الموضوع من إعداد : عبدالله الشعيبي / مؤسس صفحة هل تعلم ؟ نسخة بالدارجة
تولد الطبيب و المنجم الأشهر فالعالم ميشيل دو نوسترادام (Michel de Nostredame) ف 14 ديسمبر من عام 1503 "نفس نهار ميلادي" فجنوب فرنسا.
تعلم اللغات العبرية، الإغريقية و اللاتينية و درس مختلف علوم ما وراء الطبيعة، الرياضيات، و علم التنجيم لي كان كايعتامد عليه فالتنبؤ بالمستقبل كيفما كان كايقول.
من أشهر الكتابات ديالو : كتاب "النبوءات-Propheties" لي صدر عام 1555م/ و فهاد الكتاب كاين بزاف ديال الأحداث الكبيرة لي غاتوقع فالعالم فالفترة الزمنية الممتدة من القرن 16 حتى لنهاية العالم لي توقع نوستراداموس أنه غايكون عام 3797م.
التنبؤات ديال نوستراداموس بين مؤيد و معارض
برغم من الصدى الكبير للتنبؤات ديال نوستراداموس منذ وقت كتابتها و حتى لليوم، هاد النبوءات ماقدرتش تقنع بعض الباحثين لي شككوا فالقدرات التنبؤية ديالو و اعتبروه مجرد شخص ذكي و واسع الحيلة قدر يخدع الناس على مر القرون !
و ارتكزو فهاد الادعاء أن جميع نبوءات نوستراداموس مشفرة، حيث أنها تكتبت فأسطر ديال قصائد شعرية غامضة يمكن ليك تفسرها أكثر من تفسير.
بينما كايشوف باحثين أن نبوءات نوستراداموس ما هي إلا إعادة صياغة بعض التنبؤات ديال الكتاب المقدس "الإنجيل" أو ديال بعض الكتابات التكهنية ديال مؤرخي القرون الوسطى و قدماء المؤرخين بحال الفيسلوف اليوناني بلوتارخ (Πλούταρχος).
بينما كايدافعو الناس لي كايشوفو أن نبوءات نوستراداموس صحيحة عليه، بكون أنه هاد العالم اضطر أنه يشوش على الكتابات ديالو و يخليها ماواضحاش باش مايتحاكمش من طرف محاكم التفتيش بممارسة السحر الأسود، كما أنه دخل كلمات من لغات أخرى من غير الفرنسية كاللاتينية و اليونانية و الايطالية لنفس السبب.
كما أن المؤيدين ديال صحة نبوءات نوستراداموس كايدافعو عليه من خلال الترويج لبعض الأحداث التاريخية الهامة بحال انطلاق الثورة الفرنسية و الهزيمة ديال نابوليون بونابارت، و اغتيال كينيدي و الأخ ديالو بالاضافة لأحداث 11 سبتمبر، الشيء لي خلاه أشهر متنبئ فالتاريخ !
و من المهم التذكير أن داكشي لي تنبأ بيه نوستراداموس تحققت منو شحال من حاجة مايمكنش لينا نتجاهلوها، نخليكم مع هاد الأمثلة :
- مقتل الملك هنري الثاني
فكتاب النبوءات هضر نوستراداموس على أن "شبل" كايربح "أسد" ف أرض المعركة، و أن هاد الشبل غادي يثقب عين الأسد مما غادي يتسبب فالموت ديال الأسد ميتة مؤلمة.
و بالفعل تحققت النبوءة بعد مرور 4 سنوات على كتابتها، حيث مات هنري الثاني ملك فرنسا (الأسد) على يد نبيل ولاية مونتجمري (الشبل) بعد مباراة مبارزة بيناتهم، حيث أن رمح النبيل اخترق الخوذة ديال الملك و استقر فالعين ديال الملك و ضرب ليه المخ مما تسبب فالوفاة ديالو بطريقة بشعة.
