هاد الموضوع محير بزاف شي علماء واعرين كايقولو مستحيل و علماء واعرين كايقولو ممكن,اليوم و بطلب من الفانز ديالنا جينا نكتبو على هاد الموضوع واش السفر عبر الزمن ممكن؟
أشنو هو الزمن؟
كلنا كانسفرو عبر الزمن,فخلال السنة الماضية انا زدت عام للقدام و حتى نتا,و بطريقة أخرى حنا كانسافرو بواحد الوتيرة ديال ساعة فالساعة يعني كانعيشو الوقت بوقتو ما كانزيدوش القدام و ما كنرجعوش اللور
ولكن السؤال هو واش يمكن لينا نسافرو عبر الزمن بوتيرة أقل و لا أسرع من ساعة فالساعة ولا واش نقدرو نسافرو للماضي مثلا ساعتين فالساعة ولا 10 سنوات فالساعة و لا حتى 100 سنة فالساعة يعني اننا غادي نرجعو ولا نزيدو للقدام 100 سنة فقط فساعة من الزمان ديالنا الشخصي
أنك تفكر فالسفر عبر الزمن غادي يضرك راسك,آشنو غادي يطرا ايلا رجعتي للماضي و منعتي اللقاء ديالك الوالدين ديالك,ألوغ نتا راك منعتي راسك من الوجود!و لكن ايلا نتا منعتي راسك من الوجود فالمستقبل فمغاديش تقدر تسافر للماضي باش تمنعهم من اللقاء!ضرك راسك ياك
نظريات آينشتاين
فالقرن العشرين العالم ألبرت آينشتاين قام بتطوير واحد النظرية اللي سماها النسبية الخاصة,المضمون ديالها صعب الفهم لأانه ماشي شي حاجة اللي كانعيشوها يوميا و لكن العلماء قامو بدعم نظرية آينشتاين على أي,النظرية كاتقول أن الزمان و المكان هما مكونات ديال نفس الشيء اللي هو الزمكان,اللي فيه كين واحد الحدود ديال السرعة اللي هي 300 ألف كيلومتر فالثانية,و الضوء ديما كايمشي بحدود هاد السرعة فالفضاء
نظرية النسبية الخاصة كذلك كاتقول باللي واحد الحاجة رائعة كاتوقع فاش كاتحرك فهاد الزمكان خصوصا ايلا كانت السرعة النسبية ديالك للأشياء الأخرى قريبة لسرعة الضوء,هاد الحاجة هي أن الوقت عزيزي القارئ كايمشي ابطأ بالنسبة ليك مقارنة مع الناس اللي خليتيهم وراك,نتا ما غاديش تلاحظ هاد الأمر حتى ترجع لعند الناس اللي خليتهم فحالة تابثة
مثلا نتا كانت عندك 15 عام و خرجتي من الكرة الأرضية على متن واحد المركبة فضائية اللي كاتمشي بسرعة تقارب 99,5% من سرعة الضوء و خلال هاد السفر نتا حتفلتي فقط بخمسة ديال أعياد الميلاد ديالك فاش غادي ترجع للأرض و انت فعمرك 20 سنة غادي تلقى باللي صحابك اللي كانو قدك ولات عندهم 65 عام و متقاعدين و عندهم أحفاد,لأن الوقت كايدوز عندك أبطأ من ما كايدوز عندهم و نتا غادي تكون عشتي فقط 5 سنوات في حين أن صحابك غادي يكونو عاشو 50 سنة كاملة
ألوغ ايلا الرحلة ديالك بدات فـ2010 غادي تكون خديتي فقط 5 سنوات باش توصل لسنة 2060 في حين صحابك غادي يكونو قضاو 50 عام,يعني منطقيا نتا كنتي كاتسافر عبر الزمن
هادي طريقة باش نمشيو للمستقبل بوتيرة سرع من ساعة فالساعة
واحد النوع من السفر عبر الزمن كايطرا كذلك للأجسام فحقول الجاذبية,آينشتاين عندو نظرية سميتها النسبية العامة,اللي كاتقول على انا الوقت كايمشي ابطأ بالنسبة للأجسام اللي كاينين فواحد المجال ديال الجاذبية بحال هنا على الكرة الأرضية مقارنة بالأجسام اللي ما كايناش داخل هاد المجالات,معناه أن كاين واحد التشوه على مستوى الزمكان قرب الثقوب السوداء,فين الجاذبية تقدر تكون جد جد جد كبيرة
فالسنوات الماضية بعض العلماء استعملو هاد التشوهات فالزمكان باش يفكرو فطريقة ممكنة اللي تخليهم يصنعو واحد الآلة زمنية,وحدة بحال الفكرة ديال الثقوب الدودية اللي تقدر تكون طرق مختصرة عبر الزمكان,فكرة واعرة فالصراحة,و لكن ما زال ما عرفناش ايلا هاد الاختصارات كانت تقدر تستعمل من طرف أجسام حقيقية,على كل حال الأفكار مبنية على واحد الأساس علمي مما كايزيد فالمصداقية ديالها,المهم أنه من المستحيل على مسافر أنه يقدر يرجع للزمن باللور قبل ما يتم اختراع آلة زمنية
أنا واثق أن السفر للمستقبل ممكن,و لكن كايخصنا نطورو واحد التكنولوجيا جد متقدمة باش نوصلو ليه,نقدرو نسافرو مليون سنة للقدام و نزيدو فقط عام من العمر ديالنا خلال هاد السفر,على كل حال رحلة بحال هادي كايخصها واحد الكمية كبيرة بزاااااف ديال الطاقة,و لكن السفر عبر الزمن للماضي صعيب بزاف,و ما يمكنش لينا نفهمو العلم وراه بالضبط
كان هذا هو المقال ديالنا بخصوص السفر عبر الزمن نتمنى أن المقال كان مليئئ بالإفادة للجميع,و نتمنى كذلك أن المشاركات ديالكم تزيد,لأانه كل ما كانت مشاركات كثر كل ما كان عطاء أكبر,و شكرا على الوفاء ديالكم
إعداد:أنس حصاري
