عمرك فكرتي فشناهي أكثر الألغاز الغامضة لي تمشات على سطح الأرض؟ لاماشي هما الديناصورات أولا شي مخلوقات من ما قبل التاريخ. بلا مايمشي عقلك بعيد، شوف فلمرايا و غاتعرف الجواب.
إيه، جسم الإنسان و مجموعة من الوظائف ديالو مازالة خفية و غامضة ومن شحال هادي وهي متلفة العلماء، رغم أننا قدرنا نوصلو لبزاف ديال الإكتشافات إلا أن العلوم مازال كاتجهل بزآآف ديال لحاجات على الجسم ديالنا، و مازالا بحال شي لغز أو كتاب مسدود!
هنا غادي نحاولو نعرفوكم على بعض الحقائق ديال وظائف جسم الإنسان لي مازال العلماء، الباحثين، والفلاسفة كلهم كيقلبو على السبب المنطقي ديالها و منها:
1- وجود المكروبات Presence of Microbes:
فكل خلية فجسمك كاينة على الأقل 10 ديال المكروبات عايشة فيها. شي مكروبات بحال E.coli, Bacteroides fragilis, clostridia لي كاينين فالأنف، الفم، الجلد، والجهاز الهضمي ديالك. هاد الأنواع تيعاونو فعملية التمثيل الغذائي، وكيحميوك من بعض مسببات الأمراض، وكيعليو نسبة الفيتامينات وبالتالي تيخليوك سليم و صحيح.
المهم دابا حنا عارفين الأنواع و الأدوار المختلفة ديال المكروبات ولكن علاش كينين بداك العدد الهائل وشناهو سبب وجودها بالضبط، مازال لغز كايتسناو ويحلوه.
2- التثاؤب (التفويهة) - Yawning:
مع أنه كاينين بزاف ديال الأسباب وراء التفويهة. العلماء مازال مالقاو السبب الرئيسي.رغم أنها كتعلي نسبة الأكسجين، العلماء كيظنوأنها كتمنع العقل من أنه يبقى خدام وفايق.
عادة كتكون مرتبطة بالعياء، الملل، والنعاس ولكن بعض العلماء كيظنو أنها فقط موروثة من الأسلاف ديالنا، لي زعما كانو كيتفوهو باش يخلعو لخرين بسنانهم، أولا طريقة للتواصل. مهم مكينا تاحاجة كتبث صحة هاد النظريات. ولكننا عارفين أنها معدية بشكل كبير (وبحال والو راك كتفوه حاليا!)
3- النعاس و الأحلام Sleep & Dreams:
كنعرفو بلي قلة النعاس خايبة لصحتك، ولكن العلم مازال ماعرفش علاش أصلا خصنا نعسو. واحد النظرية كتقول بلي النعاس ضروري لتطور الدماغ و كيخلي الجسم يرتاح و يستعد للغد. ولكن إلا كان هدشي بصح علاش الدماغ كيبقا خدام وقيتة ديال النعاس كاملة؟
المهم، فاش كتنعس الدماغ كيبقا خدام و فايق، علاش و كيفاش مازال ماعرفنا. و لي كيزيد الغموض ديال هاد الظاهرة هو علاش كنحلمو و كيفاش كنحلمو وحنا ناعسين؟ كاينين بزاف ديال الأراء و النظريات حول هاد الموضوع، شي كيقول بلي الأحلام هي طريقة لتحليل الأشياء، حيث أنها كتعكس الأحاسيس و المبتغيات ديالنا. وتقدر تعاون تا فتشكيل الذكريات. المهم السبب الحقيقي وراء هاد الظاهرة مازال مامضبوطش.
4- الذكريات - Memories:
كيفاش أنك تقدر تذكر المذاق ديال الكيك لي كانت تاتقاد جداتك؟ أولا المعادلة الرياضية لي قريتيها هادي سنوات؟ مازال ماكاين تا شي جواب كيفاش يمكن للعقل أنه يتفكر داكشي لي بغيتي فلوقت لي بغيتي فاش كتحتاجو؟ كيفاش كتشكل هاذ الذكريات؟ إوى هد الأسئلة كآآآملة مازال ماعندها تا شي جواب مطلق لحد الآن!
5- إحمرار الوجه (خجلا) - Blushing:
فاش كاتكون فشي موقف صعب غريب أو محرج، علاش كتحس بالفراشات فلمعدة ؟ أولا كيولي وجهك حمر و كطلع معاك سخونية فحنيكاتك فاش كيجاملك شي واحد أولا كيحرجك؟ تاهادشي مازال ماعرفنا علاش و كيفاش.. آه خصك تعرف بلي ماعندك كيدير تحكم بيها حيت لاإرادية!
6- المراهقة - Adolescence:
المراهقة هي بداية البلوغ لي كتبدا معاها تغيرات جسدية، بيولوجية، و نفسية لي كتبدل الجسم ديالك. الخبراء كيآمنو بلي هاد المرحلة كتوجد الدماغ للمواجهات و المسؤوليات لي تابعينو من بعد.
ولكن العلماء ماعارفينش بالضبط علاش بنادم كاياخد بزآآآف ديال الوقت باش ينضج جسديا و يكون قادر يواجه التحديات ديال الحياة؟
وحنا عارفين بلي بزاف دابا كيدوزو من هاد المرحلة و باغيين يعرفو الجواب.
7- الحدس - Intuition :
شنو داك الشعور لي كيقولك واش تقبل بداك العرض دالخدمة ولا لا؟ أولا كيخليك تحس بلي شي حاجة ماشي هيا هاديك؟
كاين لي كيسميه البديهة، أو الحاسة السادسة و كاين لي كيظن أنها مجرد صدف لا غير. كاينين بزاف ديال النظريات لي كيوصفو الحدس بلي راه إحساس أو إدراك باطني. ولكن هادشي ماكايشرحش كل المعتقدات و الحالات لي كنعيشوها. لذلك هاد المسألة مازال جاري عليها البحث.
8- الدماغ - The Brain:
الوظيفة و الخدمة ديال الدماغ و الجهاز العصبي كامل يمكن هو أكبر عائق و لغز كايواجهوه العلماء حاليا.
كفاش كيخدم الدماغ بسرعة كبيرة؟ و واش كيخدم بوحدو أولا معتامد على أعضاءأخرى؟ شنو كيوقع لبنادم فاش كيكون شي خلل فالدماغ ديالو أو الجهاز العصبي؟
إوا هاد الاسئلة كاملة مازال ماعندها تاشي جواب مطلق!
حاليا ولينا كنعرفو بزاف ديال لحوايج على الدماغ، ولكن داكشي كآآآمل راه غي الطرف ديال جبل جليدي.و الرحلة لفهم الدماغ و الوظائف ديالو مازالا طويلة بزاف.
هاد الحقائق و الظواهر كنعيشوها كل نهار و ضرورية للعيش ديالنا. المهم دابا كنتمناو أن شي نهار العلم يقدر يجاوب على هاد الأسئلة و يلقى الحل لهاد الألغاز ديال جسم الإنسان!
إعداد : صبرا موحي
