تعودنا باش نشوفو ديما الواقع تحت او بعيد كل البعد من داكشي للي كانشوفو في افلام الخيال العلمي. هاد الروتين ولفنا عليها: كانصادفو شي حاجة خارقة للعادة في افلام هوليود بحال غزو الفضاء او امكانية الطيران الخ... و كانبداو نتعجبو من هاد المشاهد في الوقت للي كانستبعدو امكانية مصادفتها في الواقع، حتى كايجي العلم و كاحضرها لينا بهاد المعنى!
اذا كنتي معجب حقيقي ديال الرجل الحديدي Iron Man غادي تكون عارف بلي الدرع او اللبسة ديال Tony Stark كانت مصنوعة اصلا من واحد الخليط مكون من التيثينيوم و الذهب الشيء للي كايجعل منو ذو واحد القوة خيالية ماكاتبانش قدام المعادن العادية للي كانعرفوا.
و اذا كنتي معجب حقيقي ديال الرجل الحديدي، راه خاصك تكون فرحان و مدين لباحثي جامعة Rice في الولايات المتحدة الامريكية للي مابقا كايفصلهم والو باش يخرجو للرأي العام The Real Iron Man! بطبيعة الحال، الطاقة للي كايتحك بيها الرجل الحديدي مازالت جزء من الخيال العلمي، و لكن الدرع ديالو، صافي تكشف السر تاعو!
للإشارة، فكما ظهر لينا في الفلم الشهير Iron Man، طوني سطارك صمم الجيل التالث ديال الدرع ديالو من معدن التيثينيوم المذهب على أساس انه يكون اقوى و اصلب من التيثينيوم الخالص بأربع مرات و اللي كايتعتابر مضاد قوي للحرائق و الصدء و حتى الطلقات النارية الخ... و للي كايتستعمل في التصفيح Blindage خصوصا في الصناعات العسكرية.
صورة مجهرية لمعدن التيثينيوم المذهب:
بطبيعة الحال، هاد الاكتشاف جا عن طريق الصدفة. "It was god's intuition" كيفما قالت Emila Morcsan، واحدة من الفريق للي قام بهاد الاكتشاف. في الحقيقة، الفريق العلمي كان خدام على واحد القضية لا علاقة لها مع الرجل الحديدي بتاتا: كانو كايحاولوا يعرفو كيفاش أن معدن التيثينيوم المذهب يمكن يتجر من طرف المغناطيس علما انه لا الذهب و لا التيثينيوم ماكايتجروش من طرف المغناطيس. و باش يعرفو الاجابة، كان خاص ضروري أنه يتم تجزيء قطعة من هاذ المعدن الى غبار باش تتم دراسة البنية ديالها بواسطة الأشعة X، الشيء للي كان من المستحيل القيام بيه نظرا لقوة هاذ المعدن الخيالية!
العلم ماكايآمنش بالصدفة، هادشي لاش الباحثين ما عگزوش باش يقلبوا على السبب الرئيسي وراء هاذ القوة المعدنية: في الحقيقة، جزيئة التيثينيوم المذهب كاتكون من تلاث ذرات ديال التيثينيوم و ذرة واحدة ديال الذهب، يعني كايتكتب على هاذ الشكل: Ti3Au. غير أنه الأغلبية ديال الأوساط العلمية كاتعرف هاد المكون الكيميائي بل و القوة ديالو ماكاتختالفش بزاف على التيثينيوم الخالص، و لكن للي كاندويو عليه هو للي تكتاشف مؤخرا ب الصدفة، و هو للي تصنع بيه الدرع ديال Tony Stark، و هو للي كاتيتسما بمرحلة Alpha من تكوين التيثينيوم المذهب و للي كانوصلو بها هاد المعدن الى قوة كاتفوت قوة التيثينيوم الخالص بأربع مرات، و هادشي من بعد تعريضو لدرجرة حرارة جد مرتفعة...
لكل هذا، ماتفاجأوش اذا شي مرة سمعتو بلي تم اكتشاف عالم خماسي الابعاد بحال في Interstellar و لا أنه تم تصميم Batmobile مطابقة تماما لسيارة باطمان، و لا حتى رجل آلي بأحاسيس بحال في فيلم iRobot..
إعداد : جلال حميميد
