و اهمهم Eminem للي ذكرهم ماشي مرة و ماشي جوج في الاغاني ديالو قائلا بلي هوما منين كايتآنسبيرا...

هنا كانشوفو Eminem لابس T-Shirt ديال N.W.A في شي آداء لايڤ ديالو.

يتبع...