غانهضر باختصار شديد فهاد الموضوع، أنا متأكد أن الأغلبية الساحقة فيكم ماعاجباهش خدمة الانترنت فهاد البلاد، خدمة لي هي سيئة و غادية للأسوأ طبعا خصوصا مع إيقاف خدمات الاتصال المجاني فهاد البلد. كاين حل ! نمشيوا للقمر. الباحثين قدرو ف 2014 يوصّلو الكونيكسيون للقمر، و هي كونيكسيون أنترنت أسرع من هادي لي كاتقرا بيها دابا هاد المقال.
مشروع الأنترنت فالقمر هو مشروع قديم و لكن يالاه تطبق هادي عامين على أرض الواقع و ولا حقيقي. علماء وكالة الفضاء الأمريكية ناسا و باحثين ف معهد ماساتشوستس للدراسات قدروا يحققوا هاد الانجاز.
باستعمال تيليسكوبات قطرها 15 سنتيمتر كاتسيفط أشعة تحت الحمراء لقمر صناعي كايدور على القمر، العلماء قدرو يوصلو كونيكسيون صاروخية من ناحية السرعة للقمر بحيث أن سرعة الانترنت فالقمر 19 Mbps، ويي أسي .. 19 ميغابايت فالثانية، أسرع من المعدل الإجمالي لسرعة الأنترنت فالولايات المتحدة الأمريكية. شنو بان ليكم ؟ نتحركو للقمر ؟
