قربو الدوريات الأوربية يتسالاو و ملامح الفرق لي غاتربح اللقب بدات كاتبان، كل نادي كايراهن على مجموعة من اللاعبين لي غايحققو المجد و اللقب هاد العام، المهاجمين هوما لي كايخليوا الفريق يتسلق سلم الترتيب بسرعة و كايصنعو الفارق فآخر اللحظات.
نخليكم مع أفضل المهاجمين ديال لعبة كرة القدم فأوربا "بدون ترتيب"
1 - جونزالو هيجواين
النجم الأرجنتيني المولود في فرنسا عام 1987 قدم موسم إستثنائي مع نادي نابولي الإيطالي بحيث قاد الفريق لاحتلال المركز الثاني فالدوري وراء يوفنتوس ب 6 د النقط، سجل جونزالو 30 هدف هاد الموسم.
انتقل جنزالو هيغواين لنادي نابولي عام 2013 من نادي ريال مدريد بصفقة وصلت قيمتها ل 40 مليون يورو، و دار جونزالو بلاصتو فالفرقة و ولات الجماهير كاتعلق عليه آمال كبيرة فالوصول بنادي نابولي لقيادة الفريق لمنصة التتويج.
2 - كريستيانو رونالدو
صاروخ ماديرا، الدون، الملك .. الخ الأسماء كتيرة و الشخص واحد، الأسطورة البرتغالي كريستيانو رونالدو، غني على التعريف .. رغم أن ر.مدريد واجه عقبات كثيرة ف هاد الموسم و تعثر بزاف د المرات، و كريستيانو تعرض لهفوات ففترات متقطعة هاد العام، رونالدو كيبقا هو ماكينة الأهداف لي كايعتامد عليها النادي الملكي باش يحقق الفوز ف المباريات و الأرقام لي حققها رونالدو كاتأكد هادشي.
3 - ليو ميسي
البرغوث الأرجنتيني و أفضل لاعب في العالم، نعم إنه ميسي، كايقدم موسم رائع مع البارسا رغم الهفوات الأخيرة ديال هاد الفريق ف المباريات الأخيرة و الإقصاء من عصبة الأبطال، إلا أن مستوى ميسي مستقر و مازال كايمتع المشجعين ديال البلوغرانا ب التقنيات و الموهبة ديالو.
3 - أنطوان غريزمان
النجم الفرنسي المولود عام 1991 كايقدم موسم مميز رفقة أتليتيكو مدريد، و كان ليه دور حاسم ف ضمان تأهل الأتليتيكو لنصف نهائي الشامبينزليغ ضد برشلونة، نادي العاصمة معروف بالنزعة الدفاعية ديالو، هنا فين كايبان التميز ديال أنطوان جريزمان بحيث كيستغل أنصاف الفرص و قدر يوصل الأتليتيكو لمراتب متقدمة بزاف فالدوري على غرار المواسم الفايتة.
4 - هاري كين
كايعتابروه فبريطانيا خليفة غاريث بيل، هاري مولود عام 1993، و لعب موسم رائع مع توتنهام اللندني و قدر يتصدر سبورة ترتيب الهدافين هاد العام.
هاري كين تقاتل العام الفايت باش يكون هداف و لكن ماقدرش، و لكن هاد العام راه ماشي ب خطى ثابتة نحو التتويج بلقب هداف الدوري، الشيء لي خلاه يخطف قلوب مشجعي توتنهام حيت وصلهم للوصافة ورا ليستر سيتي لي عايشة ملحمة مجنونة هاد العام.
5 - جيمي فاردي :
أسطورة انجليزية أخرى، قدر يكون ثاني هداف فالدوري الانجليزي و وصل ليستر سيتي لصدارة الدوري ضد عمالقة الكرة فالتاريخ !
كايعيش ليستر سيتي قصة مجنونة هاد الموسم بتصدره للدوري الإنجليزي، و فاردي كايعيش نفس هاد القصة المجنونة، فقبل أربع مواسم كان كيلعب لنادي هوات في إنجلترا ومامصنفش ضمن الأندية المحترفة، و لكن جيمي آمن براسو و وصل للعالمية هاد العام و تشهر و ووصلوه عروض من كبريات الأندية العالمية.
6 - روبرت ليفاندوفسكي
السفاح البولندي روبرت ليفاندوفسكي، هداف نادي بايرن ميونيخ الألماني قدر يأمن موقع للنادي فالصدارة د الدوري، و يأمن المركز الأول فسبورة الهدافين، تولد روبرت عام 1988، انتقل للبايرن عام 2014 بعدما رفض يجدد العقد مع بروسيا دورتموند، و كايتعتابر من أنجح الصفقات التاريخية ديال ب. ميونيخ.
