بونسواغ,حاول تسد عينيك واحد 5 الدقايق و فهاد 5 الدقايق حاول أنك تتخيل شي لون جديد,لون ما كاينش ما كايعتمدش نهائيا على الألوان الأساسية اللي كينا أصلا اللي هي الخضر و الحمر و الزرق,ما ساهلاش ياك؟
علاش الإنسان ما يقدرش يتخيل ألوان جديدة؟
أول حاجة باش نجاوبو على هاد السؤال هو اننا غادي نهضرو على آشنو كايخصنا باش نتخيلو شي حاجة كيفما كانت,التخيل هي واحد القدرة عند الانسان,كاتخليه يشوف شي حوايج اللي كاينين ولا ما كاينينش فدماغو و لكن باش ينسج هاداك الخيال
خاص تكون عندو واحد الفكرة مسبقة على داكشي اللي غادي يتخيلو,بمعنى آخر خاص يكون شاف شي حاجة قبل ما يتخيلها
ما يمكنش تتخيل شي حاجة ما كايناش يمكن ليك تبتاكر شي حاجة انطلاقا من العناصر اللي نتا ديجا عارفها غادي نهضرو مثلا على
التنانين اللي هي مجرد اساطير عمرها كانت و لكن الانسان نسج عليها واحد الصورة معينة تنين عندو جناوح,كبير الخ الخ هادشي كامل ماشي نسج من الخيال 100% و إنما خليط ديال عناصر اللي هي اصلا متواجدة فمخلوقات أخرى الجناوح كاينين كائنات فعلية عندها جناوح رجلين و كاع المكونات ديال التنين يعني ان التنين ماشي شي حاجة جديدة 100% بالنسبة للانسان,مثال ايلا نتا عشتي فواحد العالم اللي تماما فقط بيض و كحل و رمادي ما فيهش ألوان ما غاديش تكون قادر انك تتخيل اللون الأحمر و لكن غادي تكون قادر أنك تتخيل رمادي بواحد الدرجة جديدة لأنه فقط مزيج من الألوان المحيطة بيك,مثال آخر غادي نسولك واش الانسان العمى,الضرير كايحلم؟ كيفاش انسان اللي عمرو شاف غادي يحلم بشجرة مثلا وهو عمرو شافها؟ هنا غادي نصدقو مدفكييين لواحد الموضوع آخر خليونا فالموضوع ديالنا,هنا فسرنا اشنو هو خيال و خرجنا بخلاصة ديال انه باش تتخيل شي حاجة خاصك تكون ديجا شفتيها
و باش تبتكر شي حاجة جديدة فالخيال من الضروري ان المكونات ديالها تكون ديجا شفتيها فشي عنصر آخر كاين فالطبيعة, هنا غادي نجيو لسؤال آخر اللي هو
واش كاين ألوان أساسية أخرى اللي ما كنقدروش نشوفوها؟
نعم,كاين زبالة ديال الألوان اللي الانسان ما كايقدرش يشوفها,لأن تركيبة العين البشرية كاتخليه يشوف فقط 3 ألوان أساسية و أي لون آخر هو فقط مزيج من بين هاد الألوان اذا الانسان كايشوف فقط الألوان اللي التركيبة الفيزيائية ديال العين ديالو كاتسمح ليه يشوفهم,كينين كائنات أخرى كاتشوف ألوان اللي الانسان ما يقدرش يشوفها على سبيل مثال الفراخ كايشوفو واحد اللون سميتو
xlue
الجواب ديال هاد السؤال صعيب و ما يمكنش نجاوبو عليه بواحد الطريقة قطعية ديال علاش؟ حيتاش...
و إنما خاصك تجمع بزاف ديال المعطيات مع بعضها باش تكون واحد الخلاصة مضبوطة, يعني أنه باش توصل لجواب خاصك تدوز بمجموعة من الاسئلة و ماشي سؤال واحد فقط علاش الانسان كايشوف الألوان اصلا؟ كيفاش الانسان كايشوف الألوان؟ واش كينين ألوان فالكون ديالنا اللي الانسان ما يقدرش يشوفها؟ فالأخير جميع هاد الأسئلة كاتقود السبب رئيسي واحد علاش ما نقدروش نتخيلو ألأوان جديدة لأنه ببساطة ما كانوفروش على البنية المناسبة على مستوى العين ديالنا,هنا الأسئلة عاد غادي يبداو يكثرو و يضروك فراسك واش الفضاء الخارجي فعلا اللون ديالو أسود كيفما كايبان لينا؟ واش السما فعلا زرقا واش الشمس فعلا لونها أصفر ساطع؟ واش البيسي ولا البورطابل اللي شاد نتا دابا فعلا اللون ديالو هو اللي كاتشوف,لا فقط العين ديالنا كاتخدعنا بألوان غير حقيقية,هنا غادي تحس براسك بحالا غايش فواحد الواقع افتراضي و غادي تعرف باللي القدرات ديال الانسان محدودة بزاف لدرجة أنه ما عارفش حتى اللون الحقيقي ديال البشرة ديالو,إلى هنا غادي نكونو كملنا المقال ديالنا على ,علاش الانسان ما يقدر يتخيل ألوان جديدة,غادي نخليكم تطرحو تساؤلات أكثر تعقيدا على راسكم,و شكرا على الوفاء ديالكم :)
إعداد:أنس حصاري
