الألم هو هاداك الشعور لي حسينا بيه كاملين فشي مرة من المرات، و هو إحساس كايديرو الدماغ بسبب التنبيهات العصبية لي كاتوصل من مختلف أعضاء الجسم... الألم ماشي مرض بحد ذاته و إنما هو من الأعراض لي كاتصاحب الكثير من الأمراض، كما أن شدة الألم ماشي بالضرورة مؤشر على خطورة المرض.
هنا غادي نستعرضو عشرة من أقوى الآلام لي يقدر الإنسان يعاني منها فحياتو:
1- الصداع العنقودي Cluster Headaches
الألم الناتج عن هاد المرض كايصيب أقل من %1 من البشر و هو منتشر عند الرجال كتر من النساء، كايتميز بحدوث ألم شديد فجهة وحدة من الرأس و كايتركز الألم بشكل خاص فجهة العين، النوبة ديال الألم كاتبقا عادة حوالي 15 دقيقة، و من المسببات ديال هاد الحالة المرضية المؤلمة : التدخين و الكحول و الأسباب الوراثية أحيانا.
2- الولادة Childbirth
كاتعاني الأم أثناء الولادة من آلام شديدة ماكاينش فحالها .. و كاتستمر فترة المخاض عدة ساعات .. و لكن كاتزيد و تنقص تبعا لعدة عوامل، و محاولة من الأطباء لتخفيف آلام المرأة أثناء الولادة، ابتدع الأطباء وسائل للتخدير و المسكنات "لي ماغاديش تأثر على الجنين" أو حتى بعد المداخلات الجراحية الموضعية.
3 - الحلأ النطاقي Shingles
غادي نتجنبو الصور الخاصة بهاد المرض، لأنها صادمة و تقدر تكون مؤثرة على البعض منكم، الأعراض ديال هاد المرض كاتمثل فظهور طفح جلدي "بزاف ديال الحبوب منتشرة و منفوخة فوق الجلد" و ماكاتنتشرش فالجسم كولو و إنما غير الجانب الأيمن أو الأيسر. و المرضى بيه ماكايقدروش ينعسو بسبب الألم الشديد.
4 - الحجر فالكلاوي Kidney Stones
كايتشكل الحجر فوسط الكلوة و كاينزل عبر القناة البولية، الشيء لي كايسبب آلام شديدة جدا ف كل ميليمتر من هاد الرحلة حتى كاتنزل عبر المخرج لخارج الجسم، هاد الحجر مكون أساسا من الكالسيوم و كاتساهم عدة عوامل (طبيعة الجسم، نوع الغذاء ..) ف تشكل هاد الحجر فالكلاوي. كايتميز الألم الكلوي بأنه ألم شديد، بحيث كايبدا ب وجع فالخصر و كاينتشر على مستوى القناة البولية وصولا للمنطقة التناسلية و كايترافق شي مرات بالدوخة و القيء. و أهم خطوة فالعلاج هي تسكين الألم أولا، و فحالة مابغاوش ينزلو هاد الحجرات يمكن استخدام مقاربات علاجية على حسب حجم الحجرة، فمثلا كاين العلاج الدوائي، أو تفتيت الحجر بالأمواج الصوتية، أو الجراحة أحيانا.
5 - الحجر فالمرّارة Gallstones
فالحقيقة صبعاني ضروني و مابقيتش قادر نحرك La souris بينما كانكتب هاد المقال، لأنه تخيل تكون فوسط المرارة ديالك حجرة قد التّينيسة، المرارة كيفما عارفين حنا كاملين هي واحد الكيس لاصق فالكبدة، الحجر فالمرارة كايتشكل أساسا من الكوليستيرول و هاد الحجر كايوصل الحجم ديالو حتال قد كرة الغولف، و كايسبب آلام شديدة فالربع العلوي الأيمن من الكرش. و كاينتاشر الألم أحيانا حتى يوصل للكتف الأيمن !
6 - Tooth Abscess
عاوتاني تجنبت ندير صورة من وسط الفم لأنه المنظر ... على أي Tooth Abscess هو ألم ناتج على تجمع القيح فاللثة أو فوسط السن، و السبب هو التعرض لهجوم جرثومي. و كايسبب ألم شديد و صاعق لدرجة أن المريض كايخبط راسو مع الحيط !
كايتطلب علاج سريع بالمضادات الحيوية و خافضات الحرارة و الضمادات بالإضافة لتدخل جراحي باش يحيدو القيح و يفجرو اللثة باش يخرج داك العجب. غسلو فمكم الله يرحم الواليدين.
7- ألم العصب مثلث التوائم Trigeminal Neuralgia
ألم مزمن على طول المسار ديال العصب لي ماشي للدماغ، الألم كايكون على مستوى الوجه و كايشبه للصاعقة الكهربائية، كايتميز بأن الألم كايتزاد مع مرور الأيام و من الأسباب ديالو انضغاط العصب بالأورام أو ب شي وعاء دموي قريب ليه، كايتعالج بالمسكنات أو الجراحة باش يتحيد الانضغاط فحالة وجوده.
8 - الحروق
بطبيعة الحال ماغانديرش صورة مع الحروق لأنه يكفي أنني أنا تصدمت بالمنظر، كلنا عارفين بللي الحروق كاتسبب آلام شديدة (مثلا غا لا حرقتي لسانك ب حليب سخون) و الألم ديال الحروق كايبقا مستمر طول الفترة اللازمة للشفاء، و كايعتامد على مساحة الحرق و الدرجة ديالو (أكفس نوع هو الدرجة الثالثة منين الحرق كايشمل الطبقات د الجلد كاملة وصولا للعظم) و كاتشكل الحروق لي مساحتها كبيرة و درجتها 2 أو 3 خطرا كبير على حياة المصاب و كاتطلب عناية طبية كبيرة.
9 - احتشاء العضلة القلبية Myocardial Infarction
كايسبب هاد الاحتشاء القلبي ألم صدري ضاغط، بحال جبل محطوط فوق صدرك و كايترافق هاد الألم عادة مع الغثيان و القيء و التعرق البارد و ضيق التنفس و الخوف و الاضطرابات النفسية، كايوقع احتشاء العضلة القلبية بسبب انسداد احد الشرايين الاكليلية المغذية للقلب.
10 - آلام مرض السرطان Cancer Pain
كايعانيوا مرضى السرطان و خصوصا فاش كاينتاشر و كايوصل لمرحلة متقدمة من آلام مستمرة و شديدة بسبب غزو الكتلة السرطانية الخبيثة للأعصاب، و هاد النوع من الآلام .. ماكايتوصفش.
باش نختم .. إيلا ماعمرك حسيتي بشي ألم بحال هادشي لي كتبت راك من المحظوظين جدا، على الأقل كاتاكل لي بغيتي و تتمشى و تضحك و تبول بلا تحس براسك كاتقطع فكلاويك .. غسلو سنانكم و ديوها فصحتكم را هي لي غادي تدوم ليكم. كنتمنى ليكم دوام الصحة و العافية.
المصدر
إعداد : عبدالله الشعيبي
