دون أدنى شك، غادي تكون شي مرة سولتي راسك ولا شي واحد هاذ السؤال: بما أن الفلوس غير اشياء مادية و مصنوعة، علاش مانبقاوش نصايبوهم و نطبعوهم، و هاكذا غادي نوليو لاباس علينا!
بطبيعة الحال، الجواب للي كانلقاو دائما هو "لا"، غير أنه الأغلبية ماكاتكونش عارفا علاش. و ليوما غادي نفسرو ليكم بالتفصيل علاش لا...
غادي نبداو ملي بدات التجارة في القديم، بحيث أنه كانت فقط عبارة عن مقايضة و تبادل للسلع. هاذ الطريقة التجارية كانت مفيدة و مزيانة بطبيعة الحال، غير أنه كان فيها واحد المشكل و للي هو: اذا كانت عندك السلعة كثيرة باش تبادل فهادشي ماكايعنيش انك لاباس عليك و غني، لأن المقايضة كانت كاتعلق باحتياجات و متطلبات الأطراف للي داخلة فهاء التجارة، كمثال: أنا عندي القمح و نتا عندك البطاطس، نتا محتاج للقمح للي عندي و لكن أنا ماعندي ماندير بالبطاطس للي عندك... هنا غادي توقف تجارتنا.
داكشي لاش الإنسان ولا كايفكر في البديل، و هادشي جا مع اكتشاف المعادن النفيسة و بالأخص: الذهب. اكتشاف هاذ المعدن كان عبارة عن ثورة بالنسبة للبشرية ككل في جميع المجالات، بحيث انه في المجال التجاري و للي كايهمنا، ولا الذهب عبارة عن عملة كايتم تداولها في العالم كامل و للي كاتمكنك من انك تنخارط في اي تجارة بغيتيها... بمعنى آخر، اذا كان عندك الذهب كتير، راك كاتسما لاباس عليك، لأنه على غرار السلع العادية، كلشي محتاج لهاذ المعدن.
و لكن، كان واحد المشكل حتى مع هاذ الطريقة التجارية وللي هو: في هاداك الوقت، كان هناك مايعرف بالقوافل للي كاتمارس التجارة، و كانت كاتمشي في مسافات طويلة و معزولة و غير آمنة، داكشي لاش كانو غالبا ماكايتعرضو للسرقة و الاعتداء من طرف قطاع الطرق للي كايقصدو هاذاك الذهب المحمل من طرف القوافل. هنا فين ولينا كانفكرو في اننا نتاجرو بلا مايكون ضروري اننا نهزو معانا داك الذهب... وهنا، فين بانت الفلوس للي كانعرفو دابا. خاصك تعرف بلي الفلوس للي كاتهز معاك راها ماعندها تاشي قيمة، الدور ديالها هو أنها بحال وثائق كاتشهد من خلالهم الدولة أنه عندك هاداك القدر ديال الذهب مخزون، و أنه انت قادر انك تقوم بهاديك التجارة للي باغي دير... كمثال، نتا عندك 200 درهم و أنا عندي 100، اذا صرفناهم لذهب غادي تكون عندك كمية اكثر مني، ببساطة.
نفس المثال ينطبق على الدولة، بحيث انه المغرب مايقدرش انه يبقا يطبع لراسو في الفلوس حتى يشبع لأنه ببساطة خاص يكون عندو المقابل ديال دوك النقود كمخزون من الذهب. غادي تقول ليا و شكون غايحبسو؟ بالطبع تاواحد ماغايحبسو، و لكن غادي يتخلق ليه مشكل آخر و للي هو التضخم.
ملي المغرب غايطبع الفلوس بزاف، غايولي كلشي لاباس عليه، و الحاجة ملي كاتكتر ماكاتبقاش عندها قيمة... داكشي لاش ملي المغرب غادي يبقا يطبع الاوراق النقدية بذون التوفر على مقابلها من الذهب، غادي يعاني من التضخم، و الفلوس ماغاتبقاش عندها قيمة، و بالتالي، غادي تولي اذا بغيتي تشري مسمار، غايكون خاصك برويطا ديال الفلوس.
إعداد : جلال حميميد
