السلام عليكم,مرحبا بيكم فمقال آخر و فمعلومات جديدة اللي نتمناو أنها تكون جديدة عليكم,فهاد المقال ديال اليوم,غادي نهدرو على أقوى و أخطر 10 هاكرز عرفهم العالم , غادي نبداو من الأقل خطورة إلى الأكثر خطورة,نبداو
Kevin Poulsen (Dark Dante)-10
كيفن كان بدا النشاطات ديالو فالحقبة ديال الثمانينات تشهر عن طريق اختراق خطوط الاتصال ديال محطة الراديو في لوس أنجلوس KIIS-FM
بحيث أنه قام بوضع نفسو كالمتصل رقم 102 و ربح سيارة بورش 944 جديدة بالاضافة لعديد من الجوائز الأخرى,بعدما نفذ عمليات أخرى بدات الاف بي آي التحريات ديالها لكن لواحد المدة طويلة كيفن أختفى من الواجهة و ما بقاش كيانفذ أي عمليات
لكن فسنة 1991 تم القبض عليه
تمة الإدانة ديالو بسبع عمليات اختراق ايميلات هاجة و اختراق شبكات كيومبيوتر عالية السرية و تخريبها,بالاضافة إلى تبييض و سرقة الأموال,الهروب من العدالة,و كذلك الحصول على معلومات في غاية السرية من أجهزة الشرطة الفدرالية
حكمت عليه المحكمة بـ52 شهر في السجن اللي كانت أكبر عقوبة خادها هاكر فهاداك الوقت,الآن كيفن كايشتغل كمدير صحيفة وايرد نيوز
Albert Gonzalez-9
آلبرت كونزالس قام بالتخطيط و تنفيذ أكبر عملية سرقة لبطاقات بنكية و أجهزة بنكية فالتاريخ,بحيث أنه بين سنة 2005 و 2007 هو و فريق الهاكينغ ديالو قامو بسرقة و بيع أكثر من 170 مليون بطاقة بنكية و أرقام سرية,آلبرت و الفريق ديالو قامو باستعمال ثغرة كانت موجودة فأنظمة التشغيل ديال الأبناك
SQL Injection
بالنسبة للناس اللي باغين يعرفوها,لأنها لحد الآن كاينة فجميع الأبناك المغربية -_-
و قامو بإنشاء باكدوورز,معناه أنهم قامو باختراق النظام و صايبو واحد الباب خلفي فهاداك النظام باش يسهل عليهم العمليات وواخا يتم إصلاح الثغرة يبقى الثغرة الثانية اللي دارها هو صالحة,البطاقات تمة السرقة ديالها عن طريق
packet-sniffing(ARP spoofing)
فاش شداتو السلطات لقات عندو مليون و نص دولار أمريكي كاش,مليون منها لقاوه في أكياس بلاستيكية مدفونة فالباحة الخلفية ديال المنزل ديالو,و ف سنة 2010 تم الحكم عليه بـ20 سنة فالسجن الفدرالي
Vladimir Levin-8
هاد السيد دار داكشي ديال الأفلام,فسنة 1994 فاش كان خدام من الكومبيوتر ديالو فروسيا فلاديمير قام بتحويل 10 مليون دولار من حسابات حول العالم للحساب ديالو هو.
ولكن المسيرة ديالو كهاكر انتهت بسرعة,لأنه قام بعملية غبية نوعا ما و ماشي احترافية,بحال ايلا قال ليهم اجيو شدوني,فاش تم القبض عليه السلطات قدرات تسترجع الفلوس كاملا ما عدا 400 الف دولار,الطريقة اللي نهجها فسرقة الأموال كانت بسيطة للدرجة كبيرة
بحيث أنه كان كايخترق المكالمات الهاتفية و كايتصنت على المحادثات اللي كاتجرى داخل الأبناك أو هو كايتصل بالزبناء ديال الأبناك و كاتنكر على أساس أنه موظف فالبنك و يقوم باستخراج المعلومات من الأشخاص عن طريق الهندسة الاجتماعية.
