إعداد : عبدالله الشعيبي - جلال حميميد
شنو غايوقع ايلا كانو الابطال الخارقين حقيقيين ؟ كلنا كانشوفو الرسوم المتحركة و الافلام لي كاتهضر على أشخاص عندهم قدرات خارقة، و العديد كايتمناو لو تكون عندهم هاد القوى. و لكن واش هاد القوى مفيدة فالواقع ؟؟ يعني ف كوكب الأرض .. واش غايقدرو هاد الابطال يستغلو قدراتهم بحال داكشي لي كانشوفو فالأفلام ؟ و كيفاش غادي يتم استخدامها ايلا طبقنا عليها قوانين الفيزياء ؟
سوبرمان Superman
نبداو بأكثر واحد مشهور فالأبطال الخارقين لي هو سوبرمان، تخيل معايا، فقتي الصباح، لقيتي راسك بقوى خارقة بحال ديال سوبرمان، خاصك تاكل بالمعلقة بلا ماتعوجها، تسلم على شي واحد بلا ماتهرس ليه يديه، تكتب بستيلو بلا مايتهرس، الخ من الحالات لي غايخلي حياتك صعيبة بحالي كادير عملية جراحية للدماغ. باش نشوفو واش ممكن نطبقو قوى سوبرمان فالواقع، غانفتارضو أن بنت طايحة من مرتفع ما (ناطحة سحاب مثلا) و نتا خاصك تنقذها، شنو غادي دير، غاتفتح يديك باش تشدها ؟ غادي تهرس ليها ضلوعها، ايلا بغيتي طير عندها باش تشدها فالهواء، غادي تقتلها بحكم السرعة باش طالع سوبرمان و السرعة باش هابطة البنت غاينتج لينا تشويه فجسم الفتاة و بالتالي غاتموت أولا غادي تصاب. كاين طريقة وحدة باش تنقذها، هي أنك تطير نحو الارض بنفس السرعة لي هابطة بيها الفتاة و تشدها قبل ما توصل للأرض و تتجنب الوقوف المفاجئ بالتقليل من سرعتك و هادشي كامل خاصك ديرو قبل ماتوصل الضحية للأرض، و النتيجة هي موت الفتاة فجميع الحالات.
ذا فلاش The Flash
واش عارف شنو غايوقع ليك بسرعة خارقة تخليك أسرع من الصوت ؟ تقريبا راك عارف بلي الهواء فيه جزيئات كثيرة .. ايلا تصدمتي بيها غادي تولد حرارة كافية تخليك عبارة على قطعة ديال الفاخر محروقة. و حتا ايلا كانت عندك طريقة باش تتحمل الحرارة، را ملايين الجزيئات د التراب غاتدخل لعينيك، و هادي مشكلة ممكن نحلوها بأنك تلبس نظارات مضادة للحرارة تغطي عينيك و لكن .. باقي مشكل كبير، فكرتي فالمباني و الأشخاص لي غايجيوا قدامك ؟ العقل البشري خاصو 1/5 ثانية باش يدرك صور الاشخاص قدامو، إيلا كنتي كاتجري بسرعة 4000 كم فالساعة، ماغاديش تشوف تا حاجة قدامك من الاشخاص أو المباني و غاتقتلخم كاملين قبل ماتشوفهم، نفتارضو المجرم ضرب قرطاسة على مواطن بريء و جريتي باش تنقذو .. راه غايموت بطريقة أبشع من الموت بقرطاسة، لان الانتقال من حالة السكون للحركة بهاديك السرعة غايسبب ارتطام المخ بخلفية الجمجمة، ومنين توقف غادي يتضرب عاوتاني بالمقدمة د الجمجمة.
غرين لانتيرن Green Lantern
شكون فينا ماكرهش انه يقوم بابتهال الاشياء و ڭاع داكشي للي كايطيح ليه على الذهن ديالو؟ بمعنى آخر، مثلا تسد عليك الباب علما انك نتا ماعندكش المفاتيح، في هاذ الحالة يكفي انك تتخايل الساروت ديالك باش داك الخاتم للي فيدك يصنع واحد بحالو تماما! حاليا، مايكروسوفت تمكنات من انها تلقا الوصفة السحرية باش انك تشوف قدامك على شكل شاشة وهمية اي حدت كاتفكر فيه ولكن المشروع مازال في طور الدراسة و التحليل... داكشي لاش حتى الناس للي ابتكرو شخصية "غرين لانتيرن" ارتأوا ان القوة الخارقة ديالو مايمكنش انها تقبل اي تفسير باستثناء انه استمد القوى ديالو من "حراس الكون" للي عندهم تيكنولوجيا كاتفوت كوكب الارض.
