أولا و قبل مانبداو نهضرو على التيار الفكري لي سميتو الناتيريزم أو Naturism، غادي نهضرو على هاد الفقرة لي غادي نهضرو فيها بشكل أسبوعي على شي تيار من التيارات الفكرية فالتاريخ أو المعاصرة، و هاد التيارات الفكرية كاين فيها لي مرتبط بالدين، بالسياسة، بالاقتصاد، و بالفلسفة.
التيارات الفكرية على مر العصور كانت هي المحرك الأساسي للثورات الكبرى لي خاضها الانسان فجميع المجالات، هادشي لاش غادي نمارسو مهمتنا فنقل المعرفة ليكم بكل حيادية و موضوعية، و موقع "هل تعلم ؟ نسخة بالدارجة" ماعندو حتى رأي أو كايدافع على شي إيديولوجيا معينة، حنا كانقلو المعرفة وحسب، من الضروري التذكير نظرا للجرأة لي كاينة فهاد المواضيع و لي كاتمس جميع المجالات.
الناتيريزم : Naturism ولا مذهب العري او مذهب الطبيعة هو حركة ثقافية وفلسفية بانت على يد الالماني ريتشارد أونجويتر لي ألف كتاب سماه التعري عام 1906، هاذ الحركة اولا هاذ المذهب تايدافع على حق الانسان فممارسة الحياة ديالو بلا حوايج، بمعنى أن الانسان منين ختارع اللباس رتاكب جريمة ضد الانسان، لأن الحوايج حسب معتنقي المذهب، كايمنعو الجسم من الحصول على مجموعة من المنافع البدنية لي ممكن نلخصوها فحصول الجسم على اشعة الشمس، باش يستافد من الفيتامين D، زيد على داكشي تمتع الجسم بالهواء النقي…إلخ. بل كايعتابرو أن حركة naturism مجرد تصحيح للوضع الطبيعي للانسان، الشيء لي تايتافقو معاه علماء الأنثروبولوجيا لي كايفتارضو منطقيا أن البشر كانو تايعيشو عريانين فالأصل، دونك الحالة الطبيعية للانسان هي يعيش عريان ويكمل حياتو عريان، هاذشي لي ممكن و ربما استخلصوه واستنبطوه اليونانيين من شحال هادي، بالضبط قبل 3000 سنة، بحيت كانو تايمارسو مجموعة من الرياضات وهوما عريانين، من بينها المصارعة والملاكمة، حتى أن كلمة Gymnasium جايا من الكلمة اليونانية γυμνάσιον لي كاتعني تدرب العريانين، إلا أن اليونانيين كانو كايمنعو النساء من التعري.
باش نرجعو لموضوعنا لي هو ناتيريزم او المذهب الطبيعي، فالمنظمات لي كاتدعو لهاذ المذهب، ماكاتعتابرش هاذشي لي كادير عندو علاقة بالاباحية او الجنس، بل كاتعتابرو مُناقض لها بشكل كبير وهذا لعدة اسباب، من بينها ان الهدف ديالهم كان واضح منذ البداية، تصحيح الوضع الطبيعي للانسان، والتمتع باشعة الشمس والهواء النقي، والماء، وباش يبررو براءتهم من الدعوة الى الفحش والاباحة وضعوا قوانين اهمها المساواة والاحترام، بحيث خاص كل واحد معتانق هاذ المذهب يتقبل الاخر جسديا وعقليا وعاطفيا، باش تا عريان مايحس بالنقص، ويكون تقبل للجسم كيفما كان داير، ولكن واخا هكذاك هاذ الحركة الثقافية والفلسفية من نهار خرج اول كتاب تايدعوليها -كتاب التعري لريتشارد أونجويتر- تعرضات للنقد ولاقات واحد المعارضة من قبل النازية أولا ثم من قبل الكنيسة والأديان السماوية أونجينيغال، ولكن الرحلة ديال هاذ الدعوة ماتوقفاتش ومافقداتش الأمل ديالها، بل كملات طريقها خارج ألمانيا وسافرات لمملكة المتحدة و الولايات المتحدة الامريكية وكندا، والان كاينين مسابح وشواطئ خاصة بمعتنقي هذا المذهب فمجموعة من المناطق من بيها فرنسا والدول لي ذكرت سابقا، علاوة على ألمانيا لي بدات فيها ومجموعة من الدول الديموقراطية الحديثة.
باش نختم الموضوع هاذي لائحة ديال كتاب معتانقين مذهب الطبيعة :
Richard Ungwitter
Hans Surén
Heinrich Pudor
Adolf Koch
Paul Zummermann
Elton Raymond Shaw
ايلا عجبتكم الفقرة، يمكن ليكم تقتارحو علينا مواضيع أخرى أو تيارات فكرية أخرى نكتبو عليها، أو نشاركوها معاكم.
إعداد : زكرياء بلقاسم