Robert Morris-7
ف نوفمبر 1988 روبرت قام ببرمجة دودة, اللي هو نوع من الفيروسات,هاد الدودة اللي قام روبرت بالبرمجة ديالها قضات على 1/9 من الإجمالي ديال الأنترنت,قامت بإفساد أكثر من 6 آلاف كومبيوتر و شبكات كومبيوتر,الشرطة الدولية ما تعدباتش باش تشدو
لأنه واحد النوع من الهاكرز كايبغي يبين راسو و يقبلو المجتمع على أنه هاكر ,و هذا هو الخطأ اللي دارو روبرت بحيث أنه أشهر قبل ما يقوم بإطلاق البرنامج الخبيث ديالو بقا كايهدر عليه بزاف على الانترنت,بعد ما تم القبض عليه اعترف للشرطة أن العملية كانت فقط مجازفة , وا أنه ندم بزاف حيت تسبب فخسارة تقدر ب 15 مليون دولار
لحسن الحظ ديالو أنه جا فواحد الفترة اللي تم فيها تعديل للقانون بخصوص الجريمة الالكترونية و تم الحكم عليه فقط ب غرامة مالية و حاليا هو كايشغل منصب عالي فكلية الهندسة الكهربائية و العلوم المعلوماتية فولاية بوسطن.
Michael Calce(Mafia Boy)-6
في فبراير من سنة 2000,مايكل قام بشن هجوم جد كبير من نوع
DDos
على شركات كبيرة بزاف هاد الشركات كانت هي : ياهوو,آمازون,ديل,إيباي و سي إن إن قام بختراق ياهو فاش كان عاد بدا و كان هو محرك البحث رقم 1 فالعالم و تسبب فغلق الخدمة لمدة ساعة تقريبا و كأي هاكر مايكل قام بالهجوم باش يتبث أن النظام غبي و غير محمي و باش يتهشر هو الفريق ديالو اللي كان ديك الساعة هو تي إن تي
فسنة 2001 المحكمة حكمت على مايكل ب 8 أشهر سنة من الخدمة الاجتماعية و المنع الكلي من استعمال الانترنت و غرامة مالية بسيطة.
David Smith-5
الشهرة ديال سميث راجعة لكونه المبرمج ديال فيروس ميليسا اللي كاتعتابر من أخطر الفيروسات اللي انتشرت عبر الايميل فالتاريخ,بعد القبض عليه سميث اعترف ان البرنامج اللي صايب كان الهدف ديالو فقط الانتشار و ماشي الحاق الضرر بالأجهزة الخدمة ديال الفيروس كانت هي أنه فاش كايقوم بالدخول لشي جهاز كان كايخلي هاداك الجهاز يرسل لجميع الأجهزة اللي معاه فالشبكة فيروسات آخرين و هاكدا و هي غادا حتى وصلات لتقريبا 3 مليون ديال الأجهزة أو أكثر,و كان سميث هو الهاكر الوحيد اللي دخل للحبس الفدرالي بسبب فيروس كاينتاشر على الإيميل ولا كيفما كايتسماو
E-mail Viruses.
