شنو هو الفوتوشوب ؟

الفوتوشوب هو برنامج رسوميات لإنشاء و تعديل الصور النقطية Raster Graphics و هو ديال شركة أدوبي Adobe.

بان الفوتوشوب أول مرة عام 1987 منين طوماس نول صايب برنامج جرافيك ف جهاز ماكنتوش بلس، كان هاد البرنامج كايعرض الصور أحادية اللون بدرجات اللون الرمادي، و كانت سمية ديال هاد البرنامج هي Display، من بعد، الأخ ديال طوماس نول "جون نول" قام بتطوير البرنامج ديال خوه و زاد خاصية تعديل الصور و كانت أول نسخة ديال فوتوشوب هي Photoshop (version 0.07).

من بعد عام واحد، أي ف 1988، شركة أدوبي Adobe شرات فوتوشوب من جون نول، و فعام 1990 تطلق Adobe Photoshop 1.0، و فهاد النسخة تزادو بزاف ديال التويشيات لي باقيين لحد الآن ف فوتوشوب من بينهم : خاصية تعديل الألوان، و تعديل الواجهة ديال البرنامج، و إضافة خاصية التعديل على الصور، و من بعد تم إصدار نسخة أخرى كاتدعم النموذج اللوني CMYK لي كاتعني النموذج اللوني Cyan, Magenta, Yellow, and Key (Black) الناس لي كايقراو هادشي را غيعرفو علاش كنهضر. و تزادت أهم أداة بالنسبة لي و هي Pen Tool

بقاو الإصدارات ديال فوتوشوب كايتطورو حتال العام 2003  فاش شركة أدوبي طلقات نسخة CS و لي هي اختصار ديال عبارة Creative Suite و هي سلسلة ديال البرامج خاصة بمصممي الجرافيك، من أهمها الفوتوشوب و الاليستريتور و الأفتر إفكت.

أدوب فوتوشوب عندو بزاف ديال الاستعمالات، نشوفو بعض الأمثلة : 

تصحيح الصور

القوة ديال الفوتوشوب ف كونه قادر على تصحيح العيوب ديال الصور الرقمية، بحال تصحيح الاضاءة و الألوان و بزاف .. و لكن دابا خرج برنامج من شركة أدوبي سميتو Lightroom مختص غي فهادشي، دونك ممكن نخدمو بالفوتوشوب أو باللايت روم، على حساب الميولات ديالك.

تحسينات

ايلا عندك شي حبوب فوجهك، لون البشرة ديالك ماعاجبكش، لون شعرك، التيشورت ديالك أو حتى البلاصة فين تصورتي .. ماكاينش مشكل مع الفوتوشوب، خاصك غي شي ديزاينر خطير و صورة بجودة عالية باش ترجعها كيما بغيتي.

Photo Manipulation

من أهم نقاط القوة ف الفوتوشوب هي القدرة على دمج الصور و خلق صورة جديدة تماما فيها بزاف ديال العناصر، و أهم حاجة فدمج الصور هو الاعتناء بالتفاصيل الصغيرة حيت هي لي عندها دور كبير فنجاح/فشل العمل الفني ديالك. و من أكبر الفنانين اللي كايخدمو هادشي هوما الايطالي ألبرتو سيفيسو و السويدي إريك جوهانسون، يمكن ليكم تشوفو الأعمال ديالهم فالموقع الرسمي ديال شركة أدوبي أو فموقع Bēhance التابع لشركة أدوبي كذلك.

الرسم الرقمي - Digital Drawing

فوتوشوب هو من بين أحسن برامج الرسم الرقمي و حتى Digital Painting و Digital Sketching خصك موهبة فالرسم أو تتعلم الأساسيات، و هانتا فنان مع راسك.

صناعة الGIFs

الGIFs أو الصور المتحركة كايتعتبر الفوتوشوب هو الأداة الرئيسية فصناعتها بمساعدة برنامج الافتر افكت أو غي فوتوشوب بوحدو على حسب كل GIF.

بدينا الهضرة على فوتوشوب، من بعد غاندوزو للبرامج الأخرى واحد ب واحد باش تتعرفو عليهم كاملين، لي عندو شي تصميم بالفوتوشوب يحطو ف كومنت.

إعداد : عبدالله الشعيبي / مصمم جرافيك و مُؤسس هل تعلم ؟ نسخة بالدارجة.