القوة الخارقة اللي يمكن للجميع يكتسبها,باش نبدا و أشنو هي الخطوات اللي نتبع؟

مستحيل يختلفو زوج ديال الأشخاص على ان البرمجة شي حاجة واعرة كاتعطيك التحكم الكامل فالأجهزة اللي ضايرة بيك و كاتعطيك قوة خارقة كاتمثل فأنك

تخلي اي حاجة بنيتيها نتا فالخيال ديالك واقع كما انها كاتفتح ليك العديد من الأبواب فميدان الشغل,ولكن انا بغيت نتعلم البرمجة و لغات البرمجة باش نبدا؟

أول حاجة خاصنا نتافقو عليها هو أنه ما يجيش عندي شي واحد يقول ليا انا واعر فـ
HTML و CSS 

اذا انا مبرمج 

HTML

ماشي لغة برمجة و إنما فقط تقدر تقول واحد البنية اللي بيها كيتصايبو صفحات الويب و كايتعرفو و لكن ما يمكنش تقوم بعمل ديناميكي كلغات البرمجة الأخرى يعني ان هاد اتش تي ام ال ما يقدرش يحسب ليك 1+1 على كل حال نرجعو للموضوع ديالنا 

اللي هو باش نبدا ايلا بغيت نتعلم البرمجة 

علاش باغي تتعلم البرمجة

على حسب نتا اشنو باغي تصايب اولا اشنو باغي تدير,الخيار يمكن نتا تكون خديتيه مسبقا,مثلا باغي تصايب موقع الكتروني ولا تطبيق على الويب فهاد الحالة خاصك تهتم بالـ

HTML & CSS بالإضافة لـJava Script & PHP 

ولكن ايلا كان الاهتمام ديالك مركز كثر على برمجة التطبيقات ديال السمارتفون خاصك تمشي مباشرة تبدا تتعلم جافا بالنسبة لتطبيقات اندرويد و بالنسبة لتطبيقات الآيفون و أجهزة آبل  عامة تتعلم لسويفت

 ولكن ايلا كنتي  ما عندكش واحد الهدف محدد و إنما فقط بغيتي تبدا تتعلم البرمجة و اللي هذا هي البداية الآنسب باش تولي مبرمج و باغي تعلم لغات البرمجة على الاختلاف ديالها  من الأفضل انكا تبدا بالتعلم ديال اساسيات البرمجة 

و كيفاش تفكر كمبرمج,بهاد الطريقة ما يهمش باش غادي تبدا لأن ببساطة لغات البرمجة ما مختلفاش بيناتها بشكل كبير و ايلا تعلمتي وحدة يمكن ليك تستغل المعارف ديالك فأنك تتعلم وحدة أخرى

كبداية يمكن ليك تبدا بما يسمى بالـ"سكراتش" اشنو هو هذا السكراتش هي واحد البيئة ديال البرمجة كاتعتمد على تقنية

Drag & Drop

 هاد التقنية كاتستعمل مع الدراري الصغار ولا الناس اللي يلاه غادي يبداو لبرمجة باش يتعلمو  الأساسيات ديال التفكير البرمجي

من بعد يمكن ليك تبدا بلغة السي اللي انا شخصيا كانعتبرها احسن بداية رغم أنها صعبة الى حد ما ولكن بمجرد أنك تتعلم ليها غادي تلقى راسك مستعد انك تتعلم اي لغة برمجية كيفما كانت

أكثر اللغات البرمجية استعمالا للمبتدئين

أكثر اللغات البرمجية استعمالا اللي يقدر يشرع فالتعلم ديالها أي مبتدئ هي

C,JAVA,C#,Perl,Ruby and Python 

جميع هاد اللغات البرمجية هادي كاتدير نفس المحمات ايلا خدينا على سبيل المثال جافا فهي لغة كاتشتغل على جميع انظمة التشغيل و كاتستعمل فتطبيقات الويب روبي حتى هي تقدر تدير واحد القدر كبير بزاف من المهمات اللي كاتدار على الويب و حتى باثون كايخدم على لينكس و ويندوز المهم المغزى ديال الهدرة ديالي هو ان جميع اللغات متشابهة و ايلا بديتي بالصعيبة 

لاخرين غادي يجيوك ساهلين و غادي تزرب عليهم و داكشي بشوية بشوية 

هنا غادي نوريكم كيفاش كاتكتب 

Hello World
فكل من اللغات اللي سبق لينا و كتبناها باش تشوفو مدى التشابه اللي بيناتهم 

بهاد المناسبة نبغي ننوه لواحد المسألة بخصوص جافا  اللي كانعتبرها محرك الكرة الأرضية من ناحية الالكترونيات  و غادي نعطيكوم إحصاءات بهاد الخصوص, يا الله استعدو لكي ينفجر دماغكم

أكثر من مليار و 100 مليون حاسوب كايشتغل بجافا

أكثر من 930 مليون تحميل لجافا كل سنة 

أكثر من 3 المليار ديال الهواتف كاتستعمل جافا

عدد الهواتف اللي كاتستعمل جافا أكثر ب 31 مرة! من اجهزة اندرويد و آبل مجموعين

جميع البلو-راي كاتستعمل جافا

أكثر من مليار و نصف ديال بطاقات جافا كايتم الصناعة ديالها سنويا

جافا كاتخدم الطابعات,الكامرات ديال الحواسيب,الالعاب,أنظمة السيارات الرقمية,الاجهزة الطبية,محطات التأدية ديال ركن السيارات و زييييييد و زييييييييييد وزييييييييييييييد

كان هذا هو الموضوع اللي تطلب منا اننا نكتبو عليه من طرف أحد الفانز و اللي باعتباري مهتم بالمجال  قلت نكتب عليه باش يستافد الجميع و الناس اللي عندهم ميول 
لهاد المجال يعرفو منين يبداو

إعداد :   أنس حصاري