كاينا نظرية علمية كتقول بأنه أي حاجة في الكون ديالنا عندها نسخة في أكوان أخرى.
يعني منك نتا كاين بزاف يقدو يكونو عايشين بشكل آخر، مثلا نتا ميسور في الكون ديالنا، في كون آخر ممكن تكون فقير و في كون ثالت تقد تكون متي .. إلى مالا نهاية من الحالات الممكنة.
من غير الفلاسفة من عهد الآجورا و العلماء من حضارات أخرى كألكسيماندري ولا علماء القرون الوسطى بحال نيكولا دي كيو أو جيوردانو برونو، سنة 1895 الفيلسوف الأمريكي ويليام جيمس طرح هاد النظرية من جديد بقوله أنه كاين بزاف ديال الأكوان كتختلف في الزمان و المكان نوعا ما ، لكن سنة 1952 العالم الحائز على جائزة نوبل إروين شرودنجر قال بلي أنه حنا في واحد الكون لي حداه أكوان أخرى مختلفة كتهتز بشكل مختلف بمعنى أن ديك الاهتزاز في الزمكان هو لي كايدير الاختلاف بين كوكب أرض في سلام و آخر باديا فيه الحرب العالمية الخامسة و آخر فيه الانسان كحشرات ليلية أو زومبي كايخرجو من ليلة إلى أخرى .
غادي تقول لي أوك و من بعد؟ هانا جايك غير بشوية . تصور معايا تقد تسافر لأرض أخرى مافيهاش تلوث بيئي؟ مافيهاش عائلة دروتشيلد لي خانقا حياتك بفلوس حرام، ومافيهاش بوتين ولا كيم يونغ لي كولّا شوية باغين ينوضوها.. فما بالك أنك تقد تسافر لكون باقي فيه ديناصورات عايشين و تعيش مع راسك داكشي ديال جوراسيك بارك، ولا جاع حسن تقد تمشي لكوكب أرض باقي ماكايعرفو فيه الذهب ولا البيطرول و تولي نتا هو الشيخ آل سيمو و تبدا التنقيب على البترول لأول مرة هههه.. هادشي كايشهي ياك المشكل باقي معرفوش كيفاش يقدو ينتقلو من كون لآخر إذا كانت هاد النظرية صحيحة و في نفس الوقت قلنا قبل أنه أي حاجة تقد تكون مختلفة في الكون الآخر و منه حتى القوانين الفيزيائية لي كاتحكم في الحياة ديالنا فهاد الكون تقد تكون مختلفة في كون آخر بمعنا أنه الانسان ديال هاد الأرض يقد يموت في جوج ثواني ولا وحدة في الأرض ديال كون آخر و هادشي لي خلا هاد الحلم صعيب بزاف.
أتقولو في بالكم مادام هاد الحلم صعب علاش مصدع لينا راسنا أسيدي؟ ببساطة لأنه ناسا وكالة الفضاء الأمريكية سجلو صور لأول مرة كتبين شي حاجة خارجة من ثقب أسود واش قريتي مزيان؟ شي حاجة خارجة منو رغم قوة الجاذبية لي كايتميز بها و هذا لي خلا العالم المشهور ستيفن هاوكينج يخرج مؤخرا و يأكد على أنه هو متيقن بأن الثقب الأسود هو عبارة عن بوابة لعالم آخر.
مع هاوكينج الآن ممكن .. الآن زعما من هنا مئات السنين. فشكل ياك ؟