باطمان Batman
باطمان Batman
الاستراتيجية، الدقة في الآداء و كذلك برودة الدم... هادو هما اهم المواصفات للي كايتمتع بيهم باطمان. مع الوقت و كترة التمرن يمكن لأي واحد فينا انه يوصل لهاذ المواصفات، و لكن المشكل مع هذه الشخصية هو المعدات للي عندها! من الدرجة الاولى: ما يسمى ب "الباتوينغ" و للي هي المقاتلة الخاصة بباطمان. هاد الطائرة للي عندو مزودة بنظام جد ذكي لدرجة انها كاتدخل دغيا بمجرد انها تحس بلي باطمان في خطر، علما انه حاليا، القوات الجوية الامريكية فشلات في صنع مقاتلة كاتقدر فقط انها تميز ما بين اعدائها و فريقها و للي كان من الفروض انها تكون F35 الجيل الرابع. الظاهر في الامر هو انه هاد الطائرة مستوحات من "البلاكبيرد" و للي هي مقاتلة تقيلة و صلبة لدرجة انها ماتقدرش تنزل في غار بسيط بحال للي عند باطمان بلا ماتهرس ڭاع المعدات للي عندو تما. من جهة اخرى: "الباتموبيل"، و هي السيارة الخاصة بهاد البطل. سريعة، قوية و صلبة، و لكن باش تكون قادرة انها تطلق صواريخ للي كايتبعو الحرارة المرتفعة، هنا خاصها تكون مزودة بنظام التبريد باش ماوقعش فيها انفجار ناتج عن ديك القوة للي كايمشي بها الصاروخ، و هاذ النظام باش يدار خاص السيارة تكون على الاقل قدها قد الدبابة. الناس للي اخترعوا شخصية باطمان، باش يبررو هاد التكنولوجيا العالية للي عندو، اعتبروا انه ورث واحد الحصة ضخمة ديال الفلوس ملي ماتو واليديه... و لكن السؤال هو، اذا كانو عندك الفلوس ديال بروس واين، غادي تقدر دير بحالو؟
غرين آروو The Green Arrow
غرين آروو The Green Arrow
هذا اوليڤر كوين، الملقب ب "دا غرين آروو". الشيء الوحيد للي كايفسر القوة ديالو هو الموهبة الرهيبة للي كايتمتع بيها في استعمال و حيازة القوس و الاسهم بحيث انه عمرو ماكايزڭل الاهداف ديالو. بغيتي تولي بحالو؟ تقدر، و لكن واش تقدر تصبر لمدة 5 سنوات في جزيرة فيها جميع انواع الصعوبات و المشاكل للي يمكن ليك تخايل؟ علما ان سلاحك الوحيد هو قوس جبراتك الظروف انك تعلم ليه اذا بغيتي تعيش؟
و لكن الحاجة الوحيدة للي كايديرها غرين آروو و للي نتا ماتقدرش ديرها هي انك تحرر يديك للي مشدودين بالاصفاد بلا ماتهرسهم... علاش؟ لأنه ملي كاتهرسهم، العظام ديالك كايترخاو و ماكايبقاوش فبلاستهم و بالتالي كايسهال على يديك انهم يخرجو من المينوط و لكن بالموازاة مع ذلك، الالم للي كاتحس بيه مايمكنش ليك تخايلو!
خلاصة القول، يمكن انه كاملين كانتمناو اننا نكونو بحال ابطال فرقة العدالة... توصل للخدمة في الوقت لانك سريع، ماعندك مادير بالارض لانك كاتعرف طير، مامحتاجش تشري تاحاجة حيت اي حاجة كاتخايلها كاتحضر قدامك، عندك معدات و وسائل للي ربما جيش بلادك ماعندوش الخ...
و لكن، واش كل واحد فينا باغي يعتق الضعفاء و الابرياء كيفما كايديرو هاد الابطال الخارقين؟ حيت اذا كانت النية ديالك من اكتساب هاذ القوى هي المساعدة و العون، راك تقدر ديرها كيفما نتا بلا ماتحتاج انك طير ولا تجري الخ...
و لكن الحاجة الوحيدة للي كايديرها غرين آروو و للي نتا ماتقدرش ديرها هي انك تحرر يديك للي مشدودين بالاصفاد بلا ماتهرسهم... علاش؟ لأنه ملي كاتهرسهم، العظام ديالك كايترخاو و ماكايبقاوش فبلاستهم و بالتالي كايسهال على يديك انهم يخرجو من المينوط و لكن بالموازاة مع ذلك، الالم للي كاتحس بيه مايمكنش ليك تخايلو!
خلاصة القول، يمكن انه كاملين كانتمناو اننا نكونو بحال ابطال فرقة العدالة... توصل للخدمة في الوقت لانك سريع، ماعندك مادير بالارض لانك كاتعرف طير، مامحتاجش تشري تاحاجة حيت اي حاجة كاتخايلها كاتحضر قدامك، عندك معدات و وسائل للي ربما جيش بلادك ماعندوش الخ...
و لكن، واش كل واحد فينا باغي يعتق الضعفاء و الابرياء كيفما كايديرو هاد الابطال الخارقين؟ حيت اذا كانت النية ديالك من اكتساب هاذ القوى هي المساعدة و العون، راك تقدر ديرها كيفما نتا بلا ماتحتاج انك طير ولا تجري الخ...
