ملاحظة:المهم دراري لي ماركا من العنوان ماشي راجل هههههه ، و ماديوش عليا راني ماشي تالهيه ولكن سمحلي و سمحيلي مانقدرش نكتب على شي حاجا سيريو بزاف عزيز عليا نضحك شويا المهم المهم ..أول حاجة هذا أول جزء باقين أجزاء أخرى..
اليوم أندويلكم على نظرية حيرات كلشي إذا جيت قلتلك الأرض وسطها أرض أخرى الداخل ؟ معلوم ماغاديش تيقني ولكن بزاف ديال الناس كيآمنو بهاد الفكرة و كيعتبروها مؤامراة ضذ البشرية حيت ببساطة هما ماباغينكش تزاحمهم إذا لقاو طريقة أخرى للحياة تحت الأرض أو ببساطة إذا لقاو منبع لثروات أخرى، هاد الفكرة تقد تكون مجرد إشاعة ولكن كاين دلائل كثيرة كتبين العكس وأن الخبر حقيقة كتسعى الدول العظمى والمنظمات الخفية لي كتسيطر على كل شيء لاخفائه هادشي غريب ياك ؟ كمل معايا وغاتزيد تصدم بشي حوايج تقد تشوفهم أول مرة في حياتك، الموضوع طويل و كيضوخ الصراحة و خاسو تعمق و فيه بزاف ديال الأسئلة أولها منين جات هاد الفكرة؟
في الكتب قراونا بلي الأرض عندها طبقات وحدة تلوى الأخرى حتى كانوصلو للفريتوس النواة ديال الأرض ، وي البلاصة لي شاعل فيها الشياظ و لكن سمحلي نقولك بلي الناس من العهد القديم ماتافقوش على هادشي ، و حاليا في عصرنا هذا كانوا علماء الأغلبية نهايتهم كتكون بين قوصين "غريبة" ، كيأكدو على أن الأرض مجوفة ,و ماشي غير علماء تامن أكبر عظماء التاريخ ديال الحروب و الفتك و الدم و ديكشي ..هيتلر!
كان ديما كيصر هو و النازيين على أن الأرض مجوفة و كاينا طريق كتدي لداخل باطن الأرض ، الجهة الأخرى. لباقي محيرني هو مايمكنش 7 مليار ديال البشر و ماعمر طاح شي حد في ديك الطريق ؟ ولا ديك البوابة؟
واش زعما مأمنة لديك الدرجة؟ شخصيا كنقول بأن البوابة إذا كانت دبصح غاتكون في ديك 85% ديال المحيطات لي باقي مكتاشفناهمش ولا فشي قطب من القطبين واشنو راه هادوك هما البلايص الوحيدة لي باقين ماعرفناش شنو فيهم مزيان .
زايدون هاد القضية ديال البوابة موجودة في أحد القطبين تقد تكون بصح حيت خرجو صور في الأنترنت كيأكدو على أنه كاين ثقب ضخم في تلك المنطقة واش زعما هاديك هي الطريق لتما ؟ شوف التصويرة و حكم...
سورس: جوجل إيماج
ولا يمكن تقد تكون البوابة في المغرب ؟ ممكن علاش لا! المغرب في وسط الخريطة جغرافيا منطقة سطراتيجيك ببساطة إذا كنت أندير بوابة تديني لتما أنديرها في بلاصة تكون الوسط كلشي يقد يوصل ليها ! أنديرها في المغرب أودي.. تصور تدخل تما و تلقا كلشي مبدل ولكن غير توصل للجهة ديال المغرب تلقى المكي ترابي ديالهم و أمينوكس ماشي بحالهم تاهو و دير دوميتور بناقس جاع الهربة ههههه...
الخوت الحلقة سالات اليوم دوينا فهاد الجزء على البوابة، الطريق، لاروت ، المرة الجايا غاندويلكم على شنو كاين الداخل تما وي حيت راني تما فاكونص و منسيتكومش يالاه التفاعل زدنا ليكم كمنطيرات فيسبوك التحت الخوت، بارطاجيو و الكمالا قريبا سي يو !