Adrian Lamo-4
كايتسمى الهاكر الفقير,آدريان كان كايستعمل السيبيرات و المكتبات و كذلك المقاهي باش يقوم بالعمليات ديالو,آدريان قام بإختراق
عدد كبير من الشركات المعروفة عالميا,منها ياهو نيو يورك تايمز,مايكروسوفت,و العديد ,قام بوضع الاسم ديالو فقاعدة بيانات نيو يورك تايمز و تخريب عدة ملفات مهمة,و طبعا تم القبض عليه بعد جهود كبيييييرة,لأنه ما كانش عندو مكان محدد منين كايقوم بالعمليات,بعد ما قام بتسليم نفسو للشرطة الفيديرالية,كان خاصو يخلص غرامة مالية ديال 65 الف دولار و الحبس المنزلي لمدة 6 أشهر بالإضافة بسنتين ديال إعادة التأهيل كما أنه قام بإخبار الحكومة الأمريكية بإسم الشخص اللي كان وراء تسريب فيديوهات الضربات الجوية اللي كانت فبغداد سنة 2007 و اللي قام موقع ويكيليكس بالنشر ديالها,حاليا لامو كايشتغل كمحلل و كايقوم بعمل تطوعي لصالح منظمة غير ربحية
George Hotz-3
فنان الجيل-بريك لأجهزة الآيفون و السوني ,جورج غادي يبقى الاسم ديالو مطبوع فالتاريخ بسبب الاختراق اللي قام بيه لأجهزة البلاي ستيشن 3 , و لكن بعدها غادي يلقى راسو فحرب مع شركة سوني فالمحكمة بعدما قامت شركة سوني بمقاضاة هوتز قامت مجموعة أنونيموس بشن هجوم وااسع على شركة سوني قامت من خلالو بتجميد جميع الأجهزة و السرفرات ديالها,
و بسبب الاختراق اللي قام بيه جورج و اللي ورا الطريقة ديالو علانية,قامو هاكرز آخرين باختراق شبكة البلاي ستيشن و سرقة معلومات شخصية فيها بطاقات ائتمانية لـ77 مليون مستعمل,سكان المغرب فزوج على كل حال جورج نفى المسؤولية ديالو على أي من الهجمات اللي قامو بيها انونيموس و هاكرز آخرين على الشركة و قال فتصريح ليه :
"Running homebrew and exploring security on your devices is cool, hacking into someone else's server and stealing databases of user info is no cool"
Jonathan James (c0mrade)-2
جوناثان 16 سنة هو أول قاصر غادي يمشي للحبس بسبب عمليات هاكينغ فالولايات المتحدة,جيمس تشهر بسبب سلسلة الاختراقات الناجحة اللي قام بيها لأكثر من نظام واحد, فسن جد مبكرة كانت عندو فقط 15 سنة,و كان تخصص فاختراق الأنظمة المحمية بشكل كبير منها وكالة الناسا ووزارة الدفاع أي البنتاغون,كان سرق برنامج من الناسا كايسوى 2 المليون ديال الدولار,كذلك أخترق و تجسس على 3000 رسالة بالغة السرية بين موظفين وزارة الدفاع و سرق العديييد من الايملاات و الباسووردات الخاصة
سنة 2008 و فاش كان عمرو 25 جيمس أنتحر باستعمال مسدس
Gary McKinnon-1
هاد خينا هادا,التسليم,فسنة 2002 واحد الرسالة غريبة ظهرت على أجهزة جميع المحطات العسكرية الأمريكية مكتوب فيها " نظام الحماية ديالكم بحا الفضالات" و كذلك مكتوب فالرسالة , أنا خدام غير بوحدي و غاددي نبقا نبرزط فيكم الى أبعد الحدود,من بعد عرفو باللي المنفذ ديال هاد الهجوم كان هو مدير الأنظمة السكوتلندي غاري ماكينون
غاري كان كايعاني من واحد المرض نادر سميتو
Aspgerer's syndrome
اللي هو الأقل خطورة من النوعية ديالو , و اللي الآثار ديالو و الأعراض ديالو كاتطابق تماما الحالة ديال غاري,و اللي هي أنه كايفهم جميع الأنظمة المعلوماتية المعقدة و كاتجيه بحال الماء,المصابين بهاد المرض كايعانيو فالعلاقات الاجتماعية و لكن كايكون عندهم ذكاء خارق فمجال محدد,بالنسبة بغاري كان هو الأنظمة المعلوماتية
غاري اتهموه بأنه صاحب أكبر هجوم على الأنظمة العسكرية و الشبكات الخاصة ديال الولايات المتحدة من بينها الجيش,القوات الجوية,البحرية,الناسا,غاري عند التحقيق معه قال ليهم أنه كان كايقلب على معلومات كاتخص الفضائيين,لأنه كان كايظن أن الحكومة الأمريكية غادي تخزن معلومات بحال هادي فالأجهزة ديال الجيش
