إعداد عبدالله الشعيبي
سلسلة العظماء، غانهضرو فيها على الشخصيات المؤثرة فالتاريخ فالميادين العلمية، السياسية، الفكرية و الدينية. فالحلقة الاولى غانهضرو على الفيزيائي نيكولا تسلا.
تولد نيكولا تسلا عام 1856 فكرواتيا، الأبوين ديالو من صربيا، الوالدة ديالو كان عندها ذكاء خارق واخا ماعمرها حطات رجليها فالمدرسة، نيكولا تسلا كان عندو واحد الذكاء كايشبه للام ديالو و كايستثمرو فالقراية ديالو، السيد كان كايحل التفاضل و التكامل ف راسو بسرعة لدرجة أن الاساتذة كايسحاب ليهم واش كايغش.
نيكولا تسلا كفسها ف لافاك، ماكملش قرايتو فالجامعة ديال التكنولوجيا فالنمسا حيت كان مبلي بالقمر و كان ديما مقربلها مع الأساتذة ديالو واخا كان متميز بزاف و هو مول فكرة الحقول المغناطيسية لي بفضلها قدرنا نشوفو المحرك الكهربائي لي باقي خدامين بيه لحد الآن.
رجل الأعمال و المهندس George Westinghouse شرا براءات اختراع من تسلا ديال المحرك لي كايخدم بالتيار المتناوب الشيء لي غاينوض حرب بين تسلا و توماس إديسون، حيت إديسون كايخدم بالتيار المستمر فالأجهزة ديالو.
منين باع تسلا براءات الاختراع جمع شويا د الفلوس و دار مصنع ديالو، و هنا فين دار سلسلة واعرة ديال الاختراعات و الابداعات، ف عام 1898 اخترع أول لعبة كاتحكم بيها ب تيليكوموند و هي عبارة عن قارب مصايب من الزجاج كايمشي فوق الماء و كاتحكم بيه من بعيد.
تسلا أيضا اكتشف واحد الألاعيب سميتهوم "الأمواج الأرضية المستقرة"، شنو هي الموجات الأرضية المستقرة عاوتاني ؟ -_- الموجات الأرضية المستقرة هي واحد الاثبات دارو تسلا، هاد الاثبات كايقول أنه يمكن لينا نستخدمو الأرض ك موصل للكهرباء باستخدام ترددات كهربائية معينة و بهاد الطريقة نيكولا تسلا قدر يشعل 200 بولة (مصباح) على بعد 40 كيلومتر .. بلا سلك بلا والو. هاد السيد كان كيحماق على الكهرباء، صايب شرارات ديال البرق اصطناعية، كاين لي وصل الطول ديالها حتال 41 متر !
ف عام 1900 بدا تسلا الخدمة ف برج ديال الاتصالات اللاسلكية ! 70 عام تقريبا قبل من البورطابل، و لكن ماكملش المشروع بسبب انعدام التمويل. و لكن واخا هاكاك نيكولا كان هو أول واحد كايسيفط و يستقبل الموجات الكهريطيسية، و أول واحد فكر فالنقل اللاسلكي للطاقة و الموجات + استخدام التيار المتناوب فبلاصة التيار المستمر و اختراع المحرك الكهربائي خلّا جميع الفيزيائيين لي من بينهم آينشتاين يركعو احتراما لهاد السيد و سمّاو وحدة قياس شدة الحقل الميغناطيسي ب سميتو ...
つづく