- الولادة ديال أدولف هتلر
أيضا ف كتاب التنبؤات، ذكر نوستراداموس واحد الشخص سميتو "هستر" غادي يتولد فغرب أوروبا من أبوين فقيرين، و قال أنه غادي يتحكم فجيش ضخم بفضل المهارات الفائقة ديالو فالخطاب و الإقناع، كما أن الشهرة ديالو غادي توصل حتال الشرق، لكنه غادي يخسر فالنهاية أمام الجيوش لي غادي تتحالف عليه.
و تولد "هتلر" (المشار إليه بهستر فالنبوءات) عام 1889 فالنمسا من أبوين فقيرين و قدر يسيطر على الحكم فألمانيا، و كيفما ذكر نوستراداموس تماما، هتلر كان معروف بالخطابات الحماسية ديالو، و تشهر فالعالم كامل و خسر منين تحالفت عليه روسيا "الاتحاد السوفياتي"، الولايات المتحدة و إنجلترا.
- القنبلة الذرية
تنبأ نوستراداموس بوقوع كارثة كبرى فواحد المدينتين، كارثة لي ماعمر شي واحد شاف بحالها. و من المعتقد أن نوستراداموس كان كايقصر كارثة قصف الولايات المتحدة الأمريكية لمدينتي هيروشيما و ناغازاكي اليابانيتين بقنبلتين ذريتين ف غشت 1945، و النتائج المترتبة عليها من دمار و تسمم إشعاعي.
أما بالنسبة للتنبؤات ديال عام 2016، فيها لي تحقق و فيها لي مازال، و كاتشمل التوقعات كوارث بيئية و تغيرات مناخية كبيرة.
أيضا توقع نوستراداموس أنه فعام 2016 غادي يتم اختراع أداة كاتمكن الشعوب من التواصل بيناتهم بغض النظر على لغتهم، و فعلا تم اختراع سماعة الترجمة الفورية هاد العام، هاد السماعة سميتها The Pilot و هي من إنتاج Waverly Labs و غادي نرجعو ليها بالتفصيل مستقبلا.
أخيرا، و سواء كنتي من المصدقين للنبوءات ديال نوستراداموس أو من الناس لي كيقولو أنه مجرد شخص عادي عندو ذكاء خارق، فهادا ماغاديش يغير من عمق تأثيره على الفكر و الوجدان عند كل واحد سمع بيه، هادشي لاش اختاريت أنني نختم المقال بالمزيد من المعلومات عليه.
- منين كان نوستراداموس فإيطاليا داز بالقرب من راهب شاب سميتو فيليس بريتي، و هو يركع قدامو نوستراداموس و قال ليه : "قداستكم" أي أن نوستراداموس تنبأ بترسيمه بابا للفاتيكان، و تحققت هاد النبوءة عام 1585 منين ولا هاد الراهب هو البابا سيكستوس الخامس.
 |
| سيكستوس الخامس |
- ماقدرش نوستراداموس ينقذ الزوجة و الأبناء ديالومن مرض الطاعون و ماقدرش يتنبأ بيه، الشيء لي أثر سلبا على المسيرة المهنية ديالو.
- ف مساء اليوم الأول من يوليوز عام 1566 قال نوستراداموس للمساعدة ديالو أنه ماغاديش يكون حي منين تشرق الشمس ديال اليوم التالي. و فعلا مات نوستراداموس فديك الليلة، كما أن نوستراداموس تنبأ أنه القبر ديالو غادي يتفتح فتاريخ معين و فعلا تفتح القبر ديالو من طرف مجموعة ديال الشبان.
- نابليون بونابارت و أدولف هتلر قراو كتاب النبوءات ديال نوستراداموس و الوزير الأول ديال الملكة إليزابيث الأولى احتفظ بنسخة منو فالمكتب ديالو، و كاينة نسخة فمكتبة الفاتيكان.
