الأغلبية منا باغيين يكونوا متفوقين و ناجحين فحياتهم و لكن ماشي كولشي كايبغي يوصل لنفس المستوى ديال النجاح، كل واحد و المستوى لي باغي يوصل ليه، و كيصادف أننا كلنا كانآمنوا بمجموعة من الكدبات على النجاح أو كيفاش نوصلو ليه لذلك قررت نقدم ليكم هاد سبعة الكدبات باش تحولوا تجنبوها و ماتبقاوش تآمنو بها.
الكذبة الأولى: ""خاصك تكون عارف الجواب لأي سؤال""
جوان بايز كتقول بلي ""قدما الواحد كيبحث، قدما كاتزيد المعرفة ديالو و كايجيو معاها الأجوبة"".
الناس الناجحين و المتفوقين فحياتهم ماعمرهم كايبداو بجميع الأجوبة،لأنهم كايتعلمو كيفاش يعرفو الأجوبة ديال الأسئلة لي عندهم،أو بالأحرى كاتزيد المعرفة ديالهم. و فهاد الوقت،ولا من السهل جدا الإجابة عن أي سؤال كان و كيرجع الفضل إلى الأنترنيت و وسائل التواصل.
بزاف د الناس نجحو فحياتهم و وصلو لداكشي لي بغاوعن طريق التعلم من أخطائهم لذلك ماشي عيب أنك تغلط ،العيب هوا أنك تغلط و ماتعلمش من الأخطاء ديالك.
الكذبة الثانية: ""ما خاصكش ضروري تقوم بشي تغيير""
Narcotics Anonymous كاتقول : "" الجنون هوا انك تبقا تدير فنفس الحاجة و تبقا تعاود فيها و تسنى منها نتائج متعددة و مختلفة ""
و من هاد المقولة كانستنتجو بلي كاين فرق كبير ما بين الجنون و المثابرة، و خاصك تكون واعي باش تعرف بلي جا الوقت لي خاصك تقوم بتغيير، و باش توصل للمستوى ديال النجاح لي باغي توصل ليه كتحتاج أنك تكون مستعد أنك تخرج من صناعة و تدخل فشي صناعة أخرى أو تبدل الصناعة ديالك يعني انك تكون مستعد تتأقلم معا التغييرات. و فالأخير، باش تكون ناجح و متفوق فحياتك، خاصك ضروري تقوم ماشي غير بتغيير واحد، و إنما تغييرات هيا.
الكذبة الثالثة : "" النجاح كايتحقق ما بين ليلة و ضحاها ""
بيونسي كاتقول :""ما عمرني تلاقيت شي واحد كايسهر و كايخدم كتر مني فالمهنة ديالي ""
من أشهر الكدبات لي كانتيقو على النجاح هوا أنه يقدر يتحقق بين ليلة و ضحاها.
هاد الكدبة تبناتها وسائل الإعلام لي ولينا من الضروري مانستعملوها فحياتنا اليومية،كلنا ماكرهناش نجحوا بين ليلة و ضحاها بلا عداب بلا والو و لكن هادي شي حاجة لي مستحيلة و عمرها ما تحقق لأن النجاح كايبغي الوقت و الصبر و العمل الجاد و شويا د تمارا.
الكذبة الرابعة:""ماشي ضروري تقوم بتضحيات باش تكون ناجح""
أوبرا وينفري كتقول :"" يمكنلك يكون عندك كولشي، و لكن ماشي من الدقة لولا ""
اه،يمكن يكون عندك كولشي،يمكن تربح الملايين فالشهر،يمكن تسافر لخمسين بلاد فالعام، يمكن تقضي كل دقيقة مع عائلتك، يمكن تكون بصحة جيدة و تكمل حتى عشرة د الماراطونات، يمكن تدير جمعية و تحارب المجاعة و لاكن ماشي كولشي فدقة.
حياتك عمرها ماغاتكون مثالية،خاصك تعرف باشنو غادي تضحي دابا باش يكون عندك لي بغيتي و ماكتر من بعد، الأولويات ديالك غادي تبدل فكل مرحلة من حياتك لذلك ضروري تضحي بشي حوايج باش تنجح فحياتك.
الكذبة الخامسة: ""النجاح غايقضي على كاع المشاكيل لي عندك""
جيم رون كيقول :"" ماتمناش يكون كولشي ساهل، تمنى انك تكون الأحسن. ماتمناش المشاكيل تكون قليلة،تمنى المزيد من المهارات. ماتمناش يكون التحدي قليل،تمنى المزيد من الحكمة""
الناس الناجحين ماشي ماعندهومش مشاكيل، غير أنهم كايعرفو كيفاش يتعاملو مع مشاكيلهم عن طريق إستراتيجية معينة و خاصة بيهم .المشاكيل ضروري ماتواجههم فطريقك إلى النجاح، و لي هيا شي حاجة ماشي غريبة على الناس لي نجحو فحياتهم ،باش نجحو و تفوقو فحياتهم : تعلمو أنهم يواجهو المشاكيل ديالهم واخا تكون كبيرة.
و بالتالي،كلما كنتي ناجح،كلما كتواجه مشاكيل كتر.ماتفكرش بلي ملي غادي تنجح ماغايبقاو عندك مشاكيل، بالعكس عاد ماغادي يزيدو و يكبرو و معاهم غاتكبر القدرة ديالك على التعامل معاهم و القضاء عليهم.
الكذبة السادسة :""الناس غايبغيوك كتر ملي غاتنجح""
مارلين مونرو كاتقول : ""النجاح غايخلي شحال من واحد يكرهك ""
شحال من مرة سمعتي أو شفتي الناس كايمدحو شي واحد لي ناجح فحياتو؟
الناس الناجحين كيخليو الناس لي ماناجحينش بحالهم يكرهوهم و يكرهو النجاح ديالهم لأنك كلما كنتي ناجح كلما تعرضتي للنقد السلبي،النجاح ديالك أيخليك تخسر صحابك، و لكن أيخليك تدير صحاب جداد لي كايعيشو حتا هوما النجاح فنفس الوقت.
الكذبة السابعة :"" النجاح غايزيد يفرحك فحايتك ""
الكاتب زيغ زيغلار :"" الفلوس ماغاديش تفرحك""
الفلوس بصح تقدر تفرحك و تشري ليك شويا ديال السعادة، و لكن لمدة قصيرة فقط، و ماغاديش تدوم هاد السعادة.
السبيل الوحيد لي أيخلي النجاح يزيد يفرحك هوا أنك تحمد الله على كل لحظة كاتعيشها سواء كانت زوينة أو خايبة، سواء كنتي نجحتي أولا باقي، عيش السعادة دابا و فرح دابا لأن النجاح ماشي هوا لي غايفرحك فحياتك.
من إعداد : سلمى حاتمي.
