مقدمة السلسلة :
شنو هو الكون ؟ سؤال يقدر يبان بسيط و لكن الجواب عليه ماشي بنفس درجة البساطة، بحيث باش تفهم ماهية الكون خاصك تعرف مختلف المحطات لي داز منها هاد الكون و مختلف المكونات ديالو وكذا جميع المراحل لي داز منها هاد الكون الفسيح لي مازال ماعارفينش حتى الشكل ديالو كيفاش داير.
سلسلة "شنو هو الكون ؟" غاتحاول تبسط المفاهيم و تعطيكم أكبر عدد ممكن د المعلومات باش منين يتجبد هاد الموضوع ماتبقاش غي حال فمك و إنما تشارك فالنقاش و تعرف راسك فهاد الكون شنو كايسوا. نبداو ؟
المجموعة الشمسية
النظام الشمسي هو نظام الكواكب لي كايتكون من الشمس و الأجرام لي كاتدور حولها بحال الكواكب و الأقمار و المذنبات .. الخ، هاد النظام الشمسي كايتكون من الشمس، و الكواكب بحال الأرض و المريخ .. الخ، و الكواكب القزمة و الكويكبات و النيازك و المذنبات و الغبار و الغاز و الأقمار التابعة (150 قمر معروف لحد الآن) لي غالبا كاتدور على الكواكب الغازية العملاقة. أكبر جرم سماوي فالمجموعة الشمسية هي الشمس، لي كاينة فمركز النظام الشمسي و جميع الاجرام "الكواكب، الاقمار و داكشي" الاخرى مرتبطة بالجاذبية ديالها و كاتدور عليها. كتلة الشمس كاتمثل 99.8% من كتلة النظام الشمسي و هي لي كاتعطي الضوء و الطاقة للأرض باش تبقى الحياة ممكنة فكوكبنا. الكواكب لي كاينين فالنظام الشمسي كايتقسمو ل جوج ديال les catégories :
- الكواكب الصخرية :
عطارد و الأرض و الزهرة و المريخ
- الكواكب العملاقة الغازية :
المشتري و زحل و أورانوس و نبتون
أغلب الفلكيين كايقولو أن النظام الشمسي تولد قبل 4.6 مليار عام من واحد السحابة ضخمة ديال الغاز و الغبار و لكن كيفاش تمت عملية ولادة النظام الشمسي ؟؟
كيفاش تشكلت المجموعة الشمسية ؟
قبل 4.6 مليار عام كانت المجموعة الشمسية عبارة عن سحابة ديال الغاز و الغبار سميتها "السديم الشمسي - Solar Nebula" من بعد بدا هاد السديم الشمسي ففقدان التوازن ديالو بفعل انفجار نجم قديم، الشيء لي سبب واحد الخلل فالجاذبية، و بالتالي بدا الانهيار ديال هاد السديم بفعل قوة التجاذب، من بعد تكوّن واحد القرص ديال الغاز و الغبار، هاد القرص غايكون هو نواة النظام الشمسي بحيث أنه تزاد الضغط فالمركز ديالو الشيء لي خلا ذرات الهيدروجين تقرب من بعضها البعض و بفعل قوى الجاذبية بدا التفاعل النووي ديال هاد الذرات و بدات كاتندمج هاد الذرات بيناتها و كاتعطينا الهيليوم + طاقة، و هنا بدا التشكل ديال الشمس.
حسب وكالة ناسا، الشمس جذبت 99% من المادة لي كانت فالسديم الشمسي، بينما الكواكب و الاجرام السماوية الاخرى تكونت من هاديك 1% لي بقات.
فهاد الوقت، كان النظام الشمسي فيه بزاف ديال الفوضى، بحيث كانت الغازات و الغبار و الحطام منتشرة Everywhere .. و فنفس الوقت كانت الكواكب كاتشكل بسرعة كبيرة، بحيث بدات الذرات ديال الغبار و الغاز كتجمع. و فنفس الوقت الشمس حاولت تبعد عليها جميع الغازات الاخرى و دفعاتها للأطراف ديال المجموعة الشمسية.
مع مرور الزمن، هاد العوامل خلات الكواكب الصخرية تكون قريبة من الشمس، و الكواكب الغازية تكون بعيدة عليها.
غانكملو الجزء الثاني ديال النظام الشمسي فالأسبوع القادم، ايلا عجبكم الجزء الأول.
إعداد عبدالله الشعيبي
